ކުނިވެފައި ހުރި ބިސް ވިއްކަމުންދާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފި އެވެ.
އެމްއެފްޑީއޭ އިން މިއަދު ނެރެފައިވާ ބަޔާނެއްގައި ބުނެފައިވަނީ ބައެއް ފިހާރަތަކުން ކުނިވެފައި ހުންނަ ބިސް ވިއްކާ ކަމުގެ ޝަކުވާ ލިބޭ ކަމަށެވެ. ކުނިވެފައި ހުންނަ ބިސް ބޭނުން ކުރުމުން ސިއްހަތަށް ނުރައްކާވެ، އެކަމުގެ ސަބަބުން ނުރައްކާތެރި ބަލިތައް ފެތުރުމުގެ ފުރުސަތު އޮތް ކަމަށްވެސް ބަޔާނުގައިވެ އެވެ.
އެމްއެފްޑީއޭއިން ބުނީ ފިނިކޮށްފައި ހުންނަ ބިސް ރައްކާތެރިކަމާއެކު ބެހެއްޓޭނީ ގިނަ ވެގެން ތިން މަސް ދުވަހަށް ކަމަށާއި ފިނި ނުކޮށް ބެހެއްޓޭނީ 28 ދުވަހުގެ މުއްދަތަކަށް ކަމަށެވެ.
މުއްދަތު ހަމަވާ ތާރީހު ހަމަވުމުން ބިސް ކުނިވުމުގެ ފުރުސަތު އޮންނާނެ ކަމަށާއި އަދި މުއްދަތު ހަމަނުވި ނަމަވެސް ހުންނަންޖެހޭ ފިނިހޫނުމިނަށް ނުބަހައްޓާނަމަ ބިސް ކުނިވުމުގެ ފުރުސަތު އޮންނާނެ ކަމަށްވެސް ބުނެފައިވެ އެވެ.
"ވީމާ ބިސް ވިއްކަން ބަހައްޓާއިރު ރައްކާކުރުމަށް ކަނޑައަޅާފައިވާ ފިނިހޫނުމިން ކޮންޓްރޯލްކޮށް، މުއްދަތު ހަމަވާ ތާރީހު އެނގޭގޮތަށް ބިސް ވިއްކަން ބެހެއްޓުމަށް އަންގަމެވެ. އަދި ބިސް ގަންނަ ފަރާތްތަކުން މިކަމަށް ހާއްސަ ސަމާލުކަމެއް ދިނުމަށް އިލްތިމާސްކުރަމެވެ،" ބަޔާނުގައިވެ އެވެ.