ރާއްޖޭގެ އެންމެ ބޮޑެތި މުއްސަނދިން ހިމެނޭ އަދި ރިސޯޓުތަކުގެ ވެރިންގެ ޖަމިއްޔާ -- މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ މިހާރުގެ ބޯޑަށް އިތުރު ދައުރެއް ދޭން ނިންމައިފި އެވެ.
ކުރުނބާ މޯލްޑިވްސްގައި ރޭ ބޭއްވި މަޓީގެ އަހަރީ އާންމު ޖަލްސާގައި ބައިވެރި ބޭފުޅުންގެ އަގުލަބިއްޔަތުން ނިންމީ މަޓީގެ އެކްސްކޯގައި މިހާރު ތިއްބެވި 17 ބޭފުޅުންނަށް އިތުރު ދައުރެއް ދިނުމަށެވެ.
މަޓީގެ ޗެއާމަނަކީ ޔުނިވާސަލްގެ ގުރޫޕްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) އެވެ. ވައިސް ޗެއާމަނުންގެ ގޮތުގައި ތިއްބަވަނީ ޗަމްޕާ ގުރޫޕްގެ ހިއްސާދާރު ހުސައިން އަފީފް އާއި ވޮޔޭޖަސް މޯލްޑިވްސްގެ ހިއްސާދާރު ސޮލާހު ޝިހާބު އެވެ. ސެކްރެޓަރީ ޖެނަރަލަކީ ކްރައުން ކޮމްޕެނީގެ ހިއްސާދާރެއް ކަމަށްވާ އަހްމަދު ނަޒީރު އެވެ.
މިޖަލްސާގައި މަޓީގެ މެންބަރުން އެންމެ ބޮޑަށް ކަންބޮޑުވުން ފާޅުކުރެއްވީ ދައުލަތަށް ދައްކަންޖެހޭ ޓެކްސްގެ އަދަދު އަހަރުން އަހަރަށް އިތުރުވާއިރު އެ ނިސްބަތުން ލިބޭ އާމްދަނީ އިތުރު ނުވާ މައްސަލަ އެވެ.
މީގެއިތުރުން ދުނިޔޭގައި ހިނގަމުންދާ ހަނގުރާމަތަކާއި ގުޅިގެން ތެލާއި އަސާސީ މުދާ ރާއްޖެއިން ބޭރުން ލިބޭ އަގު ބޮޑުވުމުން ރިސޯޓުތަކުން ކުރަންޖެހޭ ހަރަދު ވަރަށް ބޮޑަށް އިތުރުވެފައިވާ ކަން ވެސް މަޓީގެ މެންބަރުން ވަނީ ފާހަގަކުރައްވާފަ އެވެ.
މަޓީ އަށް 40 އަހަރު ވެފައިވާއިރު ރާއްޖޭގެ ފަތުރުވެރިކަން ކުރިއަރުވާ ދެމެހެއްޓެނިވި ދާއިރާއެއްގެ ގޮތުގައި ފަތުރުވެރިކަން ކުރިއަށް ގެންދިއުމުގައި މަޓީން ގެންދަނީ ވަރަށް ބޮޑު ދައުރެއް އަދާކުރަމުންނެވެ.