މިދިޔަ ހަތަރު އަހަރާއި އަޅާބަލާއިރު މިއަހަރު ޑެންގީ، އިންފުލުއެންޒާ އަދި އަރިދަފުސް ރޯގާ ފަދަ ގައިން ގަޔަށް އަރާބަލިތައް އިތުރުވެފައިވާ ކަމަށް ހެލްތު މިނިސްޓްރީން ބުނެފި އެވެ.
ހެލްތު މިނިސްޓްރީން ބުނީ 2020 އަދި 2021ގައި ކޮވިޑްގެ ސަބަބުން އެހެން ބަލިތަށް ޖެހިފައިވާ މިންވަރު އަދި ރިޕޯޓު ކުރެވިފައިވާ މިންވަރު މަދުވުމުގެ ސަބަބުން އަހަރުތަކުގެ ތަފާސްހިސާބުތައް އަޅާބެލުމަށް އެ ދެ އަހަރުގެ ތަފާސްހިސާބު ބޭނުން ނުކުރާ ކަމަށެވެ.
ރޯގާގެ ގޮތުގައި ފެތުރޭ ބަލިތަކުގެ ތެރޭގައި އެންމެގިނައިން ފެތުރިފައިވަނީ އަރިދަފުސް ރޯގާ އާއި ބޭރަށް ހިންގުމެވެ. ވޭތުވެދިޔަ އަހަރުތަކުގެ މިދުވަސްވަރާ އަޅާބަލާއިރު މިއަހަރު މިހާތަނަށް ޑެންގީ ހުން ޖެހިގެން ރިޕޯޓްކޮށްފައިވާ އަދަދު ވަނީ ވަރަށް ބޮޑަށް އިތުރުވެފަ އެވެ.
ތަފާސްހިސާބުތައް ދައްކާ ގޮތުން ނޮވެމްބަރު 2019ގައި ޑެންގީގެ 280 ކޭސް ރިޕޯޓްކޮށްފައިވެއެވެ. މިއަހަރުގެ ނޮވެމްބަރުގައި ޑެންގީގެ 349 ކޭސް ރިޕޯޓްކުރެވުނެވެ.
އަރިދަފުސް ރޯގާ ޖެހިގެން 2019 ވަނަ އަހަރުގެ އޮކްޓޫބަރާއި ނޮވެމްބަރުގައި 22،507 ކޭސް ރިޕޯޓްކޮށްފައިވާއިރު މިއަހަރުގެ އެ ދެ މަހުގައި ރިޕޯޓްކުރީ 62،303 ކޭސް އެވެ.
ބޭރަށް ހިންގުމުގެ 5،655 ކޭސް 2019 ވަނަ އަހަރުގެ އޮކްޓޫބަރާއި ނޮވެމްބަރު މަހު ރިޕޯޓްކުރެވުނެވެ. މި އަހަރުގެ އެ މުއްދަތުގައި ބޭރަށް ހިންގުމުގެ 6،395 ކޭސް ރިޕޯޓްކުރެވުނެވެ.
ޑެންގީ އިން ރައްކާތެރިވުމަށް މަދިރިން ރައްކާތެރިވުމުގެ ފިޔަވަޅުތައް އެޅުމަށް ހެލްތު މިނިސްޓްރީން ވަނީ އިލްތިމާސްކޮށްފަ އެވެ.
އަރިދަފުސް ރޯގާ، ކޮވިޑް އަދި އިންފްލުއެންޒާއިން ރައްކާތެރިވުމަށްޓަކާ ސައިބޯނި ލައިގެން އަތްދޮވުމާއި ކެއްސާ ކިނބިހިއަޅާއިރު އަނގަމަތި ނިވާކުރުމަށް ހެލްތު މިނިސްޓްރީން ވަނީ އިލްތިމާސްކޮށްފަ އެވެ. އަދި ބަލި ޖެހުމުން ނުރައްކާ ބޮޑުވެދާނެ މީހުން އިންފްލުއެންޒާ ވެކްސިން ޖެހުމަށް އިލްތިމާސްކޮށްފައިވެ އެވެ.