އިދިކޮޅު ޕީޕީއެމްއަށް އަލަށް ގުޅުނު 10،000 މީހުންގެ ފޯމް އިލެކްޝަން ކޮމިޝަނަށް މިއަދު ހުށަހަޅައިފި އެވެ.
މި ފޯމުތައް ހުށަހެޅުމަށް ޕީޕީއެމްއާއި ޕީއެންސީގެ އިސް ބޭފުޅުން މިއަދު ވަނީ އިލެކްޝަންސް ކޮމިޝަން ވަޑައިގެންފަ އެވެ. އިސްކޮށް ހުންނެވީ ޕީޕީއެމްގެ ކޯލިޝަން ޕާޓްނަރު -- ޕީއެންސީގެ ރައީސް އަބްދުއްރަހީމް އަބްދުﷲ އެވެ.
އިލެކްޝަންސް ކޮމިޝަންގެ ފަރާތުން ފޯމުތަކާ ހަވާލުވެވަޑައިގަތީ ކޮމިޝަންގެ ރައީސް ފުއާދު ތައުފީގު އެވެ.
އަވަސް އަށް މައުލޫމާތު ދެއްވަމުން ޕީޕީއެމްގެ ނައިބް ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވީ އަލަށް ހުށަހެޅި 10،000 ފޯމަކީ ޕީޕީއެމްގެ ދާއިރާތަކުގެ އިންތިހާބުގައި ވާދަކުރާ ކެންޑިޑޭޓުންގެ ފަރާތުން ޕާޓީ އޮފީހަށް ލިބިފައިވާ ފޯމުތަކެއް ކަމަށެވެ.
ދާއިރާއެއްގެ ރައީސަކަށް ކުރިމަތިލާ ބޭފުޅަކު 50 ފޯމު އަދި ނައިބު ރައީސް ކަމަށް ކުރިމަތިލާ ބޭފުޅަކު 25 ފޯމު ހުށަހެޅުން އެއީ ޝަރުތެއްގެ ގޮތުގައި ޕީޕީއެމް އިން ވަނީ ކަނޑައަޅާފަ އެވެ.
ޝިޔާމް ވިދާޅުވި ގޮތުގައި މިއަދު ހުށަހަޅާފައިވާ 10،000 ފޯމަކީ ދާއިރާތަކުގެ އިންތިހާބާ ދިމާކޮށް ލިބުނު ފޯމުތަކުގެ ތެރެއިން ޕާޓީގެ އޮފީހަށް ސައްހަކަން ޔަގީންކުރެވުނު ފޯމުތައް ކަމަށެވެ.
"އަޅުގަނޑުމެންގެ އަތުގައި އަދިވެސް އެބައުޅޭ 2،000 އެއްހާ ފޯމު. އެ ފޯމުތަކުގެ ސައްހަކަން ކަށަވަރުކުރުމަށްފަހު އެ ފޯމުތައް ވެސް ވަރަށް އަވަހަށް ކޮމިޝަނަށް ހުށަހަޅާނަން،" ޝިޔާމު ވިދާޅުވި އެވެ.
ޕީޕީއެމް ރަޖިސްޓްރީކޮށްފައިވަނީ އޮކްޓޫބަރު 27، 2011 ގައެވެ. އިލެކްޝަންސް ކޮމިޝަންގެ ވެބްސައިޓްގައި ސިޔާސީ ޕާޓީ ތަކުގެ ދަފްތަރު އެންމެ ފަހުން އަޕްޑޭޓް ކޮށްފައިވަނީ މިދިޔަ ޖުލައި 31 ވަނަ ދުވަހު އެވެ. އެގޮތުން ކޮމިޝަންގެ ވެބްސައިޓުން ފެންނަ ގޮތުގައި ޕީޕީއެމްގައި މިވަގުތު ތިއްބެވީ 33،264 މެންބަރުންނެވެ.