ސިޔާސީ ޕާޓީތަކުން ވިޔަފާރި ކުރަން ފެށުން ވާނީ ކޮރަޕްޝަނަށް އިތުރުކޮށްލެވޭ ބޮޅަކަށް ކަމުގައި ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު ނަސީރު މިހެން ވިދާޅުވީ އާމްދަނީ ހޯދުމަށް ވިޔަފާރިއެއް ފެށުމަށް އެމްޑީޕީގެ ގައުމީ މަޖިލީހުގެ ބައްދަލުވުމެއްގައި ނިންމާފައި ވަނިކޮށެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އުމަރު ނަސީރު ވިދާޅުވީ ސިޔާސީ ޕާޓީތަކަކީ ވިޔަފާރިކޮށް، ބޭސްފަރުވާ ކޮށްދީ، ހިލޭ އެހީ ދީ، ގޭގެއަށް ވަދެ ރޮށި ފިހެދީ ހަދާ ބަޔެއް ކަމަށް މި ޤައުމުގައި ހީވެފައި އޮންނަ އޮތުމަކީ ވަރަށް ބޮޑު ކުށްހީއެއް ކަމަށެވެ.
"މީގެ ސަބަބުން ޕާޓީތަކުގެ ވެރިކަންތަކުގައި ކޮރަޕްޝަން އާއި ނާޖާއިޒު ފައިދާ ހޯދުން މިވަނީ އާންމު ވެފައެވެ. ޕާޓީތަކުން ވިޔަފާރި ކުރަން ފެށުންވާނީ ކޮރަޕްޝަން އަށް އިތުރުކޮށްލެވޭ ބޮޅަކަށެވެ." އުމަރު ނަސީރު ވިދާޅުވި އެވެ.
ޕާޓީތައް އުފެދުނު ފަހުން ރާއްޖެއަށް އަންނަ އިންވެސްޓަރުންނާ ދިވެހި ވިޔަފާރިތަކުން ޕާޓީއަށް ހޯދާ 'އެހީ' ގެ ނަމުގައި ރިޝްވަތު ނެގުން އާއްމުވެފައިވާ ކަމަށް އޭނާ ވިދާޅުވި އެވެ.
އުމަރު ނަސީރު ވިދާޅުވީ 20 އަހަރު ފުރެން އަންނަ މަލްޓި ޕާޓީ ޑިމޮކްރަސީގެ ސަބަބުން ޤައުމަށްވީ ފައިދާއެއް ނެތް ކަމަށެވެ.
"ފައިދާވީ ޕާޓީ ތަކަށެވެ. ޕާޓީތައް ވަށައިގެން އެބުރޭ މީހުންނަށް، ހަމައެއް ލަމައެއް ނެތި ވަޒީފާތައް ބަހާ، ފަޅުރަށްތަށް ބަހާ، ބިންތަށް ބަހާ، ފްލެޓްތައް ބަހާ، ދައުލަތުގެ ކޮންޓްރެކްޓްތައް ދީ، ކޮންމެ ޕާޓީއަކުންވެސް އެ ބަޔެއްގެ ފަސް އަހަރު މުޅި ދައުލަތް ލޫޓުވާލާތީ މި ޤައުމު މިވަނީ ދަރާފައެވެ." އުމަރު ނަސީރު ވިދާޅުވި އެވެ.
އެކަމުގެ ސަބަބުން އަހުލާގާއި މަސައްކަތްތެރިކަމާއި މުރާލިކަން ގެއްލިފައިވާ ކަމަށް އޭނާ ވިދާޅުވި އެވެ.
އުމަރު ނަސީރު ވިދާޅުވީ ޕާޓީއަށް ވެރިކަން ލިބިއްޖެނަމަ މަސައްކަތެއް ކުރަން ނުޖެހޭ ބޮޑު މުސާރަ ހިނގާ ވަޒީފާ ލިބޭނެކަން ކަށަވަރުވާތީ، ޕާޓީތަކަށް ގުލާންކޮށްދިނުން އެއީ، ދާ އޮހޮރައިގެން މަސައްކަތެއް ކުރުމަށްވުރެ ފަސޭހަ ކަމަކަށް ވެފައިވާ ކަމަށެވެ.
އޭނާ ވިދާޅުވީ ދެކޮޅު ނުޖެހޭ އިސްރާފުގެ ޕްރޮޖެކްޓްތަކާ، ބޭކާރު ވަޒީފާތަކާ، ކޮރަޕްޝަން ނޫން އެއްޗެއް މަލްޓި ޕާޓީ ސިސްޓަމަށް ގެނެސްދެވިފައި ނެތް ކަމަށާއި ޕާޓީތަކުން އަލަށް ކިޔާދޭނެ ވާހަކައެއް އަލަށް ނެރޭނެ ސްލޯގަން އެއް ނެތް ކަމަށެވެ.
އޭނާ ވަނީ 2028 ވަނަ އަހަރުގެ ރިޔާސީ އިންތިހާބުގައި ހުރިހާ ސިޔާސީ ޕާޓީތަކަށް ދިވެހިން ނޫނެކޭ ބުނާނެ ކަމަށްވެސް ވިދާޅުވެފަ އެވެ.