ކުރިއަށް އޮތް ދެތިން ހަފްތާ ތެރޭގައި ބ. ތުޅާދޫ އެއާޕޯޓު އެޅުމުގެ މަޝްރޫއު ކޮންޓްރެކްޓަރަކާއި ހަވާލުކުރާނެ ކަމުގައި ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީ ކެމްޕޭނަށް ކުރައްވާ ދަތުރުފުޅުގައި ބ. އޭދަފުށީގައި މިއަދު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ތުޅާދޫގައި އެއާޕޯޓު އަޅަން ދެން އޮތީ ކުޑަ ދުވަސްކޮޅެއް ކަމަށެވެ.
"އިރާދަކުރެއްވިއްޔާ ކުރިއަށް މިއޮތް ދެތިން ހަފްތާ ތެރޭ އަޅުގަނޑުމެން އެކަން ކުރުމަށްޓަކާ ބަޔަކާ ހަވާލުކުރެވޭނެ ކަމުގެ ޔަގީންކަން މިއަދު އަރުވަން،" އެމަނިކުފާނު ވިދާޅުވި އެވެ.
މީގެ އިތުރުން ރައީސް ވިދާޅުވީ މި އަހަރުގެ މެދުތެރެއަށް ތުޅާދޫގައި އެއާޕޯޓު އެޅުމަށް ބޭނުންވާ ބިން ހިއްކައި ނިންމައި އިމާރާތްކުރުމުގެ މަސައްކަތް ފެށުމަކީ ސަރުކާރުގެ އަމާޒު ކަމަށެވެ. އަދި މިއަހަރު ނިމެންވާއިރަށް ތުޅާދޫ އެއާޕޯޓު ބޭނުންކުރެވޭ ވަރުވުމަކީ ވެސް އަމާޒެއް ކަމުގައި ވިދާޅުވި އެވެ.
ސަރުކާރުން ވަނީ ރ. އަލިފުށި، ހދ. މަކުނުދޫ، ށ. ބިލަތްފަހި، ބ. ތުޅާދޫ، މ. މުލި، ފ. މަގުދޫ އަދި ތ. ވިލުފުށި އަދި ރ. އަތޮޅުގެ އިތުރު ރަށެއްގައިވެސް އެއާޕޯޓެއް އެޅުމަށް ނިންމާފަ އެވެ. މީގެތެރެއިން ފ. މަގޫދޫ އާއި އަލިފުށި އެއާޕޯޓުގެ މަސައްކަތް ވަނީ އެމްޓީސީސީއާ ހަވާލުކޮށްފަ އެވެ.