ނިދީގެ ބަލިތަކަށް ފަރުވާ ދިނުމަށް އައިޖީއެމްއެޗްގައި ހަތަރު ލައްކަ ރުފިޔާ ހަރަދުކޮށްގެން "ސްލީޕް ލެބެއް" ހުޅުވައިފި އެވެ.
ސްލީޕް ލެބަކީ މިީހާ ނިދީގައި ދިމާވާ އުނދަގޫތަކާއި މައްސަލަތަކުގެ ތެރެއިން އަދި ނިދި ހަމަ ނުވުން، ނިދީގައި ހިނގުން، ގުގުރި ދެމުން އަދި އެނޫނަސް ދިމާވާ ބޮޑެތި ބަލިތަކަށް ފަރުވާ ދިނުމާއި ޓެސްޓުތަކަށް ހަދައި ލެބެކެވެ. އެގޮތުން ސަރުކާރުން 405،000 ރުފިޔާ ހަރަދު ކޮށްގެން މިއަދު އައިޖީއެމްއެޗްގައި ހުޅުވީ ލެވަލް ވަން (އެންމެ މަތީ ފަންތީގެ) ސްލީޕް ސްޓަޑީ ލެބެކެވެ.
އައިޖީއެމްއެޗްގެ ފުރަތަމަ ފަނގިފިލާގައި ގާއިމް ކޮށްފައިވާ ސްލީޕް ލެބް ހުޅުވުމުގެ ރަސްމިައްޔާތުގައި ވާހަކަފުޅު ދައްކަވަމުން ލެބާ ބެހޭ ގޮތުން ޑރ. މޫސާ ހަސަން ވިދާޅުވީ ނިދީގެ ބަލި ތަކަކީ އޭގެ ހަގީގަތް މީހުނަށް އެނގިފައިވާ ވަރަށް ވުރެ ނުރައްކާތެރި ބައްޔެއް ކަމަށާއި ސަބަބަކީ އޭގެ ސަބަބުން މީހާގެ ދިރިއުޅުމަށް ބޮޑެތި ގެއްލުން ތަކެއް ދިމާވާތީ ކަމަށެވެ. އެހެން ކަމުން ނިދީގެ ބަލިތަކަށް މީހުން ހޭލުންތެރި ވާން ޖެހޭ ކަމަށާއި އެގޮތުން މިއަދު ހުޅުވުނު ސްލީޕް ލެބަކީ ނިދީގެ ބަލިތައް ދެނެގަނެ އެކަމަށް ފަރުވާ ހޯދުމުގެ ގޮތުން ގާއިމް ކުރި ލެބެއް ކަމަށެވެ.
"މިލެބް އަޅުގަނޑުމެން ހަދާފައި ހުންނާނީ ލެބްގައި ޓެސްޓުތަކަށް ނިދާ މީހާއަށް އެންމެ ފަސޭހަ އަދި އަރާމުކޮށް ނިދޭ ކަހަލަ ގޮތަކަށް. އާމުގޮތެއްގައި ޓެސްޓުތައް ހަދާނީ ރޭގަނޑު ކަމަށްވާތީ ބޭނުމިއްޔާ ނިދހާ ހެދުމުގައި އަދި އެންމެ ފަސޭހައިން ނިދޭ ކަހަލަ ބާލިހެއް ވެސް ގެނެވިދާނެ. މީގެ ބޭނުމަކީ ޓެސްޓުތަށް ފުރިހަމައަށް ގެންދިއުން،" މޫސަ ވިދާޅުވި އެވެ.
އޭނާ ވިދާޅުވީ ސްލީޕް ލެބްގެ ހިދުމަތް ފަށަން ހަމަޖެހިފައިވަނީ މިމަހު ދެވަނަ ހަފްތާގައި ކަމަށާއި ކޮންމެ ފަރާތަކަށް ވެސް ދެދުވަހުގެ މުއްދަތަކަށް ޓެސްޓުތައް ދިގުލާގެން ދާނެތީވެ ހަފްތާއަކު ދެ އެޕޮއިންޓްމަންޓެއް ނަގާނެ ކަމަށެވެ.
ސްލީޕް ސްޓަޑީ ހެދުމުގެ އަގު އަދި ކަނޑައަޅާފައި ނުވީ ނަމަވެސް އިނޑިޔާގެ ބެންގަލޯރުގައި މި ޓެސްޓު ހަދައި ވަރަށް ވުރެއް އަގު ހެޔޮ ކުރަން މަސައްކަތް ކުރާނެ ކަމަށެވެ. ބެންގަލޫރުގައި މިޓެސްޓު ހަދަނީ 3000 ޑޮލަރަށެވެ.