ސްޓެލްކޯގައި ޓެކްނިކަލް ވަޒީފާތަކުގައި މަސައްކަތްކުރާ އަންހެން މުވައްޒަފުންނަށް ހާއްސަ އެލަވަންސެއް ދޭން ކުންފުނީގެ ބޯޑަށް ހުށަހެޅުއްވުމަށް ވިސްނަވާ ކަމަށް ކުންފުނީގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވެއްޖެ އެވެ.
ދުރު ނޫން މުސްތަގުބަލެއްގައި އެކަން ބޯޑަށް ހުށަހެޅުއްވުމަށް ވިސްނަވާ ކަމަށް ޝަރީފު ވަނީ ވިދާޅުވެފަ އެވެ.
ސްޓެލްކޯގައި 1،500 އެއްހާ މުވައްޒަފުން މަސައްކަތްކުރާއިރު ގާތްގަނޑަކަށް 250 މުވައްޒަފުންނަކީ އަންހެން މުވައްޒަފުންނެވެ.
ޝަރީފް ވިދާޅުވީ އަތޮޅުތަކުގައި މަސައްކަތްކުރާ ސްޓެލްކޯގެ އަންހެން މުވައްޒަފުންގެ އަދަދު މަދުކަމަށެވެ. ޓެކްނިކަލް މަގާމުތަކުގައި ހަމަހަމަ ފުރުސަތުތަކެއް ހުރި ނަމަވެސް އެ ފަދަ މަގާމުތަކަށް އަންހެނުން ނުކުންނަ މިންވަރު މަދުވާ ސަބަބެއްގެ ގޮތުގައި ފާހަގަކުރެއްވީ މުޖުތަމައުގެ ބައެއް މީހުން ދެކޭ ގޮތެވެ.
ޓެކްނިކަލް ވަޒީފާތަކުގައި މަސައްކަތްކުރާ އަންހެން މުވައްޒަފުންނަށް ހާއްސަ އެލަވަންސެއް ދޭން ކުންފުނީގެ ބޯޑަށް ހުށަހެޅުއްވުމަށް ވިސްނަވާ ކަމަށް ކުންފުނީގެ މެނޭޖިން ޑިރެކްޓަރު ވިދާޅުވި އިރު ސްޓެލްކޯއިން އެ ކުންފުނީގެ ހަރަދުގައި މި އަހަރު ހައްޖާއި އުމްރާގެ އަޅުކަން އަދާކުރުމުގެ ފުރުސަތު ހަތަރު މުވައްޒަފަކަށް ވަނީ ދީފަ އެވެ.
ހައްޖާއި އުމްރާގެ އަޅުކަން އަދާކުރުމުގެ ފުރުސަތު ލިބުނު މުވައްޒަފުން
- ހައްޖުގެ ފުރުސަތު: ފިރިހެން މުވައްޒަފު -- އަބްދުﷲ ޝަރީފު، ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓް
- ހައްޖުގެ ފުރުސަތު: އަންހެން މުވައްޒަފު -- ހަދީޖާ ތައުފީގާ، ފައިނޭންސް އެންޑް އެކައުންޓްސް ޑިޕާޓްމަންޓް
- އުމްރާގެ ފުރުސަތު: ފިރިހެން މުވައްޒަފު -- ޝާހުލް ހަމީދު، ސާވިސް ސެންޓަރު
- އުމްރާގެ ފުރުސަތު: އަންހެން މުވައްޒަފު -- ފާތިމަތު ރިޒްނާ، ޕްރޮކިއުމަންޓް ޑިޕާޓްމަންޓް
ހައްޖާއި އުމްރާގެ އަޅުކަން އަދާކުރުމަށް އަންހެން މުވައްޒަފުންނާއި ފިރިހެން މުވައްޒަފުންނަށް ސްޓެލްކޯއިން ވަނީ ފުރުސަތު ހުޅުވާލީ ވަކިވަކިންނެވެ.