އެއް ރަށުން އަނެއް ރަށަށް މީހުން ބަދަލުވާއިރު އާއިލާތަކަށް ގޯއްޗާއެކު ދޭ ގޭގެ އިތުރުން ދޭ ރަމްޒީ ފައިސާގެ އަދަދު 60،000ރ. އަށް ބޮޑުކޮށްފި އެވެ.
ހައުސިން މިނިސްޓަރު ޑރ. މުހައްމަދު މުއިއްޒު ވިދާުވީ މީހުން ބަދަލުވާއިރު ބަލަނީ ބަދަލުވާ ރަށެއްގެ ހާލަތަށް ކަމަށާއި ހުޅުމާލެއަށް ބަދަލުވާނަމަ ދޭނީ ފްލެޓް ކަމަށެވެ. އެހެން ރަށްރަށުގައި ނަމަ 3000 އަކަފޫޓް ގޯއްޗެއްގައި ގެއެއް އަޅައިދީފައި ދޭނީ ތަޅުދަނޑި ކަމަށެވެ.
"ބަދަލުވާއިރު އާއިލާތަކަށް މިހާތަނަށް ދެމުން އައީ ރަމްޒީ ފައިސާއެއްގެ ގޮތުގައި 50،000ރ. ނަމަވެސް މިހާރު އަޅުގަނޑުމެން ދޭން މި ފެށީ 60،000ރ. ދެން މީގެ ފަހުން އެ ފައިސާގެ އަދަދު މި ބަދަލުވީ." މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މިހާރު މީހުން ބަދަލުވަމުންދާ ލ. ގާދީގެ ރައްޔިތުންގެ އެ އަތޮޅު ފޮނަދޫއަށް ބަދަލުވަމުންދާއިރު އާއިލާއަކަށް އެއްލައްކަ ރުފިޔާ އަށް އެދުނު ކަމަށާއި ނަމަވެސް ބަޖެޓް ކަންކަމަށް ބަލައި ނިންމުނީ 60،000ރ. ދޭން ކަމަށެވެ. އަދި މިހާރު ނިންމުނު އަދަދަކީ ކުރިން ދެމުން އައި އަދަށްވުރެ ބޮޑު އެއްޗަކަށްވުމުން ހިތްހަމަޖެހުން އެބަޮއޮތް ކަމަށެވެ.
ރަށްރަށުން މީހުން ބަދަލުވުމުގައި މިހާރު ވެސް ބައެއް ރަށްތަކުން ހުށަހެޅުން އައިސްފައިވާ ކަމަށާއި އޭގެ ތެރޭގައި 90 ޕަސެންޓް މީހުން ބަދަލުވާން އެދިފައިވާ ރަށްރަށް އެބަހުރި ކަމަށް ވެސް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ އޭގެ ތެރެއިން ގިނަ ރަށްރަށަކީ ހުޅުމާލެއަށް ބަދަލުވާން ބޭނުންވާ ރަށްރަށް ކަމަށެވެ.
ލ. ގާދޫ: މި އަހަރު ސްކޫލްތައް ފަށާއިރު މީހުން ފޮނަދޫއަށް ބަދަލުވެ ނިމެނޭ