ހޯމް މިނިސްޓަރު އިމްރާން އަބްދުﷲ، ތުރުކީގެ ހޯމް މިނިސްޓަރު ސުލައިމާން ސޮއިލްއާ ބައްދަލުކުރައްވައިފި އެވެ.
ތުރުކީގެ ހޯމް މިނިސްޓަރު ސުލައިމާންއާ އިމްރާން މިއަދު ބައްދަލުކުރެއްވީ ސުލައިމާންގެ ދައުވަތަކަށް އެ ގައުމަށް ވަޑައިގެންނެވެ.
ދެ ބޭފުޅުންގެ މިބައްދަލުކުރެއްވުމުގައި މިނިސްޓަރު އިމްރާން ވިދާޅުވީ ތުރުކީ އަކީ މިސާލެއްގެ ގޮތުގައި ދެކޭ ގައުމެއް ކަމަށާއި އަދި އެގައުމުގެ ރައީސް ރަަޖަބް ތޮއްޔިބް އުރުދުޣާން ނަމޫނާއެއްގެ ގޮތުގައި ދެކޭ ލީޑަރެއް ކަމަށެވެ.
މިބައްދަލުކުރެއްވުމުގައި ވަނީ ދީނީ ހަރުކަށި ފިކުރާއި، ޓެރަރިޒަމާއި، ޑްރަގް ޓްރެފިކިން ހުއްޓުވުމާއި، މީހުން ބިނާކުރުމާއި، ކުށްވެރިން އަނބުރާ މުޖުތަމައަށް ނެރުމާ ގުޅޭ ކަންކަމުގައި ތުރުކީގެ ތަޖުރިބާއާއި ފަންނީ އެހީތެރިކަން ހޯދުމާ ގުޅޭގޮތުން މަޝްވަރާކުރައްވާފަ އެވެ.
މިނިސްޓަރު އިމްރާން މިދިޔަ ހޯމަ ދުވަހު ތުރުކީއަށް ފެއްޓެވި ދަތުރުފުޅު ނިންމަވާލެއްވުމަށްފަހު އެނބުރި ރާއްޖެ ވަޑައިގަތުމަށް ހަމަޖެހިފައިވަނީ މިމަހުގެ 30 ވަނަ ދުވަހު އެވެ.
މިނިސްޓަރު އިމްރާންގެ އަރިހުގައި ހޯމް މިނިސްޓްރީގެ ސްޓޭޓް މިނިސްޓްރީގެ ސްޓޭޓް މިނިސްޓަރު އަލީ ނަޒީރާއި، ކޮމިޝަނާ އޮފް ޕޮލިސް މުހައްމަދު ހަމީދުގެ އިތުރުން ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅު ވެސް ބައިވެރިވެވަޑައިގަންނަވަ އެވެ.