ދެހާސް ބާރަވަނަ އަހަރުގެ ފެބުރުއަރީ މަހުގެ ހަތްވަނަ ދުވަހު، ކަރުނަ ގޭހާއި ގޭންގްތަކުގެ ވަޅިތަކުގެ މައްޗަށް ނިކުމެ ކުރީ ސަފުގައި މަސައްކަތްކުރި "ކަޓް އޮފް" ޓީމަށް ހޯމް މިނިސްޓަރު އުމަރު ނަސީރު ޝުކުރު އަދާކުރައްވައިފި އެވެ.
އެ ދުވަހަކީ އޭރުގެ ރައީސް މުހައްމަދު ނަޝީދު އިސްތިއުފާ ދެއްވި ދުވަހެވެ. އުމަރަކީ އޭރު ވެރިކަމުގައި ހުންނެވި މުހައްމަދު ނަޝީދު އާ ދެކޮޅަށް އިދިކޮޅު ފަރާތްތަކުން ކުރި މުޒާހަރާގައި އިސްކޮށް ހަރަކާތްތެރިވި ބޭފުޅެކެވެ. ރައީސް ނަޝީދު ވެރިކަމުން ވަކިވިއިރު އުމަރު ހުންނެވީ ޕީޕީއެމްގެ އިންތިގާލީ ނައިބު ރައީސްގެ މަގާމުގަ އެވެ.
މިއަދު އުމަރު ކުރެއްވި ޓްވީޓެއްގައި ވިދާޅުވެފައިވަނީ، ހަތެއް ފެބުރުއަރީގައި އިސްލާމްދީނާއި ޑިމޮކްރަސީ އަދި ގާނޫނު އަސާސީގެ ހިމާޔަތުގައި ގުރުބާންވި އެންމެންނަށް ޝުކުރުއަދާކުރައްވާ ކަމަށެވެ. އަދި ހާއްސަކޮށް އެދުވަހުގެ ގްރައުންޑް ލީޑަރުންނަށް ޝުކުރު އަދާކުރައްވާ ކަމަށް ވިދާޅުވި އެވެ.
އުމަރު ވިދާޅުވީ، އެ ދުވަހު ރައްޔިތުންގެ ބާރުން ގެނެސްފައިވަނީ އިންގިލާބެއް ކަމަށާއި އެ ދުވަހު، ޑިކްޓޭޓަރެއް ވަނީ އަމިއްލައަށް އިސްތިއުފާ ދެއްވާ، މަގާމުން އަމިއްލައަށް ދުރުވެފަ ކަމަށެވެ.
އުމަރަކީ އަބަދުވެސް ހަތެއް ފެބުރުއަރީގެ ހަނދާންތައް އާކޮށް އެދުވަހަކީ ރާއްޖެއަށް ފަހުރުވެރި ދުވަހެއް ކަމަށް ވިދާޅުވާ ބޭފުޅެކެވެ. ހަތެއް ފެބުރުއަރީއާ ގުޅޭގޮތުން މީގެކުރިން އުމަރު ވިދާޅުވެފައިވަނީ، ރާއްޖެ އާއި، އިސްލާމްދީން އަދި ގާނޫނު އަސާސީ އަށް ވެސް ފަހުރުވެރި ދުވަހެއް ކަމަށެވެ.
އާދަމް ޝަރީފު އުމަރު
ފެބުރުއަރީ 7 ގެ ކުރީ ސަފުގައި މަސައްކަތްކުރި ޓީމަށް އުމަރުގެ ޝުކުރު
Feb 7, 2016
ހޯމް މިނިސްޓަރު އުމަރު ނަސީރު (މ)