ރިސޯޓް ތަރައްގީކުރަން ޓޫރިޒަމް މިނިސްޓްރީން މިދިޔަ ޖެނުއަރީގެ ތެރޭގައި ހުޅުވާލި ރަށްތަކުގެ ތެރެއިން ދެ ރަށަކަށް ބޮޑު ތަރުހީބެއް ލިބިއްޖެ އެވެ. އެއީ ހއ. އަލިދުއްފަރުފިނޮޅާއި ތ. އޮޅުފުށްޓެވެ. އޮޅުފުށި ބީލަމަށްލީ އޮޅުފުށްޓާއި އޮޅުފުށި ފިނޮޅުވެސް ހިމެނޭ ގޮތަށެވެ.
ޓޫރިޒަމް މިނިސްޓްރީން ބުނީ އަލިދުއްފަރުފިނޮޅަށް ފަސް ފަރާތަކުން އަދި އޮޅުފުށްޓަށް ތިން ފަރާތަކުން ބިޑް ހުށައަޅާފައިވާ ކަމަށެވެ.
އަލިދުއްފަރުފިނޮޅު ބީލަމަށް ހުޅުވާލީ ލީޒް އެކުއިޒިޝަން ކޯސްޓްގެ ގޮތުގައި އެންމެ ކުޑަކޮށް ހުށަހެޅޭނީ 350،000 ޑޮލަރު ކަމަށް ޖެހުމަށްފަހު އެވެ. ތ. އޮޅުފުށްޓަށް ލީޒް އެކުއިޒިޝަން ކޯސްޓްގެ ގޮތުގައި އެންމެ ކުޑަކޮށް ހުށަހެޅޭނީ 700،000 ޑޮލަރު ކަމަށްވެސް ބީލަމަށް ހުޅުވާލި އިއުލާންގައިވެ އެވެ.
ޓޫރިޒަމް މިނިސްޓްރީން ބުނީ އަލިދުއްފަރުފިނޮޅަށް އެންމެ ބޮޑު ލީޒް އެކުއިޒިޝަން ކޯސްޓް ދެއްކި ފަރާތުން ލީޒް އެކުއިޒިޝަން ކޯސްޓްގެ ގޮތުގައި އެރަށަށް ދައްކަންޖެހޭ އެންމެ ދަށް އަދަދަށްވުރެ 585.7 ޕަސަންޓް ބޮޑުކޮށް ދައްކާފައިވާ ކަމަށެވެ. އޮޅުފުށްޓަށް އެންމެ ބޮޑު ލީޒް އެކުއިޒިޝަން ކޯސްޓް ދެއްކި ފަރާތުން ލީޒް އެކުއިޒިޝަން ކޯސްޓްގެ ގޮތުގައި އެރަށަށް ދައްކަންޖެހޭ އެންމެ ދަށް އަދަދަށްވުރެ 114.2 ޕަސަންޓް ބޮޑުކޮށް ދައްކާފައިވާ ކަމަށްވެސް މިނިސްޓްރީން ބުންޏެވެ.
ޓޫރިޒަމް މިނިސްޓްރީން މިދިޔަ ޖެނުއަރީ މަހު ރިސޯޓް ތަރައްގީކުރަން ހުޅުވާލި ތަންތަނުގެ ތެރޭގައި ފ. ނިލަންދޫ ފަޅު އަދި ކ. ކާށިދޫ ފަޅު ހިއްކައިގެން އެ ދެ ފަޅުތެރޭގައި ރިސޯޓް ހެދުމަށް ބޭނުންވާ ފަރާތްތަކަށް ވެސް އެ ފުރުސަތު ހުޅުވާލި އެވެ. މިއީ ރާއްޖޭގައި އަދި މުޅިން އަލަށް ނިންމި ނިންމުމެކެވެ.
ބީލަމަށް ހުޅުވާލި ރަށްތަކާއި ފަޅުތަކުގެ އެންމެ ކުޑަ އަގު
- ހއ. އަލިދުއްފަރު ފިނޮޅު: 350،000 ޑޮލަރު
- ހއ. މެދަފުށި: 875،000 ޑޮލަރު
- ހދ. ކުޑަފަރު ފަސްގަނޑު: 200،000 ޑޮލަރު
- ރ. އެއްތިގިލި(އަލިފުށި ފަޅުން ބައެއް ލައިގެން): 250،000 ޑޮލަރު
- ކ. ކާށިދޫ ފަޅު: 2،250،000 ޑޮލަރު
- މ. ބޯހުރާ: 288،500 ޑޮލަރު
- ފ. ނިލަންދޫ ފަޅު: 2،250،000 ޑޮލަރު
- ފ. ނިލަންދޫ ފަޅުން ދެވަނަ ރިސޯޓެއް ހަދަން: 2،250،000 ޑޮލަރު
- ތ. އޮޅުފުށި އަދި އޮޅުފުށި ފިނޮޅު: 700،000 ޑޮލަރު
- ގއ. ބޭރަމައުއްޑޫ: 431،200 ޑޮލަރު
- ގއ. ފުނަދޫ ވިލިގިއްލަ: 700،000 ޑޮލަރު
- ގދ. ކަޅެހުއްޓަ: 575،300 ޑޮލަރު
- ގދ. ހާދުއާ: 560،900 ޑޮލަރު
- ގދ. ފެރޭތަ ވިލިނގިލި: 700،000 ޑޮލަރު
ޓޫރިޒަމް މިނިސްޓްރީގެ ބީލަން ލިސްޓްގައި ހިމެނޭ މި ރަށްތަކަކީ މިދިޔަ އަހަރުވެސް ބީލަމަށް ހުޅުވާލި ރަށްތަކެކެވެ. ރިސޯޓް ތަރައްގީ ކުރުމަށް އޭރު ހުޅުވާލުމުން ލިބުނު ބިޑްތަކުގެ ޝަރުތު ހަމަ ނުވުމުންނާއި ބައެއް ރަށްތަކަށް ބިޑް ނުކުރުމުން އެ ރަށްތައް ދޫކޮށްފައެއް ނުވެ އެވެ.
ރިސޯޓް ތަރައްގީ ކުރުމަށް ދޫކުރާ ރަށްތައް ވިއްކުމުގައި އެންމެ ބޮޑަށް ބަލާނީ އެންމެ މަތީ އަގު ހުށަހަޅާ ފަރާތަކަށެވެ. ލިބޭ ޕޮއިންޓްގެ 60 އިންސައްތަ އަކީ އެންމެ މަތިން އަގު ހުށަހަޅާ ފަރާތަކަށް ދޭ ޕޮއިންޓެވެ. ދެން ޕޮއިންޓް ދޭ ކަންތައްތަކުގެ ތެރޭގައި ތިމާވެށީގެ ކަންކަމާއި މުވައްޒަފުން ތަމްރީން ކުރުމާއި އިޔާދަކުރަނިވި ހަކަތަ އަށް އިސްކަންދޭ މިންވަރު ހިމެނެ އެވެ.