އެމެރިކާ އިސްވެ މެދުއިރުމަތިގައި އުފައްދާފައި އޮތް މެރިޓައިމް ސެކިއުރިޓީ ކޯލިޝަނުން ޔުނައިޓެޑް އަރަބް އެމިރޭޓްސް (ޔޫއޭއީ) މީގެ ދެމަސް ދުވަސް ކުރިން ވަކިވެފައިވާ ކަމަށް އެ ގައުމުގެ ޚާރިޖީ ވުޒާރާއިން ބުނެފި އެވެ.
މިއީ 38 ގައުމެއްގެ އެއްބާރުލުމާ އެކު އެމެރިކާ ނަގާކިޔުމާ އެކު އުފައްދާފައި އޮތް ކޯލިޝަނެކެވެ. ހެޑްކުއާޓަރު ހުންނަނީ ބަހްރޭނުގަ އެވެ.
ރިޕޯޓްތައް ބުނާ ގޮތުން މި ކޯލިޝަނުން ޔޫއޭއީ ވަކިވީ އެމެރިކާގެ އޮފިޝަލުންނާ މެދު އޮތް ނުތަނަވަސް ކަމެއްގެ ސަބަބުންނެވެ.
ހުޅަނގުގެ ނޫސްތަކުން ބުނާ ގޮތުން މިދާކަށް ދުވަހު ޕާސިއަން ގަލްފްގައި ދަތުރުކުރަމުންދިޔަ ތެޔޮ ޓޭންކަރެއް، އިރާންގެ އަސްކަރީއްޔާ އިން ހިފެހެއްޓުމާ ގުޅިގެން ޔޫއޭއީ އިން ވަނީ ކޯލިޝަންގެ ގާބިލުކަމާ މެދު ޝައްކު އުފައްދާފަ އެވެ.
އެމެރިކާގެ ކަނޑުގެ ސިއިން މެދުއިރުމަތީގައި ކޯލިޝަން ދަމަހައްޓާ ގޮތާ މެދު ނުތަނަވަސްކަމެއް ނެތް ކަމަށް ޔޫއޭއީގެ ފޮރިން މިނިސްޓްރީން ނެރުނު ބަޔާނެއްގައި އޮތީ ބުނެފަ އެވެ. އަދި ޔޫއޭއީ ކޯލިޝަނުން ވަކިވީ ވަގުތީ ގޮތުން ކަމަށްވެސް ވަނީ ބުނެފަ އެވެ.
ޔޫއޭއީ މި ކޯލިޝަނުން ވަކިވުން އެމެރިކާއަށް ވަރަށް ބޮޑު ކަންބޮޑުވުމަކަށް ވާނެ ކަމަށް ޚަބަރުތައް ބުނެ އެވެ. އަދި ކޯލިޝަނުގައި ކުނިޖެހި އުފެދިފައި އޮތް ހަގިގީ މައްސަލަ ފޮރުވުމަށް އެމެރިކާގެ އޮފިޝަލުން މިހާރު ތިބީ މެދުއިރުމަތީގަ އެވެ.
އެމެރިކާގެ އޮފިޝަލުން ބުނާ ގޮތުން މެރިޓައިމް ކޯލިޝަނުން ޔޫއޭއީ ވަކިވީ ވަގުތީ ގޮތުންނެވެ. އަދި އަމަލީ ހަރަކާތްތަކުން ޔޫއޭއީ ވަކިވި ނަމަވެސް، ކޯލިޝަންގެ ފުރިހަމަ މެމްބަރެއް ގޮތުގައި ޔޫއޭއީ ދެމިއޮންނާނެ އެވެ.
ބައެއް ރިޕޯޓްތައް ބުނާ ގޮތުން އީރާނަށް ދަތިކުރަން ކަމަށް ބުނެ އެމެެރިކާ ހަދަނީ ދޮގުކަން ޔޫއޭއީއަށް އެނގެ އެވެ. އަދި އިރާނާ ދެކޮޅަށް އެކަށިގެންވާ ވަރުގެ ފިޔަވަޅުތަކެއް އެމެރިކާއިން އަޅާފައެއް ނުވެ އެވެ.
ޔުނައިޓެޑް އަރަބް އެމެރޭޓްސް އާއި އީރާންއާ ދެމެދު އޮތް ނުތަނަވަސްކަން ފިލުވާލުމަށް ދެ ގައުމުގެ ޚާރިޖީ ވަޒީރުން ބައްދަލުކުރެއްވި ވާހަކަ ވެސް މި ސުރުޚީގެ ތެރެއަށް ވަދެ އެވެ. ޕާސިއަން ގަލްފްގައި އީރާނަށް މިހާރަށް ވުރެ ފުޅާ ދައުރެއް އޮތުމަކީ ޔޫއޭއީއަށް އެންމެ ރަނގަޅު ކަމެއް ކަމަށް ވެސް ޚަބަރުތައް ބުނެ އެވެ.
މިހެންކަމުން، އެމެރިކާ އިސްވެ މެދުއިރުމަތީގައި ހިންގާ މެރިޓައިމް ކޯލިޝަނުން ޔުނައިޓެޑް އަރަބް އެމިރޭޓްސް ވަކިވި ހަގީގީ ސަބަބު އަދި މުޅިން ސާފެއް ނުވެ އެވެ.