މީރާ އާއި ޖުމާގެ ލޯބި ފަންޏެއް ނުކުރަން! މީރާ ދެކެ ޖޭއެއް ނުވޭ!

މަރިޔަމް އައްޒަ ދަންނަނީ ކިހިނެތް ހެއްޔެވެ؟ ޔާރާ ފެމިލީއޭ ކިޔުނު ފިލްމީ ދާއިރާގެ އާއިލާއަކަށް ނިސްބަތްވާ އެންމެ ޒުވާން މޫނުގެ ގޮތުގައި ހެއްޔެވެ؟ ނުވަތަ އޭނާ އެންމެ މަޝްހޫރީ ކުރީގެ ފިރިމީހާ އިސްމާއިލް ޖުމައިހް (ޖުމާ) އާއެކު ފައްކާކޮށް އަދި އެހާ ހާމަކަން ބޮޑު ގޮތަކަށް "ފަޅާލި" ލޯބީގެ ޑްރާމާއަށް ހެއްޔެވެ؟

ނުވަތަ އައްޒައެއްގެ ވާހަކަ އަޑުއިވުނީ މަޝްހޫރު ލަވަކިޔުންތެރިޔާ މީރާ މުހައްމަދުގެ އުނގަށް މި ދޭތެރެއަކުން ޖުމާ ވެއްޓިގަތުމުން މި ތިނެސްކަނެއްގައި ނަގައި އުފުލެމުން ދިޔަ ރާޅުތަކެއް ބިންދަން ފެށި ހިސާބުންތޯ އެވެ؟

ހަގީގަތަކީ އައްޒަގެ ހަޔާތަށް އަދި އޭނާގެ ހުނަރުވެރިކަމަށް ފާއިތުވި އަހަރުތަކުގައި ނިކަން ބޮޑަށް ހިޔަނި އެޅިފައިވުމެވެ. އަމިއްލަ އާއިލާގެ ތެރެއިން އޭނާގެ ކެރިއަރަށް އަދި ހުނަރުވެރިކަމަށް އެޅިފައި އޮތް ހިޔަންޏަކީ އޭނާގެ މަޝްހޫރު ދައްތަ އައިޝަތު ރިޝްމީގެ ހިޔަންޏެވެ. ޔާރާ ކުޑައިގެ ބޭރަށް ނުކުތުމުން ވެސް އޭނާ ފެންނަވަރެއް ނުވި އެވެ.

މާ މަޝްހޫރު ލަވަކިޔުންތެރިޔަކު އައިސް އޭނާގެ ހިތުގެ ބައިވެރިޔާ ވެސް ޖަހައިގެން ދިޔައީ އެވެ. އެއަށް ފަހު ފަލަ ސުރުހީއެއްގައި އޮތީ އައްޒަގެ ވާހަކައެއް ނޫނެވެ. އެ ދެ މީހުންގެ ވާހަކަ އެވެ.

އެހެންވީމަ ފަހަރެއްގައި މިއީ މި އައްޒައަކަށް ފަލަ ސުރުހީއެއް ދޭންވީ ނުވަތަ ހައްގުވާ ވަގުތެވެ. އޭނާ މިހާރު އެ ވަނީ ޔާރާ ކުޑައިގެ ދަށުން އަދި ހަޔާތުގައި ނެގި އެންމެ ފިނި ކުޑައިގެން ދަށުން ވެސް ނުކުމެ އާ އަމާޒުތަކަށް ހިފައިފަ އެވެ.

ތިރީގައި މިއޮތީ އައްޒަގެ ހާއްސަ އިންޓަވިއު އެވެ.

"ސީދާ ޔާރާ ޕްރޮޑަކްޝަންގެ މަސައްކަތެއް މިހާރު ނުކުރެވޭ. ކުރިން ވެއްޖެއްޔާމު ޓީމު އެއްކޮށް އޮންނަނީ އެކަމަށް. ދެން މިހާރުވެއްޖެއްޔާމު އައްޒަ އާއި ރިޝްމީ ފިލްމީ ދާއިރާގައި އުޅެންޏާމު ނުވަތަ ދަންޏާމު މި ޖެހެނީ މަންމަގެ ހެލްޕަކަށް އެދެން. އެހެންވީމަ އެންމެން އެއްކޮށް ވޯކްކުރަން ކުޑަކޮށް އުނދަގޫ. އެހެންވީމަޔާ ވެސް އެއްކޮށް. ދެން ބޮޑަށް ބޭރުން އެހެން މަސައްކަތްތައް ލިބޭތީވެ ބޮޑަށް އެ މަސައްކަތުގައި އުޅެވޭތީވެ ޔާރާ ޕްރޮޑަކްޝަން އެހާ ވޯކްނުކުރަނީ އަސްލުގައި."

"ހީއެއް ނުވޭ އަވަސް މުސްތަގުބަލެއްގައި ޔާރާ ޕްރޮޑަކްޝަންގެ އެއްޗެއް ފެނިދާނެހެންނެއް. އެކަމަކު ރިޝްމީމެން ހަދާ ފިލްމެއްގައި ޔާރާ ޕްރޮޑަކްޝަންގެ ޕާޓްނާޝިޕެއް އޮވެދާނެ."

"ނޫން. ކުރިން ވެސް ބުނިހެން މިއީކީ އަޅުގަނޑުމެން އަމިއްލަ އަށް ހެދި ލަވައެއް ނޫން. މީރާމެން ވަކި ލަވައެއް ހަދާތީ ހެދި ލަވައެއް ވެސް ނޫން. އަޅުގަނޑުމެންނަށް ސްޓްރީކް ސްޓޫޑިއޯ އާއި ސްކެއާއިލެވެން ސްޓޫޑިއޯ އިން އައި އޮފާއެއްވީމަ އެ އޮފާ ގަބޫލުކުރީ. އެމީހުން ބޭނުންވީ ވެލެންޓައިންސް ޑޭ އަށް މި ލަވައެއް ވެސް ނެރެން. އެކަމަކު ދެން އެކަމެއް ވެސް ނުވިއެއް ނުން."

"ދެން ހަމަ އެންމެނަށް ވެސް އެނގޭނެ މި ފީލްޑަށް އަޅުގަނޑަށް ވަދެވުނީ ފެމިލީ ތުރޫކޮށް. ފެމިލީ މިކަންތައްގަނޑުގައި އުޅޭތީވެ އޭގައި އިންވޯލްވްވެވިފައި ހުރި ވަރުން އަސްލު އިންޓްރެސްޓް އުފެދުނީ މިކަމަށް."

"ބޮލަށް މި އައި ބަދަލަކީ އަސްލުގަ އަބަދު އެއްގޮތަކަށް ފެނުނީމަ ވެސް މީހުން ފޫހިވާނެތާ. އެހެންވީމަ ކުރީގައި އޮތް ބުޅި އިސްތަށިގަނޑު މާ ބިނަ ދުވަސްވެ އެއަށް ފޫހިވެގެން ފަންކޮށްލީ. ފަންއޭ ބުންޏަސް ރީބޮންޑިންއެއް ނަހަދަން. އަޔަންކޮށްލަނީ ދޭތެރެއަކުން. އެއީ ސްޓައިލް ޗޭންޖުކުރަން ވެގެން އަސްލުގައި."

"މިހާރު ވެސް ފެންވަރައިގެން ނުކުމެއްޖެއްޔާމު ހުންނަނީ ބުޅިކޮށް. އަޔަންކޮށްލީމަ ހުންނަނީ ފަންކޮށް. މިހާރު ވެސް ބުޅި އިސްތަށިގަނޑު ބޭނުމިއްޔާމު ބުޅި އިސްތަށިގަނޑު ވެސް ލިބޭ ގޮތަށް އޮތީ."

"އައްޒަ ހިކުނީ ވަރަށް ބޮޑު ކަންތައްގަނޑެއްގެ ދިމާވެގެން އެ ދުވަސްކޮޅު. އަސްލު ހީއެއް ނުކުރަން ބަނޑުބޮޑުވެގެން އެހާ ފަލަވީމަ އެގޮތަށް ހިކޭނެ ކަމަށް ވެސް. ކިތަންމެ މަސައްކަތްކުރިޔަސް ހިކޭނެ ކަމަކަށް ހީއެއް ނުކުރަން. އެކަމް ދެން ވިހައިގެން ގާތްގަނޑަކަށް ސިކްސް މަންތްސް ވަރުގަ ޑިވޯސްވީ."

"ދެން ޑިވޯސްވެގެން އެ އައި ޓެންޝަން އާއި ޑިޕްރެޝަންއާ އެ ހުރިހާ އެއްޗެއް އައިސްގެން ގާތްގަނޑަކަށް ވަން މަންތު ތެރޭގައި އައްޒަގެ ފިފްޓީން ކިލޯ ހަމަ އެއްކޮށް ދިޔައީ. ދެން އެ އަށް ފަހު އައި މަހު ވެސް ގާތްގަނޑަކަށް ފަސްކިލޯ ވަރު ހިކުނު. ދަމުންދަމުން ގޮސް ހިކުނީ. ހުރިހާ ކަންތަކާ ވިސްނާ މައިންޑް އަސްލު ބްލާސްޓްވެގެންނޭ ބުނެވޭނީ. ޖިމަކަށް ނުވަތަ އެކްސަސައިޒް ވެސް ނުކުރަން."

"އަސްލުވާގޮތަކީ އަޅުގަނޑަކީ ވަރަށް ސަކަރާތް ޖަހާ މީހެއް. ވަރަށް މަޖާކޮށް އަބަދުވެސް އުޅެން ބޭނުންވާ މީހެއް. އެންމެ ކުޑައިރުއްސުރެން ފެށިގެން ވެސް ރިޝްމީ، ކުޑާއްތަ ވެސް ވަރަށް ނަށާނެ. ދެން ދެ މީހުން ވެގެން ކުޑައިރު ފިލްމުތަކާއި ލަވަތަކާ އެއްޗެހި ބަލައިގެން ނަށާ ގޭގައި ހުންނަ ކާ މޭޒު މައްޗަށް އަރައިގެން ވެސް ގޭގެ އެންމެނަށް ޝޯ ވެސް ދޭނެ ނަށާލައިގެން."

"ނުލިބޭނެ އެވަރުގެ މަންމައެއް. ބޭނުމެއް ވެސް ނޫން. ހުރިހާ ގޮތަކަށް ވެސް ޕާފެކްޓް. ކޮންމެ ކަމެއް ޖެހުނަސް ބެސްޓްފްރެންޑް. އަބަދުވެސް ކައިރީގައި ހުރޭ. މަންމަ އެގޮތަށް ހުރީމަ އެއްވެސް މީހަކު ނެތެކޭ ހިތަކަށް ނާރާ. އެކަންޏެކޭ ވެސް ހިތަކަށް ނާރާ. އަބަދުވެސް އެނގޭ މަންމަ އާއި ބައްޕަ ހުންނާނެކަން. ދެން ހާއްސަކޮށް މަންމަ."

"މަންމަ ބުނެގެނެއް ނޫން ފިލްމީ ދާއިރާ އަށް ވަނީ. މަންމަ ބުނީ ކޮންމެ ގޮތެއް ވިޔަސް ހިތްވަރުދޭން ހުންނާނަމޭ. މިހާރު ވެސް ޕްރޮޖެކްޓެއް ލިބިއްޖެ ނަމަ އެންމެ ފުރަތަމަ އަހާލެވެނީ މަންމަ ގާތު. ދެން ހަދަންވީ ގޮތެއް ބަލަން ވެސް."

"ވަރަށް ލޯބިވޭ މަންމަ ދެކެ. ދެން އަޅުގަނޑަކީ ސްކޫލްގައި އުޅުނުއިރު ޑަބަލް ރުޅިގަދަ މީހެއް. ދެން ވީގޮތަކީ ސްކޫލްގައި އުޅުނު ދުވަހެއްގައި ކޮންމެވެސް ކުއްޖަކު ރުޅިއައިސްގެން މަންމައާ ބެހުނީ. މަންމައޭ ކިޔައިގެން ދެން ވަރަށް ހަޑިކޮށް ވާހަކަ ދެއްކީ. އޭތި ދެން ޑައިޖެސްޓެއް ނުކުރެވުނު. އެއީ އިންޓަވަލް ގަޑި. އޭރު ކެންޓީނުން ލިބޭނީ ކޯކް ވެސް ބިއްލޫރި ފުޅީގައި. ދެން އެ ގަޑީގަ އަތުގަ އޮތީ ކޯކްފުޅި. ދެން ޖެހުނީ ދޯ."

"އަސްލު އޭތި އިހްސާސެއް ނުކުރެވޭ. ރިޝްމީގެ ހިޔަނި އަޅުގަނޑުގެ މަސައްކަތަށް ނުވަތަ ކެރިއާއަށް އެޅިފައި ހުންނަ ކަމުގެ އިހްސާސެއް ނުކުރެވޭ. އެއަށް ވުރެ ދެ މީހުން ކްލޯޒް. އެކަމަކު އަބަދުވެސް ގަބޫލުކުރެވޭ އައްޒަ އަށް ވުރެ ކޮންމެ ގޮތެއްވިޔަސް ކުޑާއްތަ (ރިޝްމީ) މޮޅު. ދެން އަނެއްކާ މާކުރިން ނުކުމެއްޖެ. މާ އެކްސްޕީރިއަންސްޑް."

"އަސްލު ވަރަށް ކޮމްފަޓަބްލް ދެ މީހުން. އަޅުގަނޑު މިއޮތްހާ ދުވަހު މި މަސައްކަތުގައި އުޅުނީ ހޮބީއަކަށް. އެކަމަކު ކުޑާއްތަ އެ އުޅެނީ ހަމަ މިކަމަށް ހުސްވެގެން. އެހެންވީމަ އެ ތަފާތުކަން ނޭނގެ އެ ފެންނަނީ."

"އެކްޓިންގެ ފެންވަރު އެއީ އަމިއްލަ އަށް މަސައްކަތްކުރީމަ ރަނގަޅުވާނެ ކަމެއްކަން އޮތީ މިހާރު އެނގިފައި. އެހެންވީމަ ކޮންމެ ގޮތެއްވިޔަސް މީގައި އޮންނާނީ އަޅުގަނޑު ކުރި ހިތްވަރެއް. ކުރި މަސައްކަތެއް. މިސާލަކަށް މި ދާއިރާ އިން ކުރިއަށް ދާން ބޭނުން ނަމަ އަޅުގަނޑުމެން މީގެ ތެރެއަށް ބޮޑަށް ވަންވަރަކަށް އެނގޭ ރަނގަޅުކުރެވޭނެކަން."

"ކުޑާއްތަ ވެސް އެއީ ވަންއިރު ވަރަށް ވީކުކޮށް އުޅުނު ކުއްޖެއް. އެކަމަކު މިހާރު ޓޮޕް ލެވެލްގަ އެބައުޅެވޭ. އެހެންވީމަ ވައި ކާންޓް އައި؟."

"ސޯޝަލް މީޑިއާގައި ޕޯސްޓްކުރަނީ ޑެއިލީ ލައިފްގައި ހިނގާ ކަންތައްތައް ޝެއާކުރުމުގެ ނިޔަތުގައި. ދަރިފުޅު ގޮވައިގެން ބޭރަށް ދިޔަޔަސް ފޮޓޯއެއް ނަގާލާފައި ލަނީ. ކޮންމެހެން ދެއްކޭކަށް ނުވަތަ އަޅުގަނޑުގެ އަސްލު ނޫން އެހެން މީހެއްގެ ގޮތުގައި ދައްކާކަށެއް ވެސް ނޫން. އާންމު ދިރިއުޅުން."

"މީހުންގެ ސަމާލުކަން ހޯދާކަށް އަސްލު ބޭނުމެއް ނޫން. ކޮންމެ ގޮތެއްވިޔަސް އަޅުގަނޑަކީ އާންމުން ދަންނަ މީހެއް. މީހުންނަށް އިނގޭނެ އަޅުގަނޑު. އަސްލު އަޅުގަނޑު މި އިންސްޓަގްރާމް ކުރާވަރަށް ކުރާ އެހެން ކުދިން ވެސް އުޅޭ. ތަފާތަކީ އެ ކުދިން އެހާ ވަރަކަށް ނޭނގޭ. އެކަމަކު މިސާލަކަށް އަޅުގަނޑު ކަމެއްކޮށްފި ނަމަ އެންމެނަށް އެކަން އެނގޭ. ހައިލައިޓްވޭ. އެއީ ތަފާތަކީ."

"ވަރަށް ބޮޑަށް ޑިސިޕްލިން ހިފެހެއްޓޭތޯ ބަލަން. އަޅުގަނޑު ކިރިޔާ ވެސް ދަންނަ މީހެއް ނަމަ ނުބުނެވޭނެ މިއީ ހަޑިކޮށް އުޅޭ ގޯސްކޮށް އުޅޭ މިވެނި ކަމެއް ކުރާ މިވެނި އެއްެޗެއް ބޯ މީހެކޭ ނުބުނެވޭ. އަމިއްލަ ސެލްފަށް އަޅުގަނޑު ރެސްޕެކްޓްކުރަން. އެ ރެސްޕެކްޓް އެހެން މީހުން ވެސް އަޅުގަނޑަށް ދޭން ބޭނުން. ދެން އަގު ވައްޓާލަން މީހުން ހަދަހަދައިގެން ދައްކާ ވާހަކައަކަށް އައި ކާންޓް ހެލްޕް ދޯ."

"5000 ޕަސެންޓް. ދެން ދެވެން އޮތް އެންމެ މައްޗަކުން ދޭނަން. އެއީ މިހާރު ކޮންމެ ގޮތެއް ވިޔަސް ހެނދުނު ހޭލާއިރު ވެސް ކުއްޖަކު ގުޅާލާފައި ބުނެލަފާނެ އައްޒާއޭ އެބައުޅެއޭ އައްޒާގެ ނިއުޑް ފޮޓޯތަކެއް ލީކުވެގެން. އެކަމަކު އެއްވެސް ހާހެއް ވެސް ނުވޭ ދެރައެއް ވެސް ނުވޭ. އެވަރުގެ ގެރެންޓީ އިނދޭ. އެވަރުގެ އެއްޗެއް ނުނިކުންނާނެކަން."

"މިހާރު ދެން އަޅުގަނޑުގެ ލީކުނުވާ ފޮޓޯއެއް ނެތް. އެކަމަކު ފެންނަށް ފޮޓޯއެއް ވެސް އެކަހަލަ."

"ޖުމާ އައުމުގެ ފަހުން އަޅުގަނޑުގެ ލައިފަކަށް އިތުރު ލޯބިވެރިއެއް ބިޓެއް ނާދޭ. އަދިވެސް ނާދޭ. އޭގެ ކުރިން ނަގާފައި ހުރި ބޯއިފްރެންޑުން ވެސް މިވަރެއް ނުވޭ. ދުވަހަކު ވެސް ހީއެއް ވެސް ނުކުރަން މި ވަރަށް މީހަކު ދެކެ ލޯބިވެވޭނެއެކޭ ވެސް. އަސްލު ވެދާނެ އެހެން މީހުންނާ އެކު ޝެއާ ނުކުރެވޭ މޮމެންޓްސް ޖުމާއާ އެކު ޝެއާކުރެވިފައިހުރީމަ ކަމަށް ވެސް."

"ޑިވޯސްވެގެން ދެން މިހާރު ވަރަށް ގިނަ ދުވަސްވެއްޖެ ދޯ. އެކަމަކު ވާ ގޮތަކީ އީތަން (އައްޒަ އާއި ޖުމާގެ ދަރިފުޅު) ހުންނާތީ ދެ މީހުން މި ޖެހެނީ ކޮންމެ ގޮތެއްވިޔަސް ކޮމިއުނިކޭޓްކުރަން. އީތަންގެ ކަންތަކާ ދެ މީހުން ވަރަށް ރަނގަޅަށް ޑީލްކުރަން. އެހެންވީމަ އީތަންގެ ބައްޕައަށްވީމަ އަބަދުވެސް އިނދޭ އެ ލޯބި. އިންނާނެތާ އެޓޭޗްމަންޓެއް ފާޑެއްގެ."

"ދެން އަބަދު ފެނި، އަބަދު އެކުގައި އުޅެން ޖެހުނީމަ ހުންނާނެ ދުރުނުވެނޭ ގޮތެއް. ދެން ލޯބިވޭ އަބަދުވެސް."

"މިސާލަކަށް އީތަން ނެތް ނަމަ ދެ މީހުން ވެސް މޫވްއޮންކޮށްގެން ޖުމާ ވެސް އެހެން މީހަކާ މެރީ ވެސްކޮށްފާނެކަން ނޭނގެ. އަޅުގަނޑަށް ވެސް އެހެން މީހަކާ މެރީކުރެވިފަކަން ނޭނގެ އޮންނާނީ. އެކަމަކު އީތަން ހުރީމަ އެ ޑިޒިޝަން އެހެން ދިމާލަކަށް ނަގަން ނުކެރިގެން މި އުޅެނީ."

"ޖުމާ އާއި މީރާގެ ރިލޭޝަންޝިޕަކީ އެއްގޮތަކަށް ވެސް ހީނުކުރާ ކަމެއް. އެންމެ ފުރަތަމަ އެ ވާހަކަ އަޑުއިވުނީމަ ހިތަށް އެރީ، އާނ އޯކޭއޭ. ވަރަށް ކޫލްއޭ. އެއީ ކޮންމެ ގޮތެއްވިޔަސް އަޅުގަނޑަށް އެނގޭ ޖުމާއާ ރައްޓެހިވެގެން އަޅުގަނޑަކަށް ދެން އެކަހަލަ ގޮތަކަށް ނޫޅެވޭނެކަން. އެހެންވީމަ ހީ ހޭޒް ޓް މޫވްއޮން ސަމްޑޭ ދޯ. އެ ޑިޒިޝަން އޭނަ އެންމެ ފުރަތަމަ ނެގީމަ އަސްލު ވަރަށް އުފާވެސްވި."

"އަޅުގަނޑު މީރާ ދެކެ އަސްލު ޖޭއެއް ނުވޭ. އެއްވެސް ވަރަކަށް ނުވޭ. އެއީ އަނެއްހެން ބަލަންޏާމު ޓެލެންޓްވައިސްކޮށް ބެލިޔަސް އެއީ މުޅިން އެހެން ފީލްޑެއް. އަޅުގަނޑު މިއީ މުޅިން އެހެން ފީލްޑެއް. އަޅުގަނޑަށް ހީވަނީ އަޅުގަނޑު މީރާ ދެކެ ޖޭ ވަނީއޭ ބަޔަކު ބުނާ ނަމަ އެހެން އެ ބުނަނީ ވެސް މަސައްކަތާ ގުޅުވައިގެންހެން."

"އަނެއްހެން ޖޭވާންވީ ސަބަބެއް ވެސް ނެތް. ހަސަދަވެރިކަމެއް ވެސް ނެތް. ރުޅިވެރިކަމެއް ވެސް ނެތް. މީރާ މިހާރު ވެސް ދޭތެރެއަކުން ގުޅާލާފައި ވާހަކަ ދައްކާލާނެ."

"މިހާރު ވެސް ދޭތެރެއަކުން އަޅުގަނޑުގެ ކާރަށް ބައެއް މީހުންނާ އެކު އެރޭ ގަޑިތަކުގައި ހުންނާނީ މީރާގެ ލަވަޖެހިފައި. ދެން އެމީހުން ބުނާނެ އަދިވެސް މީރާގެ ލަވަހޭ އަޅުގަނޑު ޖަހަނީ. އަޅުގަނޑު އަބަދުވެސް އެމީހުންނަށް ދޭ ޖަވާބަކީ މީރާ އަކީ ވަރަށް ޓެލެންޓެޑް ކުއްޖެކޭ. މީރާގެ ލަވަތައް ވަރަށް ރީއްޗޭ. މީރާގެ އަޑު ވަރަށް މެޖިކަލްއޭ."

"މީރާގެ ފޭންއެއް އަސްލު އަޅުގަނޑަކީ. އައި ފޭންހާ ހަމަ. ލަވަ ޖަހަން ވެސް ޖަހަން މީރާގެ. ބޭނުމެއް ވެސް ނުވޭ މީގެ ތެރެއަށް ޕާސަނަލް ކަމެއް ވައްދާކަށް ވެސް."

"ނޭނގޭ އަޅުގަނޑަކަށް. މީރާ ދޯ އުޅުނީ ޖުމާއާ ރައްޓެހިވެގެން އޭރު. އެ ދެމީހުންގެ ދެމެދުގައި ހިނގައި ދިޔަ ކަންތަކެއް އަސްލު އަޅުގަނޑަކަށް ނޭނގޭ. ވެދާނެ މީރާ އަށް ވެވުނީ ހަގީގީ ލޯބި ނޫން ކަމަށް ވެސް."

"އެކަމަކު އޭރު އަޅުގަނޑަށް އެނގިފައި އޮތް ގޮތުގައި ކަމަށްވެއްޖެއްޔާމު ވަރަށް ބޮޑަށް ހަގީގީ ލޯބިވެގެން، ހަމަ ދުރުނުވެވިގެން ކަމަށް އަޑުއިވިފައި އޮތީ. ދެން އަޅުގަނޑަކަށް ނޭނގޭ ފަހުން ވީ ގޮތެއް."

"ނޫން ނޫން ނޫން. އެ ދެ މީހުން ރުޅިވީ ގައިމު ވެސް އައްޒައާ ހެދިއެއް ނޫން. އެވަރު ގެރެންޓީ އެބައޮތް. އެމީހުން ރުޅިވެގެން ޖުމާ އާއި އަޅުގަނޑާ އީތަންއާ އޮތް ގުޅުން ރަނގަޅުވެގެން. އަނެއްހެން އަޅުގަނޑު އެ ދެ މީހުންގެ ދޭތެރެއަށް ގޮސް ފަނިހަދައިގެން އެ ދެ މީހުން ދުރުކޮށް ޖުމާ އަޅުގަނޑުގެ ގާތަށް ގެނައީކީއެއް ނޫން."

"މިސާލަކަށް މި އިންޓަވިއުގައި އަޅުގަނޑު ބުނީ ނުއިންނާނަމޭ. ކިޔާފައި ގޮސް ފަހުން އިނދެއްޖެއްޔާމު އަޅުގަނޑަށް އެނގޭ މި އިންޓަވިއު އަންނާނީ އަނެއްކާ ރިޕީޓްވެގެންކަން. އެހެންވީމަ އެހެން ވާކަށެއް ބޭނުމެއް ނޫން. ކުރިއަށް ވާނެ ގޮތެއް އެއްވެސް މީހަކަށް ނޭނގޭނެ. އެހެންވީމަ ނޭނގޭ އަދި ވާނެ ގޮތެއް."

"ހަމަ ގައިމު ވެސް ދެ އަންބަކަށް ނުއިންނާނަން. އަދި ދުވަހަކު ވެސް ހިތަކު ނެތް ދެއަންބަކަށް މީހަކާ އިންނާނަމެކޭ."

"ކުރިން ވެސް ބުނެފައި އޮންނާނެ. ޖުމާއާ އަޅުގަނޑު ވަރިވާން ޖެހުނީ ހަމަގައިމުވެސް އަޅުގަނޑުގެ ފޯލްޓެއް ފެނިގެން އަޅުގަނޑުގެ ކުށެއް އޮވެގެނެއް ނޫން. ޖުމާއަކަށް ނުދެއްކޭނެ މިސާލަކަށް އަޅުގަނޑު މިވެނި މީހެއްގެ ކައިރިއަށް ދިޔައީއޭ. ދޮގުހަދައިގެން މިވެނި ކަމެއް ކުރީއޭ. އެކަހަލަ އެއްވެސް ފޯލްޓެއް އޮވެގެނެއް ނޫން."

"ދެ މީހުންގެ ދެމެދުގައި އޮތް މިސްއަންޑަސްޓޭންޑިންއެއް މިސްކަނެކްޝަންއެއް ބޮޑުވެގެން ދިޔަދިޔައީނުން ގޮސް ދެ މީހުންނަށް އެއްކޮށް ދޭން ނޫޅެވޭނޭ ހިތަށް އެރީމަ ވަރިވާން ނިންމީ."

"މިސާލަކަށް ޖުމާއާ މީރާ މެރީކުރީޔޯ. މެރީ ކުރި ނަމަވެސް ޖުމާގެ ވައިފަކަށް ލިބެން ޖެހޭ ރެސްޕެކްޓް އަޅުގަނޑުގެ ފަރާތުން ލިބޭނެ. ހުރިހާ ކަމެއްގައި ވެސް ރަނގަޅަށް ވާހަކަ ދައްކައިފި ނަމަ ވަރަށް ކޯޕަރޭޓިވްވާނެ އަޅުގަނޑު."

"އެ ދެމީހުން ރުޅިވީމަ އަސްލު އުފަލެއް ނުވޭ. ކުރިން ވެސް ބުނިން ޖުމާ ކައިރީގައި (މީރާ) އާއެކު އުޅެވޭތޯ އަދިވެސް މަސައްކަތްކުރާށޭ ވެސް."

"ތިއީކީ އެއްވެސް ގޮތަކަށް އަޅުގަނޑު ގަބޫލުކުރާނެ ވާހަކައެއް ނޫން. މިސާލަކަށް އީތަންގެ ދޮން މަންމައަކަށް މީރާ ވީ ނަމަ އަޅުގަނޑެއް ނުބުނާނަން މީރާ އަކީ އީތަންއަކަށް މިގޮތަށް މަންމައެއްގެ ލޯބި ދީގެން އެގޮތަށް އުޅެވޭނެ ކުއްޖެކޭ. އަޑުއިވިފަ ހުރި ވާހަކަތަކުން އަޅުގަނޑަކަށް ހީއެއް ނުވޭ މީރާ އަށް އީތަން އަށް މަންމައެއްގެ ލޯބި، ހަމަގައިމުވެސް އަޅުގަނޑު މި ދޭ ގޮތަކަށް މަންމައެއްގެ ލޯބި ނުދެވޭނެ."

"އެ ހަމަ ގެރެންޓީ ކަމެއް."

"އެއީ ހުސް ދޮގު. އަދީބާ އަޅުގަނޑާ ނޯންނާނެ ހަމަ އެއްވެސް ގުޅުމެއް. އެ ވާހަކަ ވަރަށް ދޮގުކުރަން. އެއީކީއެއް އެއްވެސް ތެދެއް ނޫން. އެއީ ފެތުރިގެން އުޅުނު ވަރަށް ދެރަކޮށް ދިޔަ ވާހަކައެއް. ވަރަށް ދެރަވި އަޅުގަނޑަށް ވެސް ނޭނގި ހުއްޓާ ފެތުރިގަތް ވާހަކައެއް. އަޅުގަނޑު އެފަހަރު ދިޔައީ ޑިވޯސްވި ފަހުން ލިބުނު ޓުއަރިޒަމް ފެއާއަކަށް. ދިޔައީ ވެސް ގޮމަ ގްރޫޕްގެ ފަރާތުން އެމީހުންނާ އެކު. މިކޮޅަށް އައިއިރު އޮތީ އެ ވާހަކައެއް ފެތުރިފައި."

"ނޭނގެ ކިހިނެތް، ކީއްވެގެން ކަމެއް ވެސް."

"ހުރިހާ ކުދިން ވެސް ވަރަށް މޮޅު. ލައިޝާ ވަރަށް ރަނގަޅު. ދެން އިޝާން. ދެން ޝަލަބީ."

"އެ ތިން މީހުން ވެސް އޯކޭ. ތިން މީހުންގެ ތެރެއިން ދާނީ ޑުއެޓަކަށް. ދެ ފިރިހެން ކުދިން ލައިގެން އެ ލަވަކިޔުއްވާނީ."