ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި ހައްޔަރުކުރި 14 މީހުންގެ ތެރޭގައި ހިމެނޭ މީހެއްގެ ގެ ބަލައި ފާސްކުރިއިރު ބާރުގަދަ ގޮއްވުންތަކުގައި ބޭނުންކުރާ ހައި އެކްސްޕްލޯސިވްގެ ވައްތަރުތަކެއް ފެނިފައިވާ ކަމަށް ފުލުހުން ބުނެފި އެވެ.
ފުލުހުންނާއި ސިފައިން ގުޅިގެން މިމަހުގެ 11 ވަނަ ދުވަހުން ފެށިގެން މާލެ އާއި ކ. ގުރައިދޫއާއި އަދި އައްޑޫ ސިޓީގައި ކުރިއަށް ގެންދިޔަ އޮޕަރޭޝަންގައި ހައްޔަރުކުރި މީހުންގެ ތެރެއިން ހަތަރު މީހަކު ޝަރީއަތް ނިމެންދެން ބަންދުކުރުމަށް ކޯޓުން ވަނީ އަމުރުކޮށްފަ އެވެ. އިތުރު ހަތަރު މީހަކު 30 ދުވަހަށް އަދި ފަސް މީހަކު 15 ދުވަހަށް ބަންދުކުރުމަށްވެސް ކޯޓުން ވަނީ އަމުރުކޮށްފަ އެވެ.
މި އޮޕަރޭޝަނާއި ގުޅިގެން ފުލުހުން މިރޭ ނެރުނު ބަޔާނެއްގައި ބުނެފައިވަނީ ހައްޔަރުކުރި މީހުންގެ ގެތަކުންނާއި، މި މީހުން ބޭނުންކުރަމުންދާ ގެތަކުންނާއި ބައެއް ވެހިކަލްތަކުންނާއި ޑިންގީއެއް ބަލައި ފާސްކޮށް މައްސަަލައާއި ގުޅުންހުރި ކަމަށް ބެލެވޭ ގިނަ އަދަދެއްގެ ތަކެތި ހޯދާފައިވާ ކަމަށެވެ.
ފެނުނު ތަކެތި ތަހުލީލު ކުރުމުގެ މަސައްކަތް ކުރަމުންދާ ކަމަށާއި ކްސްޕްލޯސިވްގެ މާއްދާތައް ހިމެނޭ ކަމަށް ދެއްކި ސާމްޕަލްތައް ރާއްޖެއާއި ރާއްޖެއިން ބޭރުން އިތުރަށް ތަހުލީލުކުރުމުގެ މަސައްކަތް ކުރަމުންދާ ކަމަށްވެސް ބަޔާނުގައިވެ އެެވެ.
ފުލުހުން ބުނީ އޮޕަރޭޝަންގައި ހައްޔަރުކުރެވުނު މީހެއް ދިރިއުޅޭ ގެއެއް ބަލައި ފާސްކޮށް ނެގުނު އެކްސްޕްލޯސިވް ކެމިކަލް ކަމަށް ޝައްކު ކުރެވޭ ތިން ބާވަތެއްގެ ސާމްޕަލް ސިފައިންގެ އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ)ގެ ފަރާތުން ޗެކް ކޮށްފައިވާ ކަމަށެވެ. އެ ސާމްޕަލްތަކުގައި ހައި އެކްސްޕްލޯސިވްގެ މާއްދާތައް ހިމެނޭ ކަމަށް ދައްކާފައިވާ ކަމަށްވެސް ފާހަގަކޮށްފައިވެ އެވެ.
"މިގޮތުން ސާމްޕަލްތަކުން ފެނުނު އެކްސްޕްލޯސިވްސްގެ މަދު މިންވަރަކުން އިންސާނުންގެ ފުރާނައާއި މުދަލަށް ބޮޑެތި ގެއްލުން ދެވިދާނެ ކަމަށް އެމްއެންޑީއެފް އިއޯޑީގެ ފަރާތުން ފާހަގަކުރައްވާފައިވެ އެވެ." ބަޔާނުގައިވެ އެވެ.