ބަނގުރަލާއި ބިޔަރު ދަޅުތަކަކާއެކު މާލެއިން ދެ މީހަކު ހައްޔަރުކޮށްފި އެވެ.
ފުލުހުންގެ އިންޓެލިޖެންސާއި ޑްރަގް އެންފޯސްމަންޓް ގުޅިގެން އިއްޔެ މާލޭގައި ހިންގި އެ ދެ އޮޕަރޭޝަނެއްގައި ހައްޔަރުކޮށްފައި ވަނީ 32 އަހަރުގެ ދިވެހި ފިރިހެނަކާއި 52 އަހަރުގެ ދިވެހި ފިރިހެނެކެވެ.
ފުލުހުން ވަނީ މި ދެމީހުން ދިރިއުޅޭ ގެތައް ބަލައި ފާސްކޮށް 44 ބިޔަރު ދަޅާއި ބަނގުރާ ކަމަށް ބެލެވޭ އެއްޗެއްހުރި 500 އެމްއެލްގެ 36 ފުޅި އަދި މަސްތުވާތަކެތި ކަމަށް ބެލެވޭ އެއްޗެއް ހުރި ދެ ރަބަރު ޕެކެޓު އަތުލައިގަނެފަ އެވެ.
ހައްޔަރުކުރި 32 އަހަރުގެ މީހާގެ ބަންދަށް ކްރިމިނަލް ކޯޓުން 10 ދުވަސްދީފައިވާއިރު 52 އަހަރުގެ މީހާގެ ބަންދަށް ވަނީ 30 ދުވަސް ޖަހާފަ އެވެ.
ފުލުހުން ހިންގި އޮޕަރޭޝަނެއްގައި މިދިޔަ ހަފުތާގައި ވެސް ގިނަ އަދަދެއްގެ ބަނގުރާފުޅި އާއި ބިޔަރު ވަނީ އަތުލައިގަނެފަ އެވެ. މިގޮތުން ފުލުހުން ހިންގި އޮޕަރޭޝަނެއްގައި 192 ފުޅި ބަނގުރާ އަދި 111 ދަޅު ބިޔަރު އަތުލައިގަތެވެ.