މާލެ ސަރަހައްދުގެ ސަރުކާރު ހޮސްޕިޓަލްތަކުގެ އޮޕަރޭޝަން ތިއޭޓަރުތަކުގެ އަދަދު މި އަހަރު ނިމުމުގެ ކުރިން 12 އަށް އިތުރުކުރުމުގެ މަސައްކަތް ފަށައިފި އެވެ.
ދައުލަތުގެ މީޑިއާގައި ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވި ގޮތުގައި އައިޖީއެމްއެޗް އާއި ދަރުމަވަންތަ ހޮސްޕިޓަލްގައި މިވަގުތު ހިދުމަތް ދެނީ ހަތަރު އޮޕަރޭޝަން ތިއޭޓަރުގަ އެވެ.
އިބްރާހީމް އަބްދުއްރައްޒާގު ވިދާޅުވީ އައިޖީއެމްއެޗްގެ އެނދުގެ އަދަދު އިތުރުވުމާއެކު އޮޕަރޭޝަން ތިއޭޓަރުގެ އަދަދު އަށަކަށް އަރާނެ ކަމަށެވެ.
ހުޅުމާލޭގެ ހޮސްޕިޓަލުގައި އައިސީޔޫއެއް ނެތްކަން ފާހަގަކުރައްވާ އިބްރާހީމް އަބްދުއްރައްޒާގު ވިދާޅުވީ ހުޅުމާލެ ހޮސްޕިޓަލް ތަރައްގީކުރުމުގެ މަޝްރޫއު މިހާރު ކުރިއަށްދާ ކަމަށެވެ.
އެ ގޮތުން އޮޕަރޭޝަން ހަތަރު ތިއޭޓަރު ތަރައްގީކުރުމާއި 14 އެނދުގެ އެންއައިސީޔޫ އަދި 10 އެނދުގެ އައިސީޔޫއެއް ތަރައްގީކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.
އައިޖީއެމްއެޗްގެ އޯޕީޑީއަށް އަހަރަކު 240،000 މީހުން ދައްކާއިރު އިމަޖެންސީ އަދި ޖީޕީ ޑިޕާޓްމަންޓުން އަހަރަކު 150،000 މީހުން ފަރުވާ ހޯދަ އެވެ. މީގެ އިތުރުން 25،500 އޮޕަރޭޝަން ކުރެ އެވެ.