އިޒްރޭލުގެ އިރުމަތީ ފަރާތުގައި އުރުދުންއާ ގުޅޭ ބޯޑަރުގައި އުސް ފާރެއް ރޭނުމަށް ބޮޑުވަޒީރު ބެންޖަމިން ނަތަންޔާހުގެ ސަރުކާރުން ނިންމަފައިފި އެވެ.
ނަތަންޔާހޫ ވިދާޅުވި ގޮތުގައި އެފްރިކާ ތެރެއިން ފެތުރިންގެން އަންނަ ހިޖުރަވެރިން މިހާރު އަމާޒުހިފާފައިވަނީ އުރުދުންގެ ތެރެއިން އިޒްރޭލަށް ވަނުމަށެވެ.
އިޒްރޭލުން މީގެ ކުރިންވެސް ވަނީ މިސްރު ބޯޑަރުގައި އުސް ފާރެއް ރާނާފަ އެވެ. މި ފާރުގެ ސަބަބުން -- ބޮޑުވަޒީރު ނަތަންޔާހޫ ވިދާޅުވި ގޮތުގައި -- އެތައް މިލިއަން ހިޖުރަވެރިންނެއް ވަނީ ހުއްޓުވިފަ އެވެ.
ބެންޖަމިން ނަތަންޔާހޫ ވިދާޅުވި ގޮތުގައި އިޒްރޭލުގައި މިހާރު ހިނގަމުންދާ މަދަނީ އަރާރުންތަކުގައި ހިޖުރަވެރިންގެ ދައުރު ވަރަށް ބޮޑެވެ.
މިކަމަށް އޮތް އެންމެ ރަނގަޅު ހައްލެއް ކަމަށް ނަތަންޔާހޫ ވިދާޅުވީ ހަމަނުޖެހުން އުފައްދާ ހިޖުރަވެރިން އިޒްރޭލުން ބޭރުކޮށްފައި އެ ގައުމަށް އަލަށް ވަންނަން މަސައްކަތްކުރާ މީހުންނަށް މަގު ބަންދުކުރުމެވެ.
ނަތަންޔާހޫ ވިދާޅުވި ގޮތުގައި ބޯހިޔާވަހިކަމުގެ ބޭނުމުގައި އިޒްރޭލަށް ވަދެ ތިިބި އެފްރިކާ ނަސްލުގެ މީހުންނަނީ ހަގީގަތުގައި އެފަދަ ކަމަކަށް އެދިގެން ތިބި ބައެއް ނޫނެވެ.
އެ މީހުންނަކީ އުޅޭނެ ތަނެއް ނެތިގެން އިޒްރޭލަށް ވަދެ ތިބި ބައެއް ނަމަ، އިޒްރޭލުގައި ހިނގާ ހަމަނުޖެހުންތަކުގައި ބައިވެރި ނުވާނެ ކަމަށްވެސް އޭނާ ވިދާޅުވި އެވެ.
ނަތަންޔާހޫގެ ވިސްނުން ހުރީ ހަމަނުޖެހުން އުފެއްދުމުގައި ބައިވެރިވި މީހުންގެ އިތުރުން ހަމަނުޖެހުންތަކުގައި ބައިވެރި ނުވާ މީހުން ވެސް -- އެއީ އެފްރިކާ ނަސްލުގެ މީހެއް ނަމަ ގައުމުން ބޭރުކުރުމެވެ.
އޭނާ މިހާރު ވަނީ ކެބިނެޓްގެ ވަޒީރުންނަށް މިކަން އަންގާފަ އެވެ. އަދި އިޒްރޭލުގައި ގަބީލާތަކުގެ މެދުގައި މިހާރު ހިނގަމުންދާ ހަމަނުޖެހުންތަކުގައި ހިޖުރަވެރިން ބައިވެރިވޭތޯ ބެލުމަށްވެސް އޮތީ އަމުރުކުރައްވާފަ އެވެ.
ނަތަންޔާހޫ ސަރުކާރުގެ ވަޒީރުންނަށް މިހާރު އޮތް ކަމަކީ އދ. އަށް މާބޮޑު އިޝާރާތަކަށް ނުވާ ގޮތަށް -- އެ ގައުމުގައި ތިބި ހިޖުރަވެރިން ބޭރުކުރުމެވެ. އަދި އުރުދުންއާ ގުޅޭ ބޯޑަރުގައި ފާރެއް ރޭނުމަށް ބޭނުންވާ މައުލޫމާތު އެއްކުރުމެވެ.