ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަކީ އެމްޑީޕީގެ ތެރޭގައި މަގުބޫލު ބޭފުޅެއް ނޫން ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައީސް ނަޝީދު ނޫސްވެރިންނާ ބައްދަލުކުރައްވާ ވިދާޅުވީ ރައީސް ސޯލިހަކީ އެމްޑީޕީގެ ތާއީދުތަކެއް އެއްވެސް އިރެއްގައި އޮތް ބޭފުޅެއް ނޫން ކަމަށެވެ.
"މި ޕާޓީ އުފެދިގެން އެއްވެސް ދަތުރެއްގައި ބައިވެރިވެވަޑައިގެންފައެއް ނުވޭ. ހަމައެކަނި ކެމްޕޭން ދަތުރުތަކުގައި ބައިވެރި ވަޑައިގެންފަ ވަނީ،" ނަޝީދު ވިދާޅުވި އެވެ.
ރައީސް ކަމަށް ވަޑައިގަތުމުގެ ކުރިން ރައީސް ސޯލިހަކީ ކޮން ބޭފުޅެއްކަން މީހުންނަށް ނޭނގޭ ކަމަށްވެސް ރައީސް ނަޝީދު ވިދާޅުވި އެވެ. އަދި ރައީސް ސޯލިހް އާއި ޕާޓީގެ ގްރާސްރޫޓްއާ މާބޮޑު ގުޅުމެއް އޮތް ކަމަށް ދެކިވަޑައިނުގަންނަވާ ކަމަށްވެސް ވިދާޅުވި އެވެ.
ކުރީގެ ރައީސް އަބްދުﷲ ޔާމީންއަކީ ތައުލީމީ ބޭފުޅެއް ކަމަށާއި އެމަނިކުފާނަކީ ތަންދޮރު އެނގިވަޑައިގަންނަވާ ވިޝަނެއް ހުރި ބޭފުޅެއް ކަމަށް ރައީސް ނަޝީދު ވިދާޅުވި އެވެ. ނަމަވެސް ރައީސް ސޯލިހަކީ އެފަދަ ބޭފުޅެއްކަމަށް ނުދެންނެވޭނެ ކަމަށްވެސް ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީ މިމަހުގެ 28 ވަނަ ދުވަހު ބޭއްވުމަށް ހަަމަޖެހިފައިވާއިރު ރައީސް ނަޝީދު ވިދާޅުވީ ޕްރަރިމަރީއަށްފަހު ސިޔާސީ މަޝްރަހު ބަދަލުވެގެންދާނެ ކަމަށެވެ.
އެގޮތުން ރައީސް ސޯލިހް އަރިހުގައި ތިއްބެވި ބޭފުޅުންގެ ތާއީދު ރިޔާސީ އިންތިހާބުގައި ލިބިވަޑައިގަންނަވާނެ ކަމަށްވެސް ނަޝީދު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގެ ފޯރި ގަދަވެފައިވާއިރު ރައީސް ނަޝީދު ގެންދަވަނީ ރައީސް ސޯލިހުއަށާއި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ.
