ވަޔޯލާ ޑޭވިސް، އެމެޒޯން ސްޓޫޑިއޯސް އަދި އެމްއާރްސީ ފިލްމްގެ "ޖީ20" ގައި އެކްޓްކޮށް ޕްރޮޑިއުސްކުރަނީ އެވެ.
ވަޔޯލާ މި ފިލްމް ޕްރޮޑިއުސްކުރަނީ އޭނާގެ ފިރިމީހާ ޖޫލިއަސް ޓެނަންއާ އެކުގަ އެވެ.
ޖޫވީ ޕްރޮޑަކްޝަންސްގެ ނަމުގައި މި ދެމަފިރިންގެ ޕްރޮޑަކްޝަން ކޮމްޕެނީއެއްވެސް އޮވެ އެވެ.
ޕެޓްރީޝިއާ ރިގެން ޑައިރެކްޓްކުރާ މި ފިލްމުގައި ދައްކާނީ ޖީ20 ސަމިޓް ޓެރަރިސްޓުން އައިސް ހިސޯރުކުރާ ތަނެވެ.
ވަޔޯލާ އަދާކުރަނީ އެމެރިކާގެ ރައީސް ޓެލާ ސަޓަންގެ ރޯލެވެ. ޓޭލާގެ ސިޔާސީ ހުނަރާއި މިލިޓަރީ ތަޖުރިބާ ބޭނުންކޮށްގެން އޭނާގެ އާއިލާ އާއި އެހެން ގައުމުތަކުގެ ލީޑަރުންނާއި ދުނިޔެ ސަލާމަތްކުރަންޖެހެ އެވެ.
މި ފިލްމް ރިލީޒް ކުރާ ތާރީހް އަދި ހާމަކޮށްފައެއް ނުވެ އެވެ.
އުމުރުން 57 އަހަރުގެ ވަޔޯލާއަކީ އޮސްކާ އެވޯޑާއި އެހެނިހެން އެވޯޑް ލިބިފައިވާ ހުނަރުވެރި ތަރިއެކެވެ.
ވަޔޯލާގެ ފާހަގަކޮށްލެވޭ ފިލްމުތަކުގެ ތެރޭގައި ދާދި ފަހުން ނެރުނު "ދަ ވުމަން ކިން"، "ފެންސަސް"، "ދަ ހެލްޕް"، "ދަ ސުއިސައިޑް ސްކޮޑް" ގެ ދެ ފިލްމް، "ބްލެކް އެޑަމް" އަދި "ވިޑޯސް" ހިމެނެ އެވެ.
މީގެ އިތުރުން ވަޔޯލާ ވަނީ ކާމިޔާބު ސީރީޒް "ހައު ޓު ގެޓް އަވޭ ވިތް މާޑާ" ވެސް ކުޅެފަ އެވެ.