ކަނޑައިގެން ގޮސްފައިވާ ފަސް ކަނދުފައްޗެއް އެޅުމުގެ މަސައްކަތް ފިޝަރީޒް މިނިސްޓްރީން ފަށައިފި އެވެ.
ފިޝަރީޒް މިނިސްޓްރީން ބުނީ ރާއްޖޭގެ އެކި ސަރަހައްދުތަކުން އަށް ކަނދުފައްޗެއް ކެނޑިފައިވާތީ އެ މައުލޫމާތު ކައުންސިލްތަކުން ހިއްސާކޮށްފައިވާ ކަމަށެވެ.
ކަނޑައިގެން ގޮސްފައިވާ ހއ. ފިއްލަދޫ، ށ. ކޮމަންޑޫ، ޅ. ފާދޫ، ކ. ކާށިދޫ، ކ. މާފުށި، އއ. އުކުޅަސް އަދި ތ. ހިރިލަންދޫ ސަރަަހައްދުގައި އަޅާފައިވާ ކަނދުފަތިތަކެވެ. ކޮމަންޑޫ ކައިރީގައި ދެ ކަނދުފަތި އަޅާފައިވެ އެވެ.
ކަނޑައިގެން ގޮސްފައިވާ ކަނދުފަތިތަކުގެ ތެރެއިން ކާށިދޫއާއި އުކުޅަހުގެ ބޭރުގައިވާ ކަނދުފަތި ފިޔަވާ އެހެން ކަނދުފަތިތައް އެޅުމުގެ މަސައްކަތް މިނިސްޓްރީން މިހާރު ވަނީ ފަށާފަ އެވެ.
ބާކީ ހުރި ކަނދުފަތިތައް އެޅުމަށް މިނިސްޓްރީގެ ޓެކްނިކަލް ޓީމުން ކުރަންޖެހޭ މަސައްކަތްތައް ފެށުމަށް މިހާރު ތައްޔާރުވަމުންދާ ކަމަށްވެސް މިނިސްޓްރީން މައުލޫމާތު ދީފައިވެ އެވެ.
ފިޝަރީޒް މިނިސްޓްރީން ބުނީ ރާއްޖޭގައި މަސްވެރިންނަށް ގާއިމުކޮށްދީފައިވާ ކަނދުފަތީގެ ވިއުގައިގާ ހިމެނޭ ބައެއް ކަނދުފަތި ކަނޑައިގެންދާ އެއް ސަބަބަކީ އުޅަނދުތަކުން ކަނދުފަތީގައި ވާ އައްސައި ބަނދެގެން ތިބޭތީ ކަމަށެވެ. އެހެންވެ އެގޮތަށް އަމަލުނުކުރުމަށް މިނިސްޓްރީން އިލްތިމާސް ކުރެ އެވެ.
"މިފަދަ ކަންކަން ކުރާ ފަރާތްތައް އެނގޭނަމަ އެކަން ކުރާ ފަރާތްތަކުގެ ފުރިހަމަ މައުލޫމާތު މި މިނިސްޓްރީއަށް އަންގަވައިދެއްވުމަކީ މި މިނިސްޓްރީން ވަރަށް ބޮޑަށް އެދޭ ކަމެކެވެ." ފިޝަރީޒް މިނިސްޓްރީން ބުނެފައިވެ އެވެ.