ކޮރަޕްޝަން އިންޑެކްސްގައި ރާއްޖެ ހުއްޓިފައި

ގައުމުތަކުގައި ކޮރަޕްޝަން އަށަގެންފައިވާ މިންވަރު ބެލުމަށް ކޮންމެ އަހަރަކު އާންމު ކުރާ ކޮރަޕްޝަން ޕާސެޕްޝަން އިންޑެކްސް (ސީޕީއައި) ރޭންކިންގައި ރާއްޖެއަށް ކުރިއެރުމެއް ނުލިބި އެއްވަރެއްގައި ހިފެހެއްޓިފައިވާ ކަމަށް ދައްކައިފި އެވެ.

މިއަދު ނެރުނު 2022 ވަނަ އަހަރުގެ އިންޑެކްސްގައި 185 ގައުމުގެ ތެރެއިން ރާއްޖެ އޮތީ 40 ޕޮއިންޓާ އެކު 85 ވަނަ ރޭންކުގަ އެވެ. 2021 ވަނަ އަހަރު ވެސް ރާއްޖެ އޮތީ މި ރޭންކުގަ އެވެ.

ގްލޯބަލް އިންސައިޓް ކަންޓްރީ ރިސްކް ރޭޓިންސް، ވެރައިޓީސް އޮފް ޑިމޮކްރަސީ ޕްރޮޖެކްޓް އަދި ވޯލްޑް ބޭންކް ކަންޓްރީ ޕޮލިސީ އެންޑް އިންސްޓިޓިއުޝަނަލް އެސެސްމަންޓް (ސީޕީއައިއޭ) އަށް ރިއާޔަތްކޮށް ކަނޑައަޅާ މި އިންޑެކްސްގައި ދަށް ރޭންކުތަކުގައި ހިމަނަނީ އެންމެ ކޮރަޕްޓް ދައުލަތްތަކެވެ. އަދި 100 ވަނަ ރޭންކަކީ ކޮރަޕްޝަންގެ އަމަލުތައް އެންމެ މަދު ދައުލަތުގެ ގޮތުގައި ވަނީ ކަނޑައަޅާފަ އެވެ.

ސީޕީއައި އާއި ގުޅިގެން އެންޓިކޮރަޕްޝަން އެންޖީއޯއެއް ކަމުގައިވާ ޓްރާންސްޕޭރެންސީ މޯލްޑިވްސް އިން ނެރުނު ބަޔާނެއްގައި ބުނެފައިވަނީ އެހެން އަހަރުތަކެކޭވެސް އެއް ފަދައިން ދިވެހިރާއްޖޭގައި މައްސަލަތައް ތަހުގީގުކޮށް، ދައުވާކޮށް، ގާނޫނުތައް ތަންފީޒުކުރުން ބަލިކަށިވުމުގެ ސަބަބުން ސިޔާސީ ފަރާތްތަކާއި ދައުލަތުގެ މުވައްޒަފުން ޒިންމާދާރު ނުކުރެވޭކަން ތަފާސް ހިސާބުތަކުން ދައްކާ ކަމަށެވެ.

ސީޕީއައިގެ މެދުމިނުގެ ގިންތި ތެރޭގައި ރާއްޖެ ހިމެނިފައިވުމުން ރަމްޒުކޮށްދެނީ ދިވެހިރާއްޖެއަށް ކޮރަޕްޝަން ނައްތާލުމަށް ހުރި ބޮޑެތި ހުރަސްތަކުގެ ތެރޭގައި ބޮޑެތި ކޮރަޕްޝަން އަދި ހިޔާނާތުގެ މައްސަލަތަކާއި އާންމުނަށް ގެއްލުންވާ ގޮތަށް ސަރުކާރުގެ މަތީ މަގާމުތަކުގައި ތިބޭ ބައެއް ފަރާތްތަކުން ނުހައްގުން މަންފާ ހޯދާކަން ކަމުގައި ވެސް ފާހަގަކޮށްފައިވެ އެވެ.

މީގެ އިތުރުން ކޮރަޕްޝަންގެ ސަބަބުން ސިޔާސީ، އިޖްތިމާއީ އަދި އިގްތިސާދީ ލޮޅުންތައް އަރައި، ގައުމުގެ އަމަންއަމާން ކަމާއި ރައްކާތެރިކަމަށް ބުރޫއަރާކަމަށް ޓްރާންސްޕޭރެންސީ މޯލްޑިވެސް އިން ބުނެ އެވެ.

"ކޮރަޕްޝަނުގެ ސަބަބުން އޯގަނައިޒްޑް ކްރައިމް އާއި ވައިލަންޓް ކޮންފްލިކްޓް އިތުރުވާ ފަދަ މާހައުލެއް ގާއިމްވޭ. އެއީ ދައުލަތުގެ މަތީ މަގާމުތަކުގައި ތިބޭ ބައެއް ކޮރަޕްޓް ފަރާތްތަކުން ނުފޫޒުގެ ބޭނުންކޮށްގެން ކުށްކުރާ ފަރާތްތަކަށް އެ ފުރުސަތު ދޭތީ. ވީމާ، މިކަމަށް ދެމެހެއްޓެނިވި ހައްލެއް ހޯދައި އަމާންކަން ހިފެހެއްޓުމަށްޓަކައި ކޮރަޕްޝަނަށް މަގުފަހިކުރުވާ އަދި ކޮރަޕްޓް ފަރާތްތަކަށް ހިމާޔަތްދޭ ނިޒާމު އެއްކޮށް ބަދަލުކޮށް، ޒިންމާދާރުކުރުވުމާއި ހާމަކަން ބޮޑު ނިޒާމެއް ކަށަވަރުކުރަންޖެހޭ،" ބަޔާނުގައިވެ އެވެ.

މީގެ އިތުރުން 2023 ވަނަ އަހަރުގެ ރިޔާސީ އިންތިހާބަށް ތައްޔާރުވަމުންދާއިރު، ޒިންމާދާރު ކުރުވުމުގެ ނިޒާމުތަކާއި އަދުލު އިންސާފު ގާއިމުކުރުމުގެ ނިޒާމަށް ރައްޔިތުންގެ އިތުބާރު ގެއްލޭ ގޮތަށް ކޮރަޕްޝަނާ މެދު ސިޔާސީގޮތުން ކުރަމުންގެންދާ ކަންތައްތަކާ މެދު ޓްރާންސްޕޭރަންސީ މޯލްޑިވްސް އިން ވަނީ ކަންބޮޑުވުން ފާޅުކޮށްފަ އެވެ.

މިގޮތުން ރާއްޖޭގައި ކޮރަޕްޝަން އޮތް މިންވަރު ކުޑަކޮށް ސިޔާސީ ކަންކަމަށް ރައްޔިތުންގެ އިތުބާރު އަލުން ހޯދުމަށްޓަކައި ޓްރާންސްޕޭރެންސީ މޯލްޑިވްސް އިން ވަނީ ހުށަހެޅުންތަކެއް ވެސް ހުށަހަޅާފަ އެވެ.

ޓްރާންސްޕޭރެންސީ މޯލްޑިވްސްގެ ހުށަހެޅުންތައް:

ކޮރަޕްޝަނާ ދެކޮޅަށް ކުރާ މަސައްކަތްތަކަކީ ވަގުތުން ވަގުތަށް އަވަސްކަން މަތީ ވަކި ފަރާތަކަށް ނުޖެހި ކުރަންޖެހޭ ކަމަކަށްވާތީ، ކޮރަޕްޝަން ހިންގާ ފަރާތްތައް ހިމާޔަތްކުރުން ހުއްޓާލައި، ކޮރަޕްޝަނާ ގުޅޭ ތުހުމަތުތައް ތަހުގީގުކޮށް ކޮރަޕްޝަންގެ އަމަލުތައް ހިންގާ ސިތާސީ ފަރާތްތަކަށް ވަޒީފާގެ ކުރިއެރުމާއި އިތުރު ކުރިއެރުންތަކާއި ބާރުތައް ދިނުމުގެ ބަދަލުގައި އިންސާފުގެ ކުރިމައްޗަށް ގެނައުމަށްވެސް ޓްރާންސްޕޭރެންސީ މޯލްޑިވްސް އިން ވަނީ ގޮވާލާފަ އެވެ.