ރަނގަޅު ރައްޓެހިން ހިޔާރު ކުރުމަށް އަބަދުވެސް އިސްކަންދޭށެވެ. ސަބަބަކީ އެމީހުންނަކީ އަހަރަމެންގެ ދިރިއުޅުމަށް ނުފޫޒު ފޯރުވާނެ ބަޔަކަށް ވުމެވެ.
ގިނަ ރައްޓެހިންނަކީ އަހަރެމެންނަށް ހުރިހާ ގޮތަކުން ވެސް އެހީތެރިވާނެ ބައެކެވެ. ރައްޓެހިންގެ ސަބަބުން ހިތްހަމަޖެހުމާއި އުފާވެރިކަން ލިބިދެ އެވެ. އެކަނި ވެރިވެލާ ވަގުތަކުގައި ރައްޓެހިން އެކަނިވެރިކަން ފިލުވައިދޭނެ އެވެ.
އެހެންނަމަވެސް އަހަރެމެންގެ ރަހުމަތްތެރިންގެ ތެރެއިން އެންމެ ގިނަ ވަގުތު ހޭދަކުރެވޭ ފަސް ރައްޓެހިން މަތިން ވަކިން ބޮޑަށް ހަނދާން ކޮށްލާށެވެ.
އެމީހުންނަކީ ކޮންކޮން މިޒާޖެއްގެ ބައެއްކަން ވިސްނާލާށެވެ. ދެން އަމިއްލަ ނަފުސާ ސުވާލު ކޮށްލާށެވެ. އަހަރަމެންގެ ކުދިން ތިބި ނަމަ ނޫނީ އަހަރެމެންނަށް ކުއްޖަކު ލިބިއްޖެނަމަ، އެކުދިން ބޮޑެތިވުމުން އެ ރަހުމަތްތެރިންގެ ތެރެއިން މީހަކަށް އަހަރެންގެ ކުއްޖަކު ވާން އެދެންތޯ އެވެ.
ޖަވާބު ގައި "ނޫނެކޭ" ބުނާ ނަމަ ގާތްކޮށްގެން ތިޔަ ގެންގުޅޭ އެކުވެރިން ދޫކޮށްލާށެވެ. ތިޔަ އުޅެވެނީ އަދި މާރަނގަޅު ރައްޓެހިންތަކަކާ އެކީގައެއް ނޫނެވެ.
އާރަށްޓެހިން ހޯދާށެވެ. އަދި އެމީހުންނާ އެކު އުޅުމަށް "އާނއެކޭ" ބުނެވޭނަމަ ތިޔަ އުޅެވެނީ ވަރަށް ރަނގަޅު އެކުވެރިންތަކަކާ އެކުގަ އެވެ.
ރަނގަޅު އެކުވެރިންނަކީ އެމީހުންނާ އެކުގައި ކުރިއަށްދާއިރު ހެއްދެވި ފަރާތް ހަމްދުކޮށް އަދި އީމާންކަން އިތުރުކޮށްދޭ މީހުންނެވެ. އެމީހުން ދައްކާ ވާހަކަތަކުން ތިމާގެ އިލްމު އިތުރުވެގެންދާ މީހުންނެވެ. އަދި އެމީހުންގެ އަމަލުތައް ފެނުމުން އާހިރަތް މަތިން ހަނދާން ކޮށްދޭ މީހުންނެވެ.
ދެ ރަހްމަތްތެރިޔަކު ދޯންޏެއްގައި. ރަނގަޅު ރަހްމަތްތެރިން އިހްތިޔާރު ކުރުން މުހިއްމު -- ފޮޓޯ: އަވަސް