ދަ ޑިމޮކްރެޓްސްގެ ރިޔާސީ ކެންޑިޑޭޓް ކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބް ހަމަޖެއްސުމަށް އެ ޕާޓީގެ އާންމު މެންބަރުން ރުހުން ދީފި އެވެ.
ޑިމޮކްރެޓުންގެ ރިޔާސީ ޕްރައިމަރީއަށް ހުޅުވާލުމުން ފޯމު ހުށަހެޅުއްވީ އިލްޔާސް އެކަންޏެވެ.
ދަ ޑިމޮކްރެޓްސްގެ އަސާސީ ގަވައިދުގައިވާ ގޮތުން ޕްރައިމަރީއަށް އެއް ކެންޑިޑޭޓަކު ކުރިމަތިލައިފިނަމަ އާންމު މެންބަރުންގެ ފެންނަ ނުފެންނަ ވޯޓެއް ނަގައި އެ ވޯޓުގައި މެންބަރުންގެ 10 ޕަސެންޓް ވޯޓު އެ ކެންޑިޑޭޓަކަށް ލިބެންޖެހެ އެވެ.
މުޅި ރާއްޖޭގައި މިއަދު ކުރިއަށް ގެންދިޔަ ދަ ޑިމޮކްރެޓުންގެ ރިޔާސީ ޕްރައިމަރީގައި 3،208 މީހުން ވޯޓުލާފައިވެ އެވެ. މީގެތެރެއިން 3،041 މީހުން ވަނީ ޑިމޮކްރެޓުންގެ ރިޔާސީ ޓިކެޓް އިލްޔާސްއަށް ދިނުމަށް ފެންނަ ކަމަށް ވޯޓު ދެއްވާފަ އެވެ. އިލްޔާސް އަށް ޓިކެޓް ދޭން ނުފެންނަ ކަމަށް 153 މީހަކު ވޯޓު ދީފައިވާއިރު ނުވަ ވޯޓް ވަނީ ބާތިލްވެފަ އެވެ.
އެމްޑީޕީގައި ކުރިން އިސްކޮށް މަސައްކަތް ކުރެއްވި ބޭފުޅުންތަކެއް އެ ޕާޓީން ވަކިވެވަޑައިގެން ދަ ޑިމޮކްރެޓްސް އުފެއްދުމަށްފަހު ރިޔާސީ އިންތިހާބުގައި ވާދަކުރާނެ ކަމަށް ކުރިންވެސް އިއުލާންކުރި އެވެ.
ކުރިއަށް އޮތް ރިޔާސީ އިންތިހާބު ކާމިޔާބު ކުރާނެ ކަމަށްވެސް ޑިމޮކްރެޓުން ދަނީ ބުނަމުންނެވެ.