ޓޫރިޒަމް ދާއިރާއިން ލިބޭ ބޭރު ފައިސާ ރާއްޖޭގެ ބޭންކްތަކަށް ޖަމާކުރަން މަރުކަޒީ ބޭންކް - މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކުރި ގަވާއިދު އެކުލަވާލާފައިވަނީ އެކަމުގައި ކުރިއަށް ގެންދިޔަ މަޝްވަރާތަކާ އެއްގޮތަށް ނޫންކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ބުނެފި އެވެ.
ރާއްޖޭގައި ރިސޯޓްތައް ހިންގާ ވެރިން ހިމެނޭ ޖަމިއްޔާ -- މަޓީން ބުނީ އިއްޔެ އެމްއެމްއޭއިން ގެޒެޓް ކުރި ގަވާއިދު އެކުލަވާލީ އެ އޮތޯރިޓީގެ އެދުމަށް އެކަމާ ގުޅުންހުރި ސްޓޭކްހޯލްޑަރުންނާއި މަޝްވަރާކޮށްފައި ކަމަށާއި ނަމަވެސް ގަވައިދު ގެޒެޓްކޮށްފައި އޮތީ މަޝްވަރާގައި ވާހަކަދެކެވުނު ގޮތަށް ނޫން ކަމަށެވެ.
އެމްއެމްއޭއާއެކު ބޭއްވި ބައްދަލުވުމުގައި ބޭރު ފައިސާއާ ބެހޭ އާ ގަވާއިދުގައި ހިމެނުމަށް އެމްއެމްއޭ އިން ހުށަހަޅާފައިވާ ހުށަހެޅުންތަކަކީ މަޓީއަށް އެއްބަސްވެވޭނެ ހުށަހެޅުންތަކެއް ނޫންކަމަށް ބުނެފައިވާނެ ކަމަށްވެސް އެ ޖަމިއްޔާއިން ބުންޏެވެ.
"ގަވާއިދު ގެޒެޓު ކުރެވުނުއިރު މި ޖަމްއިއްޔާގެ ފަރާތުން ހުށަހެޅި އެއްވެސް ކަންބޮޑުވުމަކަށް އެމްއެމްއޭގެ ފަރާތުން އިޖާބަ ދެއްވާފައި ނުވާކަން ފާހަގަކުރަން،" މަޓީން ބުނެ އެވެ.
މަޓީން ވަނީ ގައުމަށް ދިމާވާ ކޮންމެ ކަމެއްގައިވެސް އެ ޖަމިއްޔާގެ އެއްބާރުލުން ދޭނެކަމުގެ ޔަގީންކަންވެސް ދީފަ އެވެ.
އެމްއެމްއޭ އިން އެކުލަވާލި ގަވާއިދުގައިވާ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ އޭ ކެޓަރަގަރީގެ ވިޔަފާރިތަކަށް އަންނަ ކޮންމެ ފަތުރުވެރިއަކަށް 500 ޑޮލަރުގެ ރޭޓުން އަދި ބީ ކެޓަގަރީގެ ވިޔަފާރިތަކުން ކޮންމެ ފަތުރުވެރިއަކަށް 28 ޑޮލަރުގެ ރޭޓުން މަހެއްގެ މައްޗަށް ލިބޭ އާމްދަނީ ކޮންމެ މަހެއްގެ 28 ވަނަ ދުވަހުގެ ކުރިން ބޭންކަކުން ދިވެހި ރުފިޔާއަށް މާރުކުރަންޖެހޭނެ އެވެ.