ރާއްޖެއާއި މިއަދު ގުޅާލި ދިވެހި ސަރުކާރުގެ ފުރަތަމަ ސަބްމެރިން ކޭބަލްގެ ހިދުމަތް ފެށުމާއެކު އިންޓަނެޓާއި މުއާސަލާތ ހިދުމަތް ހޯދުމަށް ކުރާ ހަރަދު ބޮޑުތަނުން ކުޑަކުރެވި އިންޓަނެޓް ސްޕީޑް މިހާރަށް ވުރެ ދެގުނަ ހަލުވި ކުރެވޭނެ ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރާއްޖޭގެ ސަބްމެރިން ކޭބަލް "އިންޑިއާ އޭޝިއާ އެކްސްޕްރެސް ސަބްމެރިން ކޭބަލް" ހުޅުމާލޭގައި ހުންނަ އޯޝަން ކަނެކްޓް މޯލްޑިވްސްގެ ކެބަލްލޭންޑިންގް ސައިޓަށް ރަސްމީކޮށް ގުޅާލުމަށްފަހު ރައީސް ސޯލިހް ވިދާޅުވީ މިއަދު ހަގީގަތަކަށް ވެގެން މިދިޔައީ ޑިޖިޓަލް ދިވެހި ޖީލެއްގެ ފެށުން ކަމަށެވެ.
"މި ސަބްމެރިން ކޭބަލްއާ އެކު ދިވެހި ރައްޔިތުންނާ އެކު ވަކިން ހާއްސަކޮށް ދިވެހި ޒުވާނުން ގޮވައިގެން އަޅުގަނޑުމެން ދަތުރު މިފަށަނީ މުޅިން އާ ދުނިޔެއަކަށް. މިއީ ހަމައެކަނި މުއާސަލާތީ ގޮތުން ކުރެވޭ ކަމެއް ނޫން،" ރައީސް ވިދާޅުވި އެވެ.
ރައީސް ވިދާޅުވި ކުރިއަރާފައިވާ ގައުމުތައް ތަރައްގީގެ މަގުގައި ކުރިއަރާފައިވަނީ ޑިޖިޓަލް ދުނިޔެއަކަށް އިސްކަން ދިނުމުން ކަމަށެވެ. އެކަމަކު ދިވެހިން މިއަދުވެސް އުޅެން ޖެހިފައިވަނީ އިންޓަނެޓުގެ ސްޕީޑާއި މޯބައިލް ރޭންޖު ނުލިބިގެން ކަމުގައިވެސް ވިދާޅުވި އެވެ. އެއީ ހައްގު މިންވަރު ނޫން ކަމަށާއި އާ ސަބްމެރިން ކޭބަލާ އެކު ދިވެހިންނަށްވެސް ދުނިޔޭގެ ބޮޑެތި އިންޓަނެޓް އޮޕަރޭޓަރުންނާ އެއްހަމައެއްގައި ފައި ހަމަކޮށްލެވޭނެ ކަމުގައިވެސް ވިދާޅުވި އެވެ.
ރައީސް ވިދާޅުވީ އިތުރު ގައުމެއް މެދުވެރިކޮށް ރާއްޖެއަށް އިންޓަނެޓް ލިބޭނެ ގޮތް ހަމަޖެއްސުމަކީ ހުރިހާ ގޮތަކުންވެސް ރާއްޖެއަށް ރައްކާތެރި އަދި އެންމެ ރަނގަޅު ގޮތް ކަމަށެވެ. އާ ކޭބަލްއާ އެކު ރާއްޖޭގެ ހޮސްޕިޓަލްތައް އިންޓަނެޓް މެދުވެރިކޮށް ގުޅާލެވި އަދި ސެޓްލައިޓް ސްކޫލުތައް މިހާރަށް ވުރެ ފުރިހަަމައަށް ހިންގާލެވި ތައުލީމީ ދާއިރާއަށާއި ސިއްހީ ދާއިރާގެ ތަރައްގީއަށް ބޮޑު ކުރިއެރުމެއް ގެނެވޭނެ ކަމުގައިވެސް ވިދާޅުވި އެވެ.
ދުނިޔޭގެ އިގްތިސާދު ކުރިއަރާ ދިއުމުގެ ނާރެހަކީ އިންފޮމޭޝަން ޓެކްނޮލޮޖީ ކަމަށްވާއިރު މިއަދު ސަރުކާރުން ގާއިމުކުރި ކޭބަލާ އެކު ދިވެހި ދައުލަތުގެ އިގްތިސާދު ދެގުނަ ކުރުމަށް ކުރަމުންދާ މަސައްކަތްތަކަށްވެސް އިގްތިސާދީ އުފެއްދުންތައް އިތުރުކުރެވި ތިމާވެއްޓަށްވެސް އިތުރު ރައްކާތެރިކަން ހޯދައިދެވޭނެ ކަމުގައި ވިދާޅުވި އެވެ.
އިންޓަނެޓްގެ އަގުހެޔޮކޮށް ހިދުމަތްތައް އަތްފޯރާ ފަށަށް ގެނައުމަކީ ރައީސް އިބްރާހީމް މުހައްމަދު ސޯލިހްގެ ވައުދެކެވެ. ވައުދު ފުއްދުމުގެ ގޮތުން ސަރުކާރުން ވަނީ މެއި 26، 2021 ގައި އިންޓަނެޓުގެ ހިދުމަތް ހެޔޮކޮށްފަ އެވެ.
ރާއްޖޭގައި މިވަގުތު އިންޓަނެޓުގެ ހިދުމަތް ދެނީ ދިރާގު އުރީދޫ މޯލްޑިވްސް އަދި އާރުއޯއެލް އެވެ. އާ ސަބްމެރިން ކޭބަލާ އެކު އިތުރު އޮޕަރޭޓަރުންނަށް އިންޓަނެޓްގެ ހިދުމަތް ދިނުމަށް ހުޅުވާލުމަކީވެސް ސަރުކާރުގެ ސިޔާސަތުގައި ހިމެނޭ ކަމެކެވެ.