ކުރީގެ އެކްޓްރެސް އަދި މިހާރުގެ ފެޝަން ޑިޒައިނާ އޮލްސަން ޓްވިންސްގެ އޭޝްލީ އޯލްސަން ކައިވެނިކޮށްފި އެވެ.
އުމުރުން 36 އަހަރުގެ އޭޝްލީ ކައިވެނިކުރީ އޭނާގެ ގިނަ ދުވަސްވީ ލޯބިވެރިޔާ އަދި ބައިކޯސްޓަލް އާޓިސްޓް، 33 އަހަރުގެ ލުއީ އައިޒްނާއާ އެވެ.
މި ދެ ލޯބިވެރިންގެ ކައިވެނީގެ ހަފްލާ އޮތީ ބެލް އެއާގެ ޕްރައިވެޓް ގެއެއްގައި ގާތްގަނޑަކަށް 50 މެހެމާނުންނާ އެކު އެވެ.
އޭޝްލީ އާއި ލުއީ ލޯބީގެ ގޮތުން ގުޅުނީ 2017 ގައެވެ. މި ދެ ލޯބިވެރިންނަކީ އެމީހުންގެ ޒާތީ ކަންތައްތައް ވަރަށް ޕްރައިވެޓްކޮށް ބަހައްޓަން ބޭނުންވާ ބައެކެވެ.
މި ހަފްލާގައި އޭޝްލީގެ ޓްވިން ސިސްޓާ މޭރީ-ކޭޓް އޯލްސަން އާއި ކޮއްކޮ އެލިޒަބެތް އޯލްސަން ބައިވެރިވި އެވެ.
މޭރީ-ކޭޓް އާއި އޭޝްލީ އަކީ ބިޒްނަސް ޕާޓްނަރުންނެވެ. އަދި އެލިޒަބަތް އަކީ މާވެލް ސިނަމެޓިކް ޔުނިވާސްގައި ސްކާލެޓް ވިޗްގެ ރޯލް އަދާކުރާ ތަރި އެވެ.
މޭރީ-ކޭޓް އާއި އޭޝްލީ އަކީ ތުއްތު އިރުއްސުރެއް ޓީވީން ފެންނަމުން އައި މޫނުތަކެކެވެ. މި ގޮތުން މި ޓްވިންސްގެ ފާހަގަކޮށްލެވޭ ސީރީޒް އަދި ފިލްމުތަކުގެ ތެރޭގައި "ފުލް ހައުސް"، "އެޑްވެންޗާސް އޮފް މޭރީ-ކޭޓް އެންޑް އޭޝްލީ"، "ޕާސްޕޯޓް ޓު ޕެރިސް"، "ހޮލިޑޭ އިން ދަ ސަން"، "ނިއު ޔޯކް މިނެޓް"، "ވެން އިން ރޯމް" ފަދަ ޕްރޮޖެކްޓްތައް ހިމެނެ އެވެ.