ބަތަލާ ޕްރިޔަންކާ ޗާހާރް ޗައުދަރީ އަކީ "ބިގް ބޮސް 16"ގެ އެންމެ މަގްބޫލު އެއް ބައިވެރިޔާ އެވެ.
އޭނާ މި ޝޯ ކާމިޔާބުކުރާނެ ކަމަށް ވަރަށް ގިނަ ބަޔަކު އުއްމީދު ކުރި އެވެ. ނަމަވެސް ގިނަ ބަޔަކު މާޔޫސްކޮށްލާފައި "ބިގް ބޮސް 16" ޓްރޮފީ ގެންދިޔައީ އެމްސީ ސްޓެން އެވެ. ޕްރިޔަންކާ ދިޔައީ ތިންވަނަ އަށެވެ.
ބިގް ބޮސް ޓްރޮފީ ނުލިބުނަސް ޕްރިޔަންކާ ވަނީ އެ ޝޯ ބެލި އެންމެންގެ ހިތްތަކުން ހާއްސަ މަގާމެއް ހޯދާފަ އެވެ.
"ބިގް ބޮސް 16"ގެ ގްރޭންޑް ފިނާލޭ ޝޯގައި އެ ޝޯގެ "ހަގީގީ އެއްވަނަ" އަކީ ޕްރިޔަންކާ ކަމަށް ޝޯގެ ހޯސްޓް ސަލްމާން ޚާން ވެސް ބުންޏެވެ. އަދި ބެލުންތެރިންގެ ޕްރިޔަންކާގެ ފޭނުން ގަބޫލުކުރަނީ ހަމަ މިގޮތަށެވެ.
މި ޝޯ ކާމިޔާބު ނުކުރެވުނަސް ޕްރިޔަންކާ އަށް މިހާރު ގެއްލުމެއް ނެތެވެ. އެއަށްވުރެ މާރަނގަޅު ފުރުސަތެއް އޭނާއަށް ތަނަވަސް ވެފައިވާތީ އެވެ. އެއީ ހުވަފެނީ ޕްރޮޖެކްޓަކުން ބޮލީވުޑަށް ތައާރަފްވުމުގެ ފުރުސަތެވެ. އެއީ ރާޖްކުމާރު ހިރާނީ ޑައިރެކްޓްކުރާ ޝާހް ރުކް ޚާން ބަތަލުގެ ބައި ކުޅޭ "ޑުންކީ"ގެ ރޯލެކެވެ.
އިންޑިއާގެ ނޫހަކަށް ދިން އިންޓަވިއު އެއްގައި ޕްރިޔަންކާ ބުނީ ސަލްމާންގެ އެކުވެރި ޝާހް ރުކްއާ ބައްދަލުކުރަން އޭނާއަށް ލަފާ ދީފައިވަނީ ޚުދް ސަލްމާން އެވެ.
"ބިގް ބޮސް"ގެ ގޭގައި އަހަރެން ހުރުމުން އަހަރެންނަށް މި ފުރުސަތު ލިބިފައި އޮތް ކަމެއް ނޭނގޭ. ޝޯ ނިމުމުން ސަލްމާން އަހަރެން ކައިރީ ބުނި ގޮސް ޝާހް ރުކް އާ ބައްދަލުކުރާށޭ. އޭރުން އެ ފިލްމާއި ފިލްމުގައި އަހަރެން ކުޅެން ޖެހޭ ރޯލާ ގުޅޭ މައުލޫމާތު ލިބޭނޭ،" ޕްރިޔަންކާ ކިޔައިދިނެވެ.
ޕްރިޔަންކާ އިތުރަށް ބުނި ގޮތުގައި "ޑުންކީ"ގެ ޑައިރެކްޓަރު ހިރާނީއާ ވެސް އޭނާ ވަރަށް އަވަހަށް ބައްދަލުކުރާނެ އެވެ. މިއީ ސަލްމާން އޭނާއަށް ހޯދައިދިން ފުރުސަތެއް ކަން ޕްރިޔަންކާ ޝުކުރުވެރިކަމާއެކު ފާހަގަ ކުރި އެވެ.
ޕްރިޔަންކާ ނޫނަސް "ބިގް ބޮސް"ގައި ބައިވެރިވި ބައެއް އެކްޓަރުންނަށް ސަލްމާން ވަނީ ފިލްމު ތަކުން ފުރުސަތު ހޯދައިދީފަ އެވެ. އެގޮތުން ޝެހެނާޒް ގިލް އަށް ސަލްމާންގެ "ކިސީ ކާ ބާއީ ކިސީ ކީ ޖާން" އިން ފުރުސަތު ދީފައި ވެއެވެ. އަދި "ބިގް ބޮސް 8"ގެ ކާމިޔާބުކުރި ގޯތަމް ގުލާޓީ އަށް ސަލްމާންގެ "ރާދޭ: ޔުއަ މޯސްޓް ވޯންޓަޑް ބާއީ" އިން ރޯލެއް ދީފައި ވެއެވެ.