ހުޅުމާލޭގެ އާބާދީއަކީ 92،000 މީހުން: އެޗްޑީސީ

ހުޅުމާލޭގައި މިވަގުތު 92،000 މީހުން ދިރިއުޅެމުންދާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކޮށްފި އެވެ.

މިމައުލޫމާތު ހާމަކޮށްފައިވަނީ އިއްޔެ ފާހަގަކުރީ ބައިނަލްއަގްވާމީ އާބާދީ ދުވަހާ ގުޅިގެން އެޗްޑީސީ އިން އާންމުކުރި ތަފާސްހިސާބުތަކެއްގަ އެވެ.

އެޗްޑީސީ އިން ބުނީ ހުޅުމާލޭގައި މިވަގުތު 92،000 މީހުންގެ އާބާދީއެއް އޮތް ނަމަވެސް އެ ކުންފުނީގެ އަމާޒަކީ ހުޅުމާލޭގެ ޖުމްލަ އާމްދަނީ 230،000 އަށް އިތުރުކުރުން ކަމަށެވެ.

އެޗްޑީސީން ނިންމާފައިވަނީ ހުޅުމާލޭގެ ފުރަތަމަ ފިޔަވަހީގައި 87،000 އަދި ދެވަނަ ފިޔަވަހީގައި 143،000 މީހުން އާބާދުކުރާށެވެ.

އާބާދީ އިތުރުކޮށް ވަޒީފާތައް އިތުރުކުރުމަށް ވެސް އެޗްޑީސީން މަސައްކަތްތަކެއް ކުރަމުންދާ ކަމަށް އެ ކުންފުނިން ބުނެ އެވެ. އެގޮތުން އަމާޒަކީ 100،039 ވަޒީފާ އުފެއްދުން ކަމުގައި ބުނެފައިވެ އެވެ.

އެޗްޑީސީ އިން ބުނީ ހުޅުމާލެ އެއްކޮށް ތަރައްގީކޮށް ނިމޭއިރު 36 ސްކޫލް އާއި 20 މިސްކިތާއި 30 އިންސްޓިޓިއުޝަނަލް އިމާރާތް ހުޅުމާލޭގައި ހުންނާނެ ކަމަށެވެ.

ހުޅުމާލޭގެ އާބާދީ ކުއްލިއަކަށް އިތުރުވީ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެވަނަ ފިޔަވަހީގެ ބިން ހިއްކާ އެތަނުގައި 7000 ފްލެޓް އަޅައި އެ ފްލެޓްތަކަށް މީހުން ބަދަލުވުމާ އެކު އެވެ.

މިސަރުކާރުން ވެސް ގެންދަނީ ހުޅުމާލޭގައި 4،000 ހައުސިން ޔުނިޓްގެ މަސައްކަތް ކުރަމުންނެވެ. އަދި ހުޅުމާލެއިން 1،000 ގޯތި ދޫކުރުމަށްވެސް ސަރުކާރުން ދަނީ ތައްޔާރުވަމުންނެވެ.