ތިމާއަށް މީހަކު ކަމެއް ކޮށްދިނުމުން އެކަމެއްގެ އަގުވަޒަން ކުރުމުގެ އެންމެ އާންމުކޮށް ކޮށްލާ އެއްކަމަކީ "ޝުކުރިއްޔާ" އޭ ބުނެލުމެވެ.
ޝުކުރިއްޔާ އަކީ އާދައިގެ އިބާރާތެއް ނޫނެވެ. އެއީ އެންމެ ނުފޫޒު ގަދަ ލަފުޒު ތެރޭގައި ހިމެނޭ ބަހެކެވެ. އެކަން އަންގައިދޭ އެއް ކަމަކީ ކޮންމެ އަހަރެންގެ ޖެނުއަރީ 11 ވަނަ ދުވަސް "ތެންކިއޫ ޑޭ" ނުވަތަ ޝުކުރުގެ ދުވަހުގެ ގޮތުގައި ފާހަގަކުރުމަށް އދ.ގެ އާންމު މަޖިލީހުން ފާސްކޮށްފައިވާތީ އެވެ.
މިދުވަސް ފާހަގަކުރަނީ ހަމައެކަނި ޝުކުރުގެ މުހިއްމުކަމާއި މެދު ވިސްނާލުމަކަށް ނޫނެވެ. ޝުކުރު އަދާކުރަން ހަދާންކޮށްދިނުމަކީ ވެސް މިފަދަ ދުވަހެއް ފާހަގަކުރުމުގެ ބޭނުމެކެވެ.
އާންމުކޮށް ކޮންމެ ކަމެއްގައިވެސް އަހަރެމެން އެންމެ ބޭނުންވަނީ މީހުންގެ ލޯތްބާއި ތައުރީފް ލިބުމެވެ. އެހެން މީހުން ތިމާގެ އަގުވަޒަންކޮށް ތިމާކުރާ މަސައްކަތްތަކަށް ތައުރީފްގެ ބަސް ބުނުމަކީ އަހަރެމެންގެ ތެރެއިން ގިނަ މީހުން އެދޭ ކަމެކެވެ.
އެގޮތަށް ކަންކަން ހަމަޖެހިގެންދާނީ ތިމާވެސް ޝުކުރިއްޔާއޭ ބުނެލުމުންނެވެ. އެކަމަކު ހަމައެކަނި ޝުކުރިއްޔާއޭ ބުނެ ފުއްދާނުލާށެވެ. އެހެން ބުނެލާ ޝުކުރަކަށް މާބޮޑު ސަމާލުކަމެއް މީހުން ނުދޭނެ އެވެ.
ޝުރިއްޔާއޭ ބުނެލާއިރު ޝުކުރުވެރިވާ ސަބަބު ވެސް ބުނެދޭށެވެ. އާންމު ގޮތެއްގައި އިދާރާތަކުގެ ރިސެޕްޝަނުން ހިދުމަތެއް ހޯދުމަށްފަހު ހިދުމަތްދޭ މުވައްޒަފަށް ހަމައެކަނި ޝުކުރިއްޔާއޭ ބުނެފައި އެބުރިދާ މީހުން ވަރަށް ގިނަ އެވެ. އެހެންކަމުން ޝުކުރިއްޔާއޭ އެކަނި ބުނެލުމުގެ ބަދަލުގައި އޭނާގެ ކިބައިގައި ހުރި ގާބިލްކަމާއި ހުނަރުތައް ފާހަގަކޮށް އެކަމަށް ޝުކުރިއްޔާއޭ ބުނެފިނަމަ އެ ޝުކުރު ލިބިގެންދާ މީހަކަށް އިހުސާސް ކުރަން ނޭގޭ ފަދަ އުފަލެއް ލިބިގެންދާނެ އެވެ. އަދި ޝުކުރު ރައްދުވާ ފަރާތަށް އޭނާގެ މުހިއްމުކަން އިހްސާސްވެސް ކުރެވޭނެ އެވެ.
ޓެކްސީއަކުން ފައިބަމުން ޑްރައިވަރާ މުހާތަބްކޮށް ހަމައެކަނި ޝުކުރިއްޔާއޭ ބުނުގެ ބަދަލުގައި އެދަތުރުގައި އޭނާ އާއި އެއްކޮށް ހޭދަކޮށްލި ވަގުތު ކޮޅަށް ޝުކުރިއްޔާ ބުނެލާށެވެ.
އެއްވެސް ކަމަކީ ކުޑަކަމެއްގެ ގޮތުގައި ނުދެކޭށެވެ. އެހެން މީހުން ކުރާ ކަންކަން ބަލައިގަންނާށެވެ. ކޮންމެ މީހަކީވެސް މުހިއްމު މީހެއް ކަމުގައި ދެކޭށެވެ. މީހުންނަށް އޯގާތެރިވާށެވެ. މީހުން ކުރާ މަސައްކަތް ބަލައިގަނެ އަގުވަޒަން ކުރާށެވެ. މިލިޔުން ކިޔާލުމަށް ހޭދަކުރި ކުޑަ ވަގުތުކޮޅަށްވެސް ވަރަށް ބޮޑަށް ޝުކުރުވެރިވަމެވެ.