އެސްޓީއޯއިން ވިއްކަމުން ގެންދިޔަ، "އަލްމުދިޝް" ހިކި ކިރުން ފައިދާ ވަމުން ދަނިކޮށް އެ ބާވަތް ދޫކޮށްލާ، "ނޫފަހި" ކިޔާ އަމިއްލަ ބްރޭންޑެއް ތައާރަފް ކުރުމުގައި ސުވާލުތަކެއް ހުރި ކަމަށް، އެންޓި ކޮރަޕްޝަނުން އެސްޓީއޯއާ ގުޅޭ ގޮތުން އެކުލަވާލި ރިޕޯޓެއްގައި ބުނެފި އެވެ.
އެސްޓީއޯގެ މާކެޓިން ހަރަދުތަކާ ގުޅޭ ގޮތުން ކުރެވުނު ކޮރަޕްޝަންގެ ތުހުމަތުތަކާ ގުޅިގެން އެ ކޮމިޝަނުން އެކުލަވާލި ރިޕޯޓެއްގައި ބުނެފައި ވަނީ 2013 ވަނަ އަހަރާއި މިދިޔަ އަހަރުގެ ތެރޭގައި އަލްމުދިޝް ކިރުގެ ޕްރޮމޯޝަނަށް ހަރަދު ކުރީ 85،131.13ރ. ކަމަށެވެ. އަދި އެ ބާވަތްތަކުގެ ކިރުގެ ސޭލްސުން އާމްދަނީގެ ގޮތުގައި އެސްޓީއޯއަށް މަހަކު ތިން މިލިއަން ރުފިޔާ ލިބެމުން އައި ކަމަށް ވެސް ރިޕޯޓްގައިވެ އެވެ. އަދި މަދު އެއްޗެއް ޕްރޮމޯޝަނަށް ހަރަދުކޮށްގެން އެސްޓީއޯއަށް ރަނގަޅު މާކެޓެއް ލިބިފައި އޮތް ޕްރޮޑަކްޓެއް ދޫކޮށްލީ ކޮން ސަބަބުތަކަކާ ހުރެ ކަމެއް އެނގޭނެ ލިޔެކިޔުންތަކެއް ތަހުގީގަށް ލިބިފައި ނުވާ ކަމަށް ވެސް އޭސީސީން ބުނެފައިވެ އެވެ. އަދި ނޫފަހި ބްރޭންޑުން އެސްޓީއޯއަށް ލިބުނު އާމްދަނީއެއް ވެސް އެ ކުންފުނިން އޭސީސީއަށް ފޯރުކޮށް ދީފައެއް ވެސް ނުވެ އެވެ.
ރިޕޯޓްގައި ހުރި ހިސާބުތަކަށް ބަލާއިރު "ނޫފަހި" ބްރޭންޑް އިޝްތިހާރު ކުރުމަށް ޖުމްލަ 5.7 މިލިއަން ރުފިޔާ އަހަރަކު ހަރަދު ކުރާނެ އެވެ. އެގޮތުން ރާއްޖޭގެ މީޑިއާތަކާ އެކު އެއް އަހަރު ދުވަހުގެ ކޮންޓްރެކްޓްތަކެއްގައި ވަނީ ސޮއިކޮށްފަ އެވެ. އެގޮތުން އެންމެ ބޮޑު އެއްޗެއް ހަރަދު ކުރާ ޗެނަލް 13 އާއި އެމްބީސީއަށް މިލިއަނަކަށް ވުރެ ގިނަ ރުފިޔާ އެސްޓީއޯއިން އަހަރަކު ހަރަދު ކުރެ އެވެ. އެހާ ބޮޑެތި ހަރަދުތަކެއް ނޫފަހި ސްޕޮންސަކުރުމަށް ހަރަދު ކުރި ނަމަވެސް އެ ބްރޭންޑް ވިއްކައިގެން ލިބޭ އާމްދަނީއެއް ވެސް އަދި ފައިދާއެއް ވެސް އެނގޭނެ ލިޔުންތަކެއް އޭސީސީއަށް އެސްޓީއޯއިން ފޯރުކޮށް ދީފައި ނުވާ ކަމަށް ވެސް ރިޕޯޓްގައިވެ އެވެ. އެ މައްސަލަ ތަހުގީގު ކުރުމަށް އެސްޓީއޯއިން އެއްބާރުލުން ނުދިން ކަމަށް ވެސް އޭސީސީން ފާހަގަ ކޮށްފައިވެ އެވެ.
"ނޫފަހި ބްރޭންޑް ޕްރޮމޯޓް ކުރުމުގެ ނަމުގައި ތަފާތު އެތަކެއް ހަރަދުތަކެއް އެސްޓީއޯގެ ބަޖެޓުން ކޮށްފައި ވަނީ ދައުލަތައް އެއިން ފައިދާއެއް ލިބެން އޮތް ކަމެއްގައި ބޮޑެތި ގެއްލުންތަކެއް ވާނެ ފަދަ ގޮތެއްގައި ކަމަށް ބެލެވެ އެވެ،" ރިޕޯޓްގައިވެ އެވެ.
އެސްޓީއޯގެ ނޫފަހި ބްރޭންޑަކީ އެ ކުންފުނިން އަމިއްލަ ޕްރޮޑަކްޓްތަކެއް ބާޒާރަށް ނެރުމަށް ހިންގި މަސައްކަތެކެވެ. ނޫފަހި ބްރޭންޑްގައި ހިކި ކިރާއި ގެރި ކިރާއި ދޮންނަކުޑި އަދި ކައްކާ ތެޔޮ ހިމެނެ އެވެ.