ޕްރޮސިކިއުޓާ ޖެނެރަލް (ޕީޖީ) އޮފީހުން ކުށުގެ ރެކޯޑު ސާފުކުރަންޖެހޭ ކަންކަމުގައި ލުއިފަސޭހަ ކޮށްދިނުމަށްޓަކައި ޕީޖީ އޮފީހުގެ އޮންލައިން ހިދުމަތްތައް މެދުވެރިކޮށް، ކުށުގެ ރެކޯޑު ސާފުކުރެވޭ ގޮތަށް ހަމަޖައްސައިފި އެވެ.
މިހިދުމަތް އީފާސް މޯބައިލް އެޕް މެދުވެރިކޮށް ނުވަތަ ޕީޖީ އޮފީހުގެ ޕޯޓަލް އިން އީފާސް މެދުވެރިކޮށް ވަނުމަށްފަހު ކުށުގެ ރެކޯޑު މެނޫއިން ކުށުގެ ރެކޯޑަށް އެދެވޭނެ ކަމަށް ޕީޖީ އޮފީހުން ބުނެ އެވެ.
ޕީޖީ އޮފީހުން ބުނީ ކުށުގެ ރެކޯޑަށް އެދުމުން ގިނަވެގެން މަސައްކަތުގެ އެއް ދުވަސް ތެރޭގައި ޖަވާބު އެ އޮންލައިން ޕޯޓަލްއަށް އަޕްލޯޑުކުރާނެ ކަމަށެވެ.
މި ހިދުމަތާއެކު ފަސޭހަކަމާއެކު ކުށުުގެ ރެކޯޑުތައް ސާފުކުރެވި އޭގެ ޖަވާބުވެސް ފޯނުން ބަލާލެވޭއިރު ޕްރިންޓު ކުރަން ބޭނުންވާނަމަ އެ މައުލޫމާތު ލިޔުން ޕްރިންޓުވެސް ކުރެވޭނެ ކަމަށް އެ އޮފީހުން ބުނެ އެވެ.
ޕީޖީ އޮފީހުން ބުނި ގޮތުގައި އެ ލިޔުމަކީ ޕީޖީ އޮފީހުން ދިން ލިޔުމެއްކަން އެނގޭނެ ވެރިފިކޭޝަން ކޯޑެއް އެ ލިޔުމުގައި އޮންނާނެ އެވެ.
މީގެ އިތުރުން އީމެއިލުން ކުށުގެ ރެކޯޑު ސާފުކުރަން ބޭނުންވާ މީހުން ޕީޖީ އޮފީހަށް އީމެއިލް ކުރުމުން މަސައްކަތުގެ ދެ ދުވަސް ތެރޭ ކުށުގެ ރެކޯޑު ސާފު ކުރުމަށް ފަހު ޖަވާބު އީމެއިލަށް ފޮނުވާނެ ކަމަށްވެސް އެ އޮފީހުން ބުނެފައިވެ އެވެ.