އިދިކޮޅުން ކެންޑިޑޭޓުން ބޭނުން ވާނީ ބޮޑެތި ރަށްތަކަށް އެކަނި ތަރައްގީކުރުމަށްފަހު ކުދި ރަށްތައް ދޫކޮށްލުމަށް ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ނ. ޅޮހީގައި މިއަދު ބޭއްވި ރިޔާސީ އިންތިހާބުގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ އިދިކޮޅުން ބޭނުންވާ ގޮތަށް ހަމައެކަނި ބޮޑެތި ރަށްތައް ތަރައްގީކުރަން ފުރުސަތު ދިނުމަކީ ކުދި ރަށްތަކުގެ ރައްޔިތުންގެ އެތައް ހައްގުތަކެއް ގެއްލިގެންދާނެ ކަމެއް ކަމަށެވެ. ކުރިއަށް އިންތިހާބުގައި މިސަރުކާރު ބަދަލުވެއްޖެނަމަ އިދިިކޮޅު ބޭފުޅުންގެ ސިޔާސަތު ހިނގާނީ އެ މަގުން ކަމަށްވެސް ވިދާޅުވި އެވެ.
"ފުރަތަމަ ދައުރު ފެއްޓެވިއިރު ހުރިހާ ކަމެއްވެސް ހުރީ އަލުން ބަލުން ކުރަން ޖެހިފައި،" ރައީސް ވިދާޅުވި އެވެ.
ޅޮހީގެ ތަރައްގީގެ މަޝްރޫއުތަކާ ގުޅޭގޮތުން ރައީސް ސޯލިހް ވިދާޅުވީ ޅޮހީ ބަނދަރު ތަރައްގީކުރުމުގެ މަސައްކަތް މިއަދު އެމްޓީސީސީއާއި ހަވާލުކުރެވިފައިވާ ކަމަށެވެ. އަދި ޅޮހީގެ ނަރުދަމާގެ ނިޒާމު ތަރައްގީ ކުރުމަށް މިހާރު ހަދާފައި އޮތް ކޮންޓްރެކްޓް އުވާލާ އެހެން ބަޔަކާ ހަވާލުކުރާނެ ކަމުގައިވެސް ވިދާޅުވި އެވެ.
ވެރިކަމުގެ ދެވަނަ ދައުރެއްގައި ޅޮހީގެ ގިރާ ސަރަހައްދު ހިމާޔަތްކޮށްދީ ޓޫރިސްޓުންނަށް ހާއްސަ ބީޗެއް ހަދައިދޭނެ ކަމުގެ ޔަގީންކަންވެސް ރައީސް އެރަށުގެ ރައްޔިތުންނަށް ދެއްވި އެވެ. މީގެ އިތުރުން ހެލްތް ސެންޓަރު 24 ގަޑިއިރުގެ ހިދުމަތް ދެވޭ ތަނަކަށް ބަދަލުކޮށްދީ، ލެބޯޓަރީއެއް ގާއިމުކޮށްދޭނެ ކަމުގައި ވިދާޅުވި އެވެ. ތައުލީމީ ދާއިރާ ހަރުދަނާ ކުރުމަށްޓަކައި ސްކޫލްގައި ރިސޯސް ރޫމެއް އަޅައިދީ ރަށުގެ ޒުވާނުންނަށް ޔޫތް ސެންޓަރެއް އަޅައި ދެއްވާނެ ކަމުގައިވެސް އެމަނިކުފާނު ވިދާޅުވި އެވެ.
މިހުރިހާ ކަމެއްގެ ސަބަބުން ރައީސް ވިދާޅުވީ މުޅި ނ. އަތޮޅަށް ވެސް ބޮޑު ބަދަލެއް އަންނާނެ ކަމަށެވެ. އަދި ކުރިއަށް އޮތް އިންތިހާބުގައި ނ. އަތޮޅުން އެމަނިކުފާނަށް ބޮޑު އަގުލަބިއްޔަތެެއް ލިބޭނެ ކަމަށް އުއްމީދުކުރައްވާ ކަމަށް ވިދާޅުވި އެވެ.