ޕާކިސްތާން ރައްޔިތުންނަށް އެހީވުމަށް މީޑިއާތަކުން ކުރިއަށް ގެންދިޔަ ޓެލެތޯނުގައި ލިބުނު 3.8 މިލިއަން ރުފިޔާ ހަވާލުކޮށްފި އެވެ.
ފައިސާ ހަވާލުކުރުމަށް ރޭ ބޭއްވި ހަފްލާއެއްގައި ފައިސާ ހަވާލުވެވަޑައިގަތީ ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވައިސް އެޑްމިރަލް އާތަރް މުޙްތާރް އެވެ.
ޓެލެތޯން މިމަހުގެ އެއްވަނަ ދުވަހު ކުރިއަށް ގެންދިޔައީ "ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަން"ގެ އިސް ނެގުމަކަށް އެ ޖަމިއްޔާއާއި ރާއްޖޭގެ ބައެއް މީޑިއާތައް ގުޅިގެންނެވެ.
ގާތްގަނޑަކަށް 16 ގަޑިއިރަށް ކުރިއަށް ގެންދިޔަ މި ޓެލޯންގައި ޕާކިސްތާނަށް އެހީވާން ހުޅުވި އެކައުންޓަށް އެކަނިވެސް ދެ މިލިއަން ރުފިޔާ ލިބިފައިވެ އެވެ. ބާކީ ފައިސާ އަކީ މާލެއާއި އެކި ރަށްތަކުގައި ފަންޑް ފޮށި ބަހައްޓައިގެން ލިބުނު ފައިސާއާއި އަދި ބައެއް ކުންފުނިތަކުން ދީފައިވާ ފައިސާ އެވެ.
ޕާކިސްތާނަށް މިއަހަރު ޖޫން މަހުން ފެށިގެން ކުރަމުންދިޔަ ވިއްސާރައިގައި އެ ގައުމުގެ 33 މިލިއަން މީހުންނަށް ވަނީ އެކި ވަރުގެ ގެއްލުންތައް ލިބިފަ އެވެ. ވިއްސާރައާއި ގުޅިގެން ޕާކިސްތާންގެ ތިންބައިކުޅަ އެއްބަޔަށް ވުރެ ބޮޑު ބައި އަދިވެސް އޮތީ ފެނު އަޑީގަ އެވެ. މިހާތަނަށް ގާތްގަނޑަކަށް 1،700 މީހަކު މަރުވެފައިވާ ކަމަށް ރިޕޯޓްތައް ބުނެ އެވެ.
ޕާކިސްތާނަށް ލިބިފައިވާ ބޮޑު ގެއްލުމުން އަރައިގަނެވޭނީ ދުނިޔޭގެ ގައުމުތަކުގެ ދީލަތި އެހީތެރިކަމާ އެކު ކަމަށް އެ ގައުމުގެ ސަރުކާރުން ގެންދަނީ ތަކުރާރުކޮށް ބުނަމުންނެވެ.