ނިކޯލް ކިޑްމަން އާއި ޖޭމީ ލީ ކާޓިސް ދެބެންގެ ގޮތުގައި އެމެޒޯންގެ ޕްރައިމް ވީޑިއޯ ސީރީޒެއް ކުޅެނީ އެވެ.
މި ދެ ތަރިން ފެންނާނީ މަޝްހޫރު ވާހަކަ ލިޔުންތެރިޔާ ޕެޓްރީޝިއާ ކޯންވެލްގެ ކޭ ސްކާޕެޓާ ކްރައިމް ބުކް ސީރީޒަށް ހަދާ ޓީވީ ސީރީޒްގަ އެވެ. މި ވާހަކަ ސީރީޒްގައި 26 ވާހަކަ އެކުލެވިގެންވެ އެވެ.
މިހަބަރު ޕެޓްރީޝިއާ ކޯންވެލް އިންސްތަގްރާމްގައި ހިއްސާކޮށްފައިވަނީ ނިކޯލް އާއި ޖޭމީގެ ފޮޓޯ އާއި ކޭ ސްކާޕެޓާ ވާހަކަ ސީރީޒްގެ ފޮޓޯއާއެކުގައެވެ.
މި ސީރީޒްގައި 55 އަހަރުގެ ނިކޯލް އަދާކުރާނީ ކްރައިމް ސޯލްވް ކުރާ މެޑިކަލް އެގްޒެމިނާ ޑރ. ކޭ ސްކާޕެޓާގެ ރޯލެވެ. ކޭ އަކީ އޮޕެރާއަށާއި އިޓަލިއަން ކުކިން އަށް ލޯބިކުރާ، އެހެނަސް ހާޖާނުބޮޑު ލޯބީގެ ހަޔާތެއް އޮންނަ އަންހެނެކެވެ. އަދި އުމުރުން 64 އަހަރުގެ ޖޭމީ އަދާކުރާނީ ކޭގެ ހިޔާލެއް ފިކުރެއް ނެތް "ވިމްސިކަލް" ސިސްޓާގެ ރޯލެވެ. މި ސީރީޒްގެ އިތުރު ކާސްޓާއި ރިލީޒްކުރާ ތާރީހް އަދި ހާމަކޮށްފައެއް ނުވެ އެވެ.
ގަބޫލުކުރެވޭ ގޮތުގައި މި ސީރީޒް ކުރިއަށްދާނީ އަށް އެޕިސޯޑްގެ ދެ ސީޒަނަށެވެ.
ނިކޯލް ކިޑްމަން އަކީ ފަސް ފަހަރަށް އެކަޑަމީ އެވޯޑަށް ނޮމިނޭޓްވެ، "ދި އަވާސް" އަށް "ބެސްޓް އެކްޓްރެސް" ކެޓަގަރީއިން އެވޯޑާއި ހަ ގޯލްޑަން ގްލޯބް އެވޯޑާއި ދެ އެމީ އެވޯޑް ހާސިލްކޮށްފައިވާ އެކްޓްރެސްއެކެވެ. ޖޭމީ ވަނީ މިފަހަރުގެ އެކަޑަމީ އެވޯޑަށް "ބެސްޓް ސަޕޯޓިން އެކްޓްރެސް" ކެޓަގަރީއަށް "އެވްރިތިން، އެވްރިވެޔާ އޯލް އެޓް ވަންސް" އިން ނޮމިނޭޓްވެފަ އެވެ.