ރައްޔިތުންގެ މަޖިލީހުގެ މިއަދުގެ ޖަލްސާ ހޫނުވެ ތިން މެންބަރެއްގެ ނަން އިއްވައިފި އެވެ.
މަޖިލީހުގެ މިއަދުގެ ޖަލްސާގައި މެންބަރުން އަޑުގަދަކުރައްވަން ފެއްޓެވީ ކޮމިޓީތައް އެކުލަވާލުމުގެ މަސައްކަތް ކުރިއަށް ގެންދެވޭނީ ދަ ޑިމޮކްރެޓްސްއަށް ސޮއިކުރެއްވި އެހެން މެންބަރުންގެ ސިޓީ ލިބުމުން ކަމަށް މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވުމުންނެވެ.
މެންބަރުން އަޑުގަދަކުރައްވަން ފެއްޓެވުމުން މަޖިލީހުގެ ރައީސް ނަޝީދު ވަނީ ދާންދޫ ދާއިރާގެ މެންބަރު ޔައުގޫބު އަބްދުﷲ އާއި ކެލާ ދާއިރާގެ މެންބަރު އިބްރާހީމް ޝަރީފު އަދި ތިނަދޫ އުތުރު ދާއިރާގެ މެންބަރު އަބްދުލްމުގުނީގެ ނަން އިއްވާ މަޖިލީހުގެ ތަޅުން ދޫކުރެއްވުމަށް އެދިވަޑައިގެންފަ އެވެ.
އެ މެންބަރުންގެ ނަން އިއްވާ މަޖިލީހުގެ ތަޅުމުން ނިކުތުމަށް އެންގުމުންވެސް ނުނިކުންނެވުމުން ރައީސް ނަޝީދު ވަނީ މަޖިލިސް މެދުކަނޑާލާފަ އެވެ.
"އަޅުގަނޑު ގަސްތުކުރަނީ ބޭފުޅުން މަޖިލީހުގެ ގަވާއިދަށް ހުރުމަތްތެރިކޮށް ހިތްތެވުމަށް ނިންމަވަންދެން މަޖިލިސް މެދުކަނޑާލުމަށް،" ރައީސް ނަޝީދު ވިދާޅުވި އެވެ.
މަޖިޅީހުގެ ދެވަނަ ދައުރުގެ ޗުއްޓީއަށްފަހު ތިންވަނަ ދައުރުގެ ޖަލްސާތައް މިއަދު ފަށާފައިވާއިރު އެޖެންޑާގައިވަނީ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާގުޅޭ މައްސަލަ އެކަންޏެވެ.