އޮޅުވާލައިގެން މަކަރާއި ހީލަތުން އެކި މީސްމީހުންގެ އެކައުންޓްތަކުން ފައިސާ ނަގަމުންދާ މައްސަލަތަކާ ގުޅިގެން ފުލުހުންނާއި ބީއެމްއެލް އާއި މުއާސަލާތީ ހިދުމަތްދޭ ކުންފުނިތައް ހާއްސަ މަސައްކަތް ފަށައިފި އެވެ.
ފުލުހުންގެ ކްރައިމް އިންވެސްޓިގޭޝަންސް ކޮމާންޑުގެ ޑެޕިއުޓީ ހެޑް ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ރިޔާޒް ވިދާޅުވީ މި މަސައްކަތް ފަށައި އެގޮތަށް ފައިސާ ނަގެމުގެ މުއާމަލާތްތައް ހިންގާ ނަމްބަރުތައް ހޯދަން ވެސް ފުލުހުން މިހާރު ކޮމިއުނިކޭޝަން އޮތޯރިޓީ ގައި އެދިފައިވާ ކަމަށެވެ.
އޭނާ ވިދާޅުވީ ފުލުހުންގެ ހާއްސަ ތަހުގީގު ޓީމެއް އެކުލަވާލައިގެން ކަމާބެހޭ ފަރާތްތަކާއެކު މަސައްކަތްތަކެއް ފަށާފައިވާއިރު މައްސަލަތައް ވެސް މަދުވަމުން އަންނަ ކަމަށާއި އެ މަސައްކަތް ފެށުމާއެކު ނުދަންނަ ނަމްބަރުތަކުން ގުޅައި އޮޅުވާލައި އެކި މީސްމީހުންގެ އެކައުންޓްތަކުން މަކަރާ ހީލަތުން ފައިސާ ނަގަމުންދިޔަ މީހަކު ލ. އަތޮޅުން ހައްޔަރުކޮށްފައިވާ ކަމަށެވެ. އެމީހާ ހައްޔަރުކޮށްފައިވަނީ ކޯޓް އަމުރެއްގެ ދަށުންނެވެ. އޭނާގެ ބަންދަށް ވަނީ 15 ދުވަސް ދީފައެވެ.
މޯލްޑިވްސް ޕޮލިސް ސާވިސް
އޮޅުވާލައިގެން އެކައުންޓްތަކުން ފައިސާ ނަގާތީ ހާއްސަ މަސައްކަތެއް ފަށައި މީހަކު ހައްޔަރުކޮށްފި
