ޕްރޮސެކިއުޓާ ޖެނެރަލް ހުސައިން ޝަމީމް މަގާމުން ވަކިކުރުގެ މައްސަލައިގައި އެމްޑީޕީގެ ޕާލިމެންޓްރީ ގުރޫޕުން ގޮތެއް ނިންމުމަށް އެ މައްސަލަ އެ ގުރޫޕްގެ ބައްދަލުވުމަށް އެޖެންޑާކުރަން ހުށަހަޅައިފި އެވެ.
ޝަމީމް މަގާމުން ވަކިކުރުމުގެ މައްސަލައިގައި އެމްޑީޕީގެ ޕީޖީ ގުރޫޕުން ގޮތެއް ނިންމުމަށް މިމަހުގެ އެއްވަނަ ދުވަހު އޮތް ޕީޖީ ގުރޫޕްގެ ބައްދަލުވުމަށްވެސް މެންބަރަކު ހުށަހެޅުއްވި އެވެ. ނަމަވެސް އެ ދުވަހު އެ މައްސަލަ ހުށަހެޅީ އެ ދުވަހުގެ ބައްދަލުވުމުގެ އެޖެންޑާގައިވާ އެހެނިހެން އައިޓަމްގެ ތެރޭގައި ކަމަށްވެފައި އެ މައްސަލަ އަކީ ބޮޑު މައްސަލައެއް ކަމަށްވާތީ ޝަމީމް މަގާމުން ވަކިކުރުމުގެ މައްސަލަ ވަކި މައްސަލައެއްގެ ގޮތުގައި އެޖެންޑާ ކުރުމަށް ހުށަހެޅުމަށް ޕީޖީ ލީޑަރު މުހައްމަދު އަސްލަމް އެންގެވި އެވެ.
އަސްލަމް އެގޮތަށް އެންގެވީ އެ ދުވަހުގެ ބައްދަލުވުމުގައި އެމްޑީޕީގެ ޕާލިމެންޓްރީ ގުރޫޕްގައި ހިމެނޭ 65 މެންބަރުންގެ ތެރެއިން 35 މެންބަރުން ބައިވެރިވުމަކީ މަދު އަދަދެއް ކަމަށް ފެނިވަޑައިގަންނަވާތީ ވީހާވެސް ގިނަ މެންބަރުން ތިއްބަވާ ވަގުތެއްގައި އެކަމުގައި ފުޅާދާއިރާއެއްގައި މަޝްވަރާކޮށް ގޮތެއް ނިންމެވުމަށް ކަމަށް އަސްލަމް ކުރިން އަވަސް އަށް ވިދާޅުވެފައިވެ އެވެ.
"އެހެންވެ އަޅުގަނޑު އެދުނީ އެ މައްސަލަ ޕީޖީ ގުރޫޕްގެ ރަސްމީ ބައްދަލުވުމަކަށް އެޖެންޑާ ކުރަން ވަކި މައްސަލައެއްގެ ގޮތުގައި ފޮނުވަން. އޭރުން ޕީޖީ ގުރޫޕްގެ ހުރިހާ މެންބަރުންނަށް ވެސް އެ މައްސަލައާ މެދު ދުރާލާ ވިސްނުމަށްފަހު ގޮތެއް ނިންމަން ފަސޭހަވާނެ،" އަސްލަމް ވިދާޅުވި އެވެ.
އޭނާ ވިދާޅުވީ ޕީޖީ ޝަމީމުގެ ބައެއް ކަންކަމާ މެދު އެމްޑީޕީގެ މެންބަރުން ކަންބޮޑުވާ ކަމަށެވެ. އަދި މިއަދު އެ މައްސަލައިގައި ޕީޖީ ގުރޫޕުން ގޮތެއް ނުނިންމުމުން ބައެއް ބޭފުޅުން ހިތްހަމަޖެހިވަޑައިނުގެންނެވި ކަމުގައިވެސް ވިދާޅުވި އެވެ.
އަސްލަމް ވިދާޅުވީ އެއްވެސް ބޭފުޅަކު މަގާމުން ވަކިކުރަން ހުށަހަޅާނަމަ އެ މައްސަލައެއް ވަކި މައްސަލައެއްގެ ގޮތުގައި ޕީޖީ ގުރޫޕަށް ހުށަހަޅައިގެން މެންބަރުންގެ މެދުގައި މަޝްވަރާކޮށްގެން ގޮތްތަކެއް ނިންމައިގެން ނޫން ގޮތަކަށް އެއްވެސް މައްސަލައެއް ކުރިއަށް ނުގެންދަން ޕީޖީ ގުރޫޕުން ކުރިން ނިންމާފައިވާނެ ކަމަށެވެ. ޕީޖީ ޝަމީމުގެ މައްސަލައިގައި ވެސް އަމަލުކުރައްވަން ބޭނުންވަނީ އެ އުސޫލުން ކަމުގައިވެސް ވިދާޅުވި އެވެ.
ޕީޖީ ޝަމީމާ މެދު އެމްޑީޕީގެ މެންބަރުންގެ ހިތްހަމަނުޖެހުން ހުރި ވަކި މައްސަލަތަކެއް އެނގިފައެއް ނުވެ އެވެ. އެކަމަކު އެމްއެމްއެމްޕީއާރްސީގެ ހިޔާނާތުގެ މައްސަލަތަކާއި ވެންޓިލޭޓަރުތަކުގެ ހިޔާނާތުގެ މައްސަލައިގެ އިތުރުން މަސްތުވާތަކެތީގެ ބޮޑުން ދޫވާ މައްސަލައިގައި ޕީޖީގެ ނިންމުންތައް ހުރި ގޮތުން އެމްޑީޕީގެ ޕާލިމެންޓްރީ ގުރޫޕްގެ ބައެއް މެންބަރުން މީގެ ކުރިން ޕީޖީއަށް ފާޑު ވިދާޅުވެފައިވެ އެވެ.
ޕީޖީ ޝަމީމު މީގެ ކުރިން ވިދާޅުވީ އެ އޮފީހަކީ ތަހުގީގީ އިދާރާތަކުން ފޮނުވާ ހުރިހާ މައްސަލައެއް ކޯޓަށް ހުށަހަޅައިދޭން ގާއިމުކޮށްފައިވާ "ޕޯސްޓް އޮފީހެއް" ނޫން ކަމަށެވެ. ކޯޓަށް ހުށަހަޅާނީ ސާބިތު ކުރެވޭ ގޮތަށް ހެއްކާއި ގަރީނާ ހުރި މައްސަލަތައް ކަމުގައިވެސް ވިދާޅުވެފައިވެ އެވެ.
ޕްރޮސެކިއުޓާ ޖެނަރަލްގެ މަގާމަށް ޝަމީމް އައްޔަންކުރެއްވީ މަޖިލީހުގެ 74 މެމްބަރުންގެ އިއްތިފާގުން އޭނާ އެ މަގާމަށް އައްޔަންކުރަން ރުހުން ދިނުމުންނެވެ.