އިލެކްޝަންސް ކޮމިޝަން

އީސީގެ މެންބަރު ކަމަށް ރައީސް ބޭނުންފުޅުވީ ނަޝާތު

އިލެކްޝަންސް ކޮމިޝަން (އީސީ)ގެ މެންބަރު އއ. ފެރިދޫ، ހާލި، އަލީ ނަޝާތުގެ މެންބަރުކަމުގެ ދައުރު ހަމަވާތީ އޭނާ އަލުން އެ މަގާމަށް އައްޔަންކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ރައްޔިތުންގެ މަޖިލީހަށް ހުށަހަޅުއްވައިފި އެވެ.

އަލީ ނަޝާތުގެ މެންބަރު ކަމުގެ ދައުރު ހަމަވާނީ ޖުލައި 25 ވަނަ ދުވަހު އެވެ.

ނަޝާތުގެ މެންބަރުކަމުގެ ދައުރު ހަމަވާތީ އީސީގެ މެންބަރުކަމަށް ކުރިމަތިލުމުގެ ފުރުސަތު ރައީސް އޮފީހުން މިމަހު ހުޅުވާލި އެވެ.

އީސީގެ މެންބަރު ކަމަށް ކުރިމަތިލެއްވި ބޭފުޅުންގެ ތެރެއިން ރައީސް ސޯލިހް އިސްކަން ދެއްވާފައިވަނީ ނަޝާތު އަށެވެ.

އިލެކްޝަންސް ކޮމިޝަންގެ މެންބަރު ކަމަށް ކުރިމަތިލެއްވި ބޭފުޅުން

  • ޒީނާ ޒާހިރު / އަތިރީގެ، ގދ. ގައްދޫ
  • މުހައްމަދު ޝާފިއު / ޝަރުތު، ބ. ތުޅާދޫ
  • މުހައްމަދު ޝިހާބު / ހޯދަޑު، ރިހިދޫލަގެ، ޏ. ފުވައްމުލައް
  • އާމިނަތު ހަސަން / މ. މިރުސްގަސްދޮށުގެ
  • ހަދީޖާ ނައީމް / މ. ރަންވަރަ
  • މުހައްމަދު ޝަފީއު / ވައިޖެހޭގެ، ހއ. އިހަވަންދޫ
  • އަލީ މުހައްމަދުމަނިކު / ދަފްތަރު ނަންބަރު ރސ. 1851

ރައްޔިތުންގެ މަޖިލީހުގެ މިއަދުގެ ޖަލްސާގައި މި މައްސަލަ ދިރާސާކުރުމަށް ވަނީ މިނިވަން މުއައްސަސާތަކުގެ ކޮމިޓީއަށް ފޮނުވާފަ އެވެ.

އީސީގެ މެންބަރު ކަމަށް އަލީ ނަޝާތު އައްޔަންކޮށްފައިވަނީ ޖުލައި 25، 2018ގަ އެވެ.