ވެރިކަން ލިބިވަޑައިގެންފިނަމަ ކާޑުން ޑޮލަރު ނެގޭ ލިމިޓް އުވާލުމަށާއި އުމުރުން 55 އަހަރާއި 65 އަހަރު ދެމެދުގެ މީހުން އަމިއްލައަށް ރިޓަޔާކުރުމުން ހާއްސަ އެލެވެންސެއް ދިނުމަށް ޕީޕީއެމް ޕީއެންސީެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ ވައުދުވެވަޑައިގެންފި އެވެ.
ގދ. ތިނަދޫގައި މިރޭ ބޭއްވި ކެމްޕޭން ޖަލްސާގައި މުއިއްޒު ޑޮލަރު ނެގޭ ލިމިޓެއް ބޭންކްތަކުން ކަނޑައަޅާފައި އޮތުމަކީ ރައްޔިތުންގެ ފަރާތުން ވަރަށް ގިނައިން ޝަކުވާ ލިބޭ މައްސަލައެއް ކަމަށެވެ. އެ މައްސަލައަށް ހައްލެއް ހޯދައިދެވޭނީ ރައްޔިތުން އޭނާ އިންތިހާބު ކޮށްދެއްވައިފިނަމަ ކަމަށާއި އޭނާގެ ވެރިކަމެއްގައި ޑޮލަރު ލިމިޓް އުވާލާނެ ކަމަށެވެ. އަދި ރާއްޖޭގެ އިގްތިސާދުގައި ޑޮލަރު ދައުރުވާ އަދަދު އިތުރުކުރާނެ ކަމުގައިވެސް ވިދާޅުވި އެވެ.
"އެކަން ކުރެވޭނީ މަރުހަލާތަކަކަށް ބަހާލައިގެން. ފުރަތަމަ ތިން މަހު ލިމިޓް ޑަބަލްކުރުމަށްފަހު ދެން އެއްކޮށް ލިމިޓް އުވާލާނަން،" މުއިއްޒު ވިދާޅުވި އެވެ.
ރާއްޖޭގައި ޑޮލަރުގެ ރޭޓު ދަށްކޮށް، ފޮރިން އެކްސްޗޭންޖު ހަރުދަނާ ކޮށްދެއްވާނެ ކަމުގައިވެސް މުއިއްޒު ވިދާޅުވި އެވެ.
އޭނާ ވިދާޅުވީ ވަޒީފާއާ ގުޅޭ ގާނޫނާއި އުސޫލުތައް ހުރި ގޮތުން އުމުރުން 55 އަހަރުވުމުން ވަޒީފާއިން ރިޓަޔާ ކުރަންޖެހޭ ކަމަށެވެ. އެކަމަކު އެ މީހުން ރިޓަޔާ ވެގެން 65 އަހަރު ނުވަނީސް ލިބޭ އެލަވަންސެއް ނޯންނާތީ އެއީ ގިނަ ބައެއްގެ ކަންބޮޑުވުމެއް ކަމުގައި ވިދާޅުވި އެވެ. އެއީ އިންސާފުވެރި ގޮތެއް ނޫން ކަމަށް ފާހަގަކުރައްވަމުން މުއިއްޒު ވިދާޅުވީ އެ މައްސަލަ ހައްލުކުރުމަށް އޭނާގެ ވެރިކަމެއް އުމުރުން 55 އަހަރުވުމުން ރިޓަޔާ ކުރާ މީހުންނަށް އެލަވަންސެއް ތައާރަފްކުރާނެ ކަމަށެވެ.
މުއިއްޒު ވަނީ ރިޔާސީ އިންތިހާބަށް ބަކީ 13 ދުވަހަށް ވެފައިވާތީ ވަޒީފާ ގެއްލިދާނެ ކަމުގެ ބިރު އެއްފަރާތްކޮށް ކެމްޕޭނަށް ނިކުތުމަށް އެދިވަޑައިގެންފަ އެވެ. ކެމްޕޭންގައި ބައިވެރިވެގެން ވަޒީފާ ގެއްލުވާލައިފިނަމަ އެއަށް ވުރެ ރަނގަޅު ވަޒީފާ ހޯދައިދޭނެ ކަމަށްވެސް ވިދާޅުވެފަ އެެވެ.
"ކުރިއަށް އޮތް 13 ދުވަހަކީ ތިބޭފުޅުން ބާރު ސްޕީޑުގައި މަގުމަތީގައި ކެމްޕޭނުގައި އުޅޭ ދުވަސްތަކެއްގެ ގޮތުގައި ހަމަޖައްސާދޭންވީ. ވަޒީފާއިން ކަނޑާލާނެ ކަމަށް ބިރުގަންނާނެ ކަމެއްނެތް. އަޅުގަނޑުމެން އަނބުރާ ވަޒީފާ ދޭނަން،. އަޅުގަނޑުމެން ވެރިކަމަށް މި އަންނަނީ، އައިސް ތިބޭފުޅުންގެ ތި ވަޒީފާތައް ޔަގީންކަމާ އެކީ ދަމަހައްޓާ ދޭނަން އަދި މިއަށްވުރެވެސް ރަނގަޅު ކޮށްދޭނަން،" އޭނާ ވިދާޅުވި އެވެ.
މުއިއްޒު ވިދާޅުވީ އޭނާގެ ވެރިކަމެއްގައި މިހާރު އޮތް ގޮތާ ހިލާފަށް "ޕޭޕާލެސް" ސަރުކާރެއް ހިންގާނެ ކަމަށެވެ. އަދި އެ ސަރުކާރުގައި ކޮންމެ ތާކު ތިބިގެންވެސް ބާރު ދުވެލީގައި ހިންގޭ ސަރުކާރަކަށް، ސަރުކާރު ބަދަލުކުރާނެ ކަމަށެވެ.
"ކޮންމެ ތާކު ތިއްބަސް ސާރުކާރު ބާރަށް ހިންގޭ ފެންވަރަށް ކޮންމެ އޮފީހަކީ ކަރުދާހާ ނުލާ ހިންގޭ މިންވަރަށް ތަރައްގީ އޮފީހަކަށް ހަދައިދޭނަން،" މުއިއްޒު ވިދާޅުވި އެވެ.
މި ނިޒާމުގެ ދަށުން ރައްޔިތުންނަށް ކިއުގައި ނުޖެހި އޮންލައިންކޮށް އެކިއެކި ޕޯޓަލްތައް މެދުވެރިކޮށް ސަރުކާރުގެ އެކިއެކި ހިދުމަތް ލިބޭނެ ނިޒާމު ގާއިމުކުރެވިގެންދާނެ ކަމުގެ ޔަގީންކަންވެސް ދެއްވި އެވެ. އަދި ހުވަދޫ އަތޮޅަކީ ޓޫރިޒަމްގެ މައި ހަބަކަށް ހެދިގެން ދާނެ ކަމުގައިވެސް ވިދާޅުވި އެވެ.