ރައްޔިތުންގެ މަޖިލީހުގައި އެމްޑީޕީއަށް އަގުލަބިއްޔަތު ލިބިފައި އޮތްއިރު އެ ޕާޓީގެ މެންބަރުން ސަރުކާރަށް ފާޑު ކިޔަމުންދާތީ އެކަން ހުއްޓާލުމަށް އެޕާޓީގެ ކުރީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާ ރައީސް އިބްރާހީމް މުހައްމަދު ސޯލިހްގެ ކެމްޕެއިން ފެށުމުގެ ގޮތުން ރައީސް ސޯލިހްގެ ފެކްޝަންގެ ހަރުގޭގައި ރޭ ބޭއްވި ޖަލްސާގައި ވާހަކަ ދައްކަވަމުން މޫސަ ވިދާޅުވީ ރައީސް މުހައްމަދު ނަޝީދުގެ ވެރިކަމުގައި ސަރުކާރަށް ދަތިވިޔަ ނުދޭން ކުރެވެން ހުރި ހުރިހާ ކަމެއް އޭރު އެމްޑީޕީގެ ޕާލަމެންޓްރީ ގްރޫޕްގެ ލީޑަރަކަށް ހުންނެވި މިހާރުގެ ރައީސް ސޯލިހް ކުރެއްވި ކަމަށެވެ.
މޫސަ ވިދާޅުވީ އެމްޑީޕީގެ ކުރީގެ ސަރުކާރުގައި އެ ޕާޓީގެ މެންބަރުންގެ ފަރާތުން އެފަދަ ކަމެއް ނުފެންނަ ކަމަށެވެ.
"ގޭގައި ޓީވީ ބަލަން އިންނައިރު ލަދުން ބޯހަލާކު ވާވަރުވޭ. އެމްޑީޕީން އެކަން ހުއްޓާލަންޖެހޭ،" މޫސަ ވިދާޅުވި އެވެ.
މޫސަ ވިދާޅުވީ ހިޔާލު ތަފާތު ވިނަމަވެސް މެމްބަރުންގެ މެދުގައި ފިތުނަ އުފެދިގެން ނުވާނެ ކަމަށާއި ހިޔާލު ތަފާތުވާ ކަންކަމުގައި މަޝްވަރާ ކުރެވެންވާނެ ކަމަށެވެ.
މޫސަ އެމްޑީޕީން ވަކިކުރީ އެ ޕާޓީގެ ވިޕްލައިނާ ހިލާފަށް ރައްޔިތުންގެ މަޖިލީހުގައި ވޯޓުލީ ކަމަށް ކަނޑައަޅައި އޭނާއަށް އެޅި ފިޔަވަޅެއްގެ ގޮތުގަ އެވެ. މޫސަ އަލުން އެމްޑީޕީއާ ގުޅިވަޑައިގެންނެވީ ނޮވެމްބަރު މަހު އެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް އެޕާޓީން ނިންމާފައިވަނީ ކުރިއަށް ޖެނުއަރީ 28 ގައެވެ.