ދިރިއުޅުމުގައި ކާމިޔާބާއި ނާކާމިޔާބުގެ ވަގުތުތަކާ ކުރިމަތިލާންޖެހޭނެ އެވެ. މިކަން އަހަރުމެން އެންމެން ވެސް ތަޖުރިބާ ކުރެ އެވެ.
ނާކާމިޔާބީ މާނަކުރެވެނީ ކަމެއްގައި ބަލިވުން ނުވަތަ އުއްމީދު ކުރާ ކަމެއް ހާސިލް ނުވުމަށެވެ. އަހަރެމެންގެ ތެރެއިން ގިނަ ބަޔަކު ކަންކަމާ ކުރިމަތިލަނީ އެއްވެސް ކަމެއްގައި ނާކާމިޔާބު ވާނެ ކަމަށް ބަލައިގެނެއް ނޫނެވެ. އަދި އަހަރެމެން މީނާކާމިޔާބު ބައެކޭ ބުނަން އެއްވެސް ބަޔަކު ބޭނުމެއް ނުވާނެ އެވެ.
އެކަމަކު އަބަދު ކާމިޔާބު ވާނެ ކަމަށް ދެކިގެން ކަންކަމާ ކުރިމަތި ލުމަކީ ހެދޭ ބޮޑު ގޯހެކެވެ. ނާކާމިޔާބީ އާއި އެކު ތަފާތު ޖަޒުބާތު ތަކެއް ކުރިމަތިވެ އެވެ. ހިތާމަތަކާއި، ހާސްކަމާއި، ކަންބޮޑުވުމާއި، ރުޅިވެރިކަމާއި ލަދުވެތިކަން ފާހަގަކުރެވެ އެވެ. ބައެއްފަހަރު ނާކާމިޔާބާ ގުޅިގެން ތިމާ ހީނުކުރާ ބައެއް ކަންކަމާ ވެސް ކުރިމަތިވެ އެވެ. މީ އަދި އެލިބުނު ނާކާމިޔާބަށް ވުރެ މާބޮޑު ހިތް ދަތި ކަމެކެވެ.
އެހެންނަމަވެސް ނާކާމިޔާބު ވުމަކީ އެކަމުގެ ތަޖުރިބާގެ ކަންކަން ރަނގަޅު ކުރަން ލިބޭ ރަނުގެ ފުރުސަތެކެވެ. ނާކާމިޔާބާ ކުރިމަތި ވިޔަސް އެއީ ދުނިޔެ އެމީހަކަށް ނިމުނީ ކަމަށް ނުދެކޭށެވެ.
ގަބޫލުކުރަންވި ހަގީގަތަކީ ނާކާމިޔާބީގެ މާނަ އަކީ އަދި ފުރުސަތު ނުގެއްލޭ ކަމެވެ. އަނެއްކާ ކުރިން ކުރި އެ ހުރިހާ ކަމެއް އެނޫން ގޮތަކަށް ކުރަން ފުރުސަތު ލިބުމެވެ. އެހެންކަމުން އަހަރެމެންގެ އަޒުމަކަށް ވާންވީ ކުރިން ނާކާމިޔާބުވި ގޮތް ނޫން އެހެން ގޮތަކަށް މަސައްކަތް ކޮށްގެން ކާމިޔާބާ ހަމައަށް ވާސިލްވުމެވެ.
ނާކާމިޔާބީ އަކީ އަހަރެމެންނަށް ލިބޭ ވަރަށް ބޮޑެތި އިބްރަތްތަކެކެވެ. ސަބަބަކީ އަހަރަމެންނަށް މުޅި އުމުރުގައި ލިބޭ ކާމިޔާބީއަށް ވުރެ އެންމެ ނާކާމިޔާބީ އަކުން ލިބޭ ފިލާވަޅު ގިނަވާތީ އެވެ. އެހެންކަމުން ނާކާމިޔާބީއާ ވެސް ކެރިގެން، ޔަގީންކަމާއެކު ކުރިމަތިލާށެވެ. ކަމެއް ނުވަތަ ކަންތައްތަކެއް ނާކާމިޔާބުވުމަކުން މަރެއް ނުވާނެ އެވެ. އެހެންކަމުން ކާމިޔާބުގެ ހުރަހަކަށް ނާކާމިޔާބުގެ "ބިރު" ނުހަދާށެވެ.
ހިތްވަރު ކުރާށެވެ. ކަންކަމާ ކުރިމަތިލާށެވެ. ފަސްނުޖެހޭށެވެ. އަހަރެމެންގެ ހިތަކީ ތިޔަ ހީކުރާ ވަރަށް ވުރެ ވަރުގަދަ އެއްޗެކެވެ. އަހަރުމެންގެ ހިތަށް ތަދުވާ، އަސަރުކުރުވާ ކިތައް ކަންކަން އެހިތް ތަހައްމަލް ކޮށްފި ހެއްޔެވެ. އަހަރަމެންގެ ވަގުތީ މި ހިޔާތުގައި ނާކާމިޔާބީގެ އެތައް ވަގުތުތަކަކާ އަދިވެސް ކުރިމަތިލާންޖެހޭނެ އެވެ. އެހެންނަމަވެސް އަހަރެމެންގެ ހިތް އަބަދުވެސް އަހަރެމެންނާ އެކުގައި ވާނެ އެވެ. ކާމިޔާބީއަށް އެދި ވިންދަކަށްފަހު ވިންދެއް ޖަހާލަ ޖަހާލަ އެވެ.