ދަރިވަރުންތަކަކަށް ޖިންސީ ގޯނާކުރި މައްސަލައެއްގައި ހައްޔަރުކޮށްފައިވާ ޓީޗަރަކަށް ދައުވާކޮށްދިނުމަށް އެދި ޕްރޮސެކިއުޓާ ޖެނަރަލްގެ އޮފީހަށް ފޮނުވައިފި އެވެ.
މިއީ ސައުތް ސެންޓްރަލް ޕޮލިސް (މ. ފ. ދ. ތ. ލ) އަތޮޅު ހިމެނޭ ރަށެއްގެ ސްކޫލެއްގައި ވަޒީފާ އަދާކުރާ އުމުރުން 29 އަހަރުގެ ފިރިހެން ޓީޗަރެއްގެ މައްސަލަ އެވެ.
ފުލުހުން ކުރިން ބުނި ގޮތުގައި ޓީޗަރު ވަނީ ދަރިވަރުންގެ އުމުރާ ނުގުޅޭ ވާހަކަ ދައްކއި، ގްރޫމްކުރަން މަސައްކަތް ކޮށްފަ އެވެ.
މިމައްސަލަ ފުލުހުންނަށް ރިޕޯޓް ކުރީ މިދިޔަ އޮކްޓޫބަރު 17 ވަނަ ދުވަހު އެވެ.
ކޯޓު އަމުރެއްގެ ދަށުން ޓީޗަރު ހައްޔަރުކުރީ އޮކްޓޫބަރު 27 ވަނަ ދުވަހު އެވެ.
މިމައްސަލައިގެ ތަހުގީގު ނިންމުމަށްފަހު ދައުވާކޮށްދިނުމަށް އެދި ޕީޖީ އޮފީހަށް މައްސަލަ ފޮނުވާފައިވަނީ މިދިޔަ މަހުގެ 25 ވަނަ ދުވަހު އެވެ
ކުޑަކުދިންނާ ގުޅޭ މައްސަލައަކީ ސީރިއަސް މައްސަލަތަކަކަށްވާތީ ދަރިވަރުންގެ ވަނަވަރު ރައްކާތެރިކުރުމުގެ ގޮތުން އެ ކުދިންގެ އަތޮޅާއި ރަށް ފުލުހުން ހާމައެއް ނުކުރެ އެވެ.