ފަރްހާން އަޚްތަރު ލިޔެ ޑައިރެކްޓްކުރާ "ޑޮން 3" ނުކުޅެން ޝާހް ރުކް ޚާން ނިންމުމާ ގުޅިގެން އެ ފިލްމުގެ ބަތަލަކަށް ރަންވީރު ސިންގް ހަމަޖައްސައިފި ކަމަށް އިންޑިޔާގެ ނޫސްތަކުން ބުނެފި އެވެ.
"ޑޮން"ގެ އެއް ވަނަ ފިލްމާއި ދެ ވަނަ ފިލްމަށް ބޮޑު ތަރުހީބެއް ލިބި، މީގެ ތިން ވަނަ ފިލްމަކަށް ފޭނުން އިންތިޒާރުކުރާތާ އެތައް އަހަރެއް ވެފައި ވަނިކޮށް ޕްރޮޑިއުސަރު ރިތޭޝް ސިދުވާނީ ދާދިފަހުން ވަނީ ތިން ވަނަ ބައި ވަރަށް އަވަހަށް ފަށަން އުޅޭކަމަށް ބުނެފަ އެވެ.
ފިލްމުގެ ސްކްރިޕްޓް ލިޔެ ނިމެން ކައިރިވެފައިވާއިރު ޝާހް ރުކް ފިލްމުގައި ބައިވެރިވާން ބޭނުން ނުވާ ކަމުގެ އަޑުތައް ވަނީ ގަދަވެފަ އެވެ. އަދި ޝާހް ރުކްގެ ބަދަލުގައި ރަންވީރު "ޑޮން"ގެ ބައި ކުޅެން ހަމަޖެހިފައިވާ ކަމަށާއި މި ފިލްމު ކުޅެން އޭނާއަށް ލިބިފައިވާކަމަށް ރަންވީރު ބުނި ކަމަށް ވެސް ޚަބަރުތައް ބުނެ އެވެ.
ރަންވީރު އަކީ "ޑޮން 3" ޕްރޮޑިއުސްކުރާ އެކްސެލް އެންޓަޓައިންމަންޓްގެ ފޭވަރިޓް އެކްޓަރުންގެ ތެރެއިން އެއްވަނައިގައިވާ އެކްޓަރެވެ. ވީމާ ޝާހް ރުކް ނުކުޅޭނަމަ "ޑޮން 3" އޭނާއަށް ދިނުމަކީ ވަރަށް އެކަށީގެންވާ ކަމެކެވެ. މީގެ ކުރިން ރަންވީރު ވަނީ އެ ކުންފުނީގެ ދެ ފިލްމެއް ކުޅެފަ އެވެ. އެއީ "ގަލީ ބޯއީ" އާއި "ދިލް ދަޅަކްނޭ ދޯ" އެވެ.
މި ފިލްމުގެ ޕްރޮމޯޝަނަލް ވީޑީއޯއެއް ރަންވީރު މިހާރު ޝޫޓްކޮށްފައިވާ ކަމަށާއި ވަރަށް އަވަހަށް މި ވީޑިއޯ އާއެކު ފިލްމު ރަސްމީކޮށް އިއުލާން ކުރާނެ ކަމަށް ވެއެވެ.
"ޑޮން"ގެ ފުރަތަމަ ފިލްމު ރިލީޒްކުރީ 2006 ގައެވެ. އަދި ދެ ވަނަ ފިލްމު 2011 ގައެވެ. މި ދެ ފިލްމުގައި ވެސް ލީޑް ރޯލު ކުޅުނީ ޝާހް ރުކް އާއި ޕްރިޔަންކާ ޗޯޕްރާ އެވެ.
"ޑޮން"ގެ އޮރިޖިނަލް ފިލްމު ކުޅެފައިވަނީ 1978 ގައި އަމީތާބު ބައްޗަން އެވެ. މި ފިލްމާ ވާދަކުރެވޭ ވަރުގެ "ޑޮން" އެއް މިހާތަނަށް އެއްވެސް މީޙަކަށް އުފެއްދިފައި ނުވާ ކަމަށް އަމީތާބުގެ ފޭނުން ބުނެ އެވެ.