ބޮލީވުޑްގެ މަޝްހޫރު ފިލްމު ޑައިރެކްޓަރު ކަރަން ޖޯހަރު ހަ އަހަރު ދުވަހުގެ މެދުކެނޑުމަކަށްފަހު އަނެއްކާވެސް ފިލްމެއް ޑައިރެކްޓް ކުރުމަށް އަނބުރާ ތައްޔާރުވެއްޖެ އެވެ.
ކަރަން ޖޯހަރުގެ މިފަހަރު ޕްރޮޖެކްޓަކީ ރަންވީރް ސިންގް އާއި އާލިއާ ބާޓް ކުޅޭ "ރޮކީ އޯރް ރާނީ ކީ ޕްރޭމް ކަހަނީ" އެވެ.
މި ފިލްމްގައި ކުރީގެ ތަރިން ކަމުގައިވާ ޖަޔާ ބަޗަން، ދަރްމެންދްރާ އަދި ޝަބާނާ އަޒްމީ ވެސް މުހިއްމު ރޯލްތައް އަދާކުރާނެ އެވެ.
"6 އަހަރުގެ ބްރޭކަކަށްފަހު ފިލްމް ޑައިރެކްޓް މި ކުރަނީ. މި ފިލްމް ރިލީޒް ކުރާނީ 2023ގެ މެދުތެރޭގައި. އެއް ލަވަ ފިޔަވައި ފިލްމްގެ ޝޫޓިން ވަނީ ނިމިފައި. އޯޑިއަންސަށް ފިލްމު ދައްކާލުމަށް މިހާރު މިހިރީ ކެތްމަދުވެފައި. ރަންވީރް އަދި އާލިއާ ވަރަށް މޮޅު އަދި ދެމީހުންގެ ކެމިސްޓްރީވެސް ވަރަށް ވަރުގަދަ..." ކަރަން ބުންޏެވެ.
މީގެ އިތުރުން ފިލްމީ ދާއިރާގައި ދުވަސްވީ ވަރަށް މޮޅު ތަރިންތަކަކާ އެކު މަސައްކަތް ކުރަން ފުރުސަތު ލިބިމުން އެކަމަށް އުފާވާ ކަމަށްވެސް ކަރަން ބުނެފައިވެ އެވެ.
ކަރަން ޖޯހަރު އެންމެ ފަހުން ޑައިރެކްޓްކުރި ފިލްމަކީ ރަންބީރް ކަޕޫރް، އަނުޝްކާ ޝަރްމާ އަދި އައިޝްވަރިޔާ ބަޗަން މުހިއްމު ބައިތައް ކުޅެފައިވާ ކާމިޔާބު ފިލްމް 'އޭ ދިލް ހޭ މުޝްކިލް" އެވެ.