އައިކެއަރ އޮޕްޓިކަލް އިން ރާއްޖެއަށް "ވާޗުއަލް ޓްރައި-އޮން" ފީޗާ ތައާރަފްކޮށްފި އެވެ.
މިއީ މި ފީޗާ ރާއްޖެއަށް ތައާރަފްކުރި ފުރަތަމަ ފަހަރެވެ. "ވާޗުއަލް ޓްރައި-އޮން" އަކީ ކެމެރާ ހުންނަ ޑިވައިސްތައް ބޭނުންކޮށްގެން ކަސްޓަމަރުން ބޭނުންވާ ތަކެތި ބަލައިލެވޭ ނުވަތަ "ޓްރައި އޮން" ކުރެވޭ ޓެކްނޮލިޖީ އެކެެވެ.
އައިކެއަރ އިން ބުނީ "ވާޗުއަލް ޓްރައި-އޮން"ގެ ހިދުމަތް ބޭނުންކުރުމަށް މޯބައިލް ފޯނު ނުވަތަ އެނޫންވެސް އެހެން ޑިޖިޓަލް ޑިވައިސްއަކުން އެމީހުންގެ ވެބްސައިޓަށް ވަނުމުން ރިއަލް ޓައިމްގައި ނުވަތަ ސެލްފީއެއް އަޕްލޯޑުކޮށްގެން މި ހިދުމަތް ތަޖުރިބާކުރެވޭނެ ކަމަށެވެ.
މި ހިދުމަތް ބޭނުންކޮށްގެން އަޅާ އައިނުތައް ފެންނާނީ އެ އައިނެއްގެ ސްކޭލްގައި ކަމަށްވެސް އައިކެއަރ އިން ބުނެ އެވެ.
މި ހިދުމަތް އައިކެއާ އިން ތައާރަފްކޮށްފައިވަނީ އެކުންފުނީގެ 19 ވަނަ އަހަރީ ދުވަސް ފާހަގަކުރުމަށް ރޭ ބޭއްވި ހަފްލާގަ އެވެ.
މި ހިދުމަތް ތައާރަފްކުރުން ފާހަގަކުރުމުގެ ގޮތުން އައިކެއާ އިން ވަނީ "ޓެޕް ޓު ޓްރައި"ގެ ނަމުގައި ޕްރޮމޯޝަނެއް ވެސް ފަށާފަ އެވެ. މި ޕްރޮމޯޝަންގެ ދަށުން އެ ކުންފުނީގެ ވެބްސައިޓް މެދުވެރިކޮށް ކުރާ ކޮންމެ ވިޔަފާރިއަކަށް ހިލޭ ހަދިޔާއެއް ލިބޭނެ ކަމަށް އައިކެއަރ އިން ބުންޏެވެ.
މި ޕްރޮމޯޝަން ކުރިއަށްދާނީ މިއަދުން ފެށިގެން އަންނަ މަހުގެ 27 ވަނަ ދުވަހުގެ ނިޔަލަށެވެ.