ސައުދީ އަރަބިއްޔާގެ ޝޫރާ ކައުންސިލްގެ ރައީސް ޑރ. އަބްދުﷲ ބިން މުހައްމަދު ބިން އިބްރާހިމް އަލް ޝެއިހް ރާއްޖޭގެ އިސްލާމިކް ޔުނިވާސިޓީއަށް ޒިޔާރަތް ކުރައްވާ އެ ޔުނިވާސިޓީއަށް ދެއްވި އެއް ލައްކަ ޑޮލަރު (ގާތްގަނޑަކަށް 1.5 މިލިޔަން ރުފިޔާ) ރަސްމީކޮށް އެޔުނިވާސިޓީ އާއި ހަވާލުކުރައްވައިފި އެވެ.
މިއަދު އެޔުނިވާސިޓީގައި އޮތް ހާއްސަ ރަސްމިއްޔާތެއްގައި އެ ފައިސާ އާއި ހަވާލުވެވަޑައިގެންނެވީ ވައިސް ޗާންސެލަރ ޑރ. މުހައްމަދު ޝަހީމް އަލީ ސައީދެވެ.
މި ރަސްމިއްޔާތުގައި ވާހަކަ ދައްކަވަމުން ޝަހީމް ވިދާޅުވީ މިއީ ބައިނަލްއަގުވާމީ ފަރާތްތަކުން އެޔުނިވާސިޓީއަށް އެހީއެއް ވެދެއްވި ފުރަތަމަ ފަހަރު ކަމަށާއި މިއީ ޑރ. އަބުދުﷲގެ އަމިއްލަފުޅު ޖީބުން ހަދިޔާ ކުރެއްވި ފައިސާ ކަމަށެވެ.
އަދި ސައުދީ ސަރުކާރުގެ ފަރާތުން ދާދި އަވަހަށް އެހީތެރިކަން ލިބޭނެ ކަމަށާއި އަލް އަޒްހަރު ޔުނިވަސިޓީ އާއި ސައުދީ އަރަބިއްޔާ އަދި އިސްލާމީ އެހެނިހެން ގައުމުތަކުން ޕްރޮފެސަރުން ޖޫން މަހުން ފެށިގެން އެ ޔުނިވާސިޓީގައި ކިޔަވައިދެއްވާނެ ކަމަށް ޝަހީމް ވިދާޅުވި އެވެ. އަދި ސައުދީ އަރަބިއާގެ ސަރުކާރުގެ ފަރާތުން ޔުނިވަރސިޓީގެ ތަރައްގީއަށް މާލީ އެހީ އާއި ކިޔަވައިދެއްވާ ޕްރޮފެސަރުންނާއި ދަރިވަރުންގެ ކުރިއެރުމަށް ބޭނުންވާ ފަންނީ އެހީތެރިކަންވެސް ދާދިއަވަހަށް ލިބިގެންދާނެކަމަށް ވިދާޅުވި އެވެ.
އިސްލާމިކް ޔުނިވާސިޓީގައި ޓްރަސްޓް ފަންޑެއް ގާއިމްކުރަން ނިންމާފައިވާ ކަމަށް އެޔުނިވާސިޓީން މައުލޫމާތު ދެ އެވެ.
ސައުދީގެ ޝޫރާ ކައުންސިލްގެ ރައީސް ޑރ. އަބްދުﷲ ބިން މުހައްމަދު ބިން އިބްރާހިމް އަލް ޝެއިހް ރާއްޖޭގެ އިސްލާމިކް ޔުނިވާސިޓީއަށް ޒިޔާރަތް ކުރައްވާ އެ ޔުނިވާސިޓީއަށް ދެއްވި އެއް ލައްކަ ޑޮލަރު ރަސްމީކޮށް އެޔުނިވާސިޓީ އާއި ހަވާލުކުރައްވަނީ.-- އަވަސް ފޮޓޯ: އަހްމަދު ޝުރާޢު