ބައިނަލްއަގްވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ހަރަކާތެެއް ކުރިއަށް ދަނިކޮށް އެތަނަށް ވަދެ ހަމަނުޖެހުން ހިންގާ މަންޒަރުގެ ފޮޓޯ އާއި ވީޑިއޯ ހުރިނަމަ ހިއްސާ ކޮށް ދިނުމަށް ދިވެހި ފުލުހުންގެ ހިދުމަތުން އެދިއްޖެ އެވެ.
ގަލޮޅު ދަނޑުގައި މިއަދުގެ ހަރަކާތް ފެށުނީ ހެނދުނު 6:30 ހާއިރު އެވެ. ހަރަކާތް ފެށިތާ ކުޑައިރުކޮޅެއްގެ ތެރޭގައި އެ ހަރަކާތާ ދެކޮޅަށް އިހުތިޖާޖު ކުރި މީހުން ވަނީ ދަނޑަށް ވަދެގެންފައެވެ. އަދި އެތަނުގައި ތިބި މީހުން ދަނޑުން ނިކުމެގެން ދިއުމަށް ދިޔައީ ގޮވަމުންނެވެ.
މަންޒަރު ދުށް މީހުން ބުނާ ގޮތުން ބައެއް މީހުން ވަނީ ޔޯގާ ދުވަސް ފާހަގަ ކުރަން އެއްވެ ތިބި ގައުމުތަކުގެ ޑިޕްލޮމޭޓުންނަށް ހަމަލާވެސް ދީފައެވެ. ހުދު ދިދަތައް ހިފައިގެން ތިބި މީހުން ހަަމަނުޖެހުން ހިންގާފައިވާ ކަަމަށްވެސް ބުނެއެވެ. އެފަދަ ބައެއް މަންޒަރުތައް އާންމުވެފައިވާ ވީޑިއޯތަކުން ފެނެއެވެ.
ދިވެހި ފުލުހުންގެ ހިދުމަތުން ދެންމެ ބުނީ މިއަދު ހެނދުނު ނެޝަނަލް ސްޓޭޑިއަމްގައި ހިނގި ހާދިސާއާ ގުޅޭ މައުލޫމާތާއި ފޮޓޯ އަދި ވީޑިއޯ https://police.gov.mv/helpus/casetip އަށް ޒިޔާރަތްކޮށް ހިއްސާ ކުރުމަށް އެދޭ ކަަމަށެވެ.
"މި ޕޯޓަލްއަށް މައުލޫމާތާއި ފޮޓޯ އަދި ވީޑިއޯ ހިއްސާކުރާ ފަރާތްތަކުގެ ސިއްރުކަން ހިފަހައްޓާނެކަމުގެ ޔަގީންކަން އަރުވަމެވެ،" ފުލުހުން ބުންޏެވެ.
ގަލޮޅު ދަނޑަށް ވަދެ ހަމަނުޖެހުން ހިންގި މީހުންގެ ތެރެއިން ހަ މީހަކު ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުންގެ ހިދުމަތުން ނެރުނު ބަޔާނެއްގައި ބުނެފައިވަނީ މިއަދުގެ ހާދިސާ ވަރަށް ސީރިއަސް މައްސަލައެއްގެ ގޮތުގައި ފުލުހުންގެ ސީރިއަސް އެންޑް އޯގަނައިޒް ކްރައިމް ޑިޕާޓްމަންޓުން ތަހުގީގު ކުރަމުންދާ ކަމަށެވެ.
އަދި މި އަމަލު ހިންގުމުގައި ބައިވެރިވި މީހުންގެ މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ކުރަން ޖެހޭ މަސައްކަތް ފުލުހުންގެ ހުރިހާ ގުނަންތަކުން ގުޅިގެން ކުރިއަށް ގެންދާ ކަމަށެވެ. ފުލުހުން ބުނީ މިހާތަނަށް ލިބިފައިވާ މައުލޫމާތުން ހަމަނުޖެހުން ހިންގި މީހުން ބޭނުން ކުރި ބައެއް އާލަތްތައް ނެރެފައިވަނީ އިދިކޮޅު ޕާޓީގެ އޮފީހުން ކަމަަށް އެނގިފައިވާ ކަމަަށެވެ.
ފުލުހުންގެ ބަޔާނުގައި މިއަދު ހާދިސާ ހިނގަން މެދުވެރިވީ ސަބަބު ބަލާ ފުލުހުންގެ ހިދުމަތުން ރެސްޕޮންޑް ކުރި ގޮތުގެ އިންޓަނަލް ރިވިއުއެއް ކުރާނެ ކަމަަށް ބުންޏެވެ.