އަލަތު ކައިވެންޏާއި އަލަތު އެވޯޑްގެ ފޮނި

މިއީ ނިމިގެން ދިޔަ ގައުމީ ފިލްމު އެވޯޑްސްގައި އެންމެ ގިނަ ބަޔަކު ސިއްސުވާލި އެއް މޫނެވެ. އޭނާ އެވޯޑް ހަފުލާ ފަތަހަކުރީ ހަމައެކަނި އަގުބޮޑުކޮށް ޖަރީކޮށްލާފައި އޮތް ތަފާތު ހެދުމަކާ އެކު ސްޓޭޖަށް އަރައިގެނެއް ނޫނެވެ. ފިލްމީ ދާއިރާގެ ހެވީވެއިޓުންނާ ވާދަކޮށް އެންމެ މޮޅު ސަޕޯޓިން އެކްޓްރެސްގެ އެވޯޑް ފިލްމު "ލޫދިފާ" އިން ގެންދިއުމަކީ އަޒޫގެ މި ވާހަކައެއް އަރައިގެން ގޮސް ސީލިންގުގައި ޖެހޭ އެންމެ މުހިންމު ސަބަބެވެ.

އަނެއްކޮޅުން މިފަހުން އަލަތު ކައިވެނީގެ ގޮށްޖަހައި ހަޔާތުގެ ބައިވެރިޔަކަށް މަޝްހޫރު އެކްޓަރު އަހުމަދު ސައީދު ހަދާފައިވުމަކީ ވެސް މިފަހުން އާންމުންގެ ސަމާލުކަން އަޒޫ އަށް ލިބިގެންގޮސްފައިވާ ސަބަބެކެވެ. އެހެންވީމަ މި އިންޓަވިއުއެއްގައި ގައުމީ ފިލްމު އެވޯޑްސްގެ ކާމިޔާބީ އާއި އަޒޫގެ އަލަތު ފިރިމީހާގެ ވާހަކަ ވެސް އަންނަން ޖެހޭނެ އެވެ.

އެކަމަކު އެންމެ ފުރަތަމަ މި ބަތަލާގެ ތައާރަފަކުން ފަށައިގަންނަމާ ހިނގާށެވެ. "ލޫދިފާ" ގައި އޭނާ ކުޅުނު "އަރީކާ" ގެ ރޯލަކީ މުޅި ފިލްމީ ހަޔާތުގައި ވެސް މިހާތަނަށް ދެއްކުނު އެންމެ ވަރުގަދަ ޕާފޯމަންސެވެ. އެންމެ މޮޅު ސަޕޯޓިން އެކްޓްރެސްގެ އެވޯޑަށް ދެން ވާދަކުރި އައިޝަތު ރިޝްމީ އާއި ޝީލާ ނަޖީބު އަދި ކުޑަ ހައްޖަ ފަދަ އެހެން ތަރިން ވެސް އެހާ ފަސޭހައިން އަމާން ދިނީ މިހެންވެ ކަމަށް ވެދާނެ އެވެ.

އަޒޫގެ ފުރަތަމަ އޮން ސްކްރީން ފެނިލުމަކީ މަޝްހޫރު ޓީވީ ސިލްސިލާ "ދިރިއުޅުމަކީ މިއީބާ" ގެ އެޕިސޯޑެކެވެ. އަޒޫގެ ޓެލެންޓް ވަރަށް ކުޑައިރުގައި ދެނެގަނެ، ބެލުންތެރިންނާ ހަމަ އަށް ގެނެސްދިނީ އެ ސިލްސިލާގެ ލެޖެންޑް ޔޫސުފް ރަފީއު ޔޫސޭ އެވެ.

އެއަށް ފަހު މަދުމަދުން ފިލްމީ ދާއިރާގެ އެކި މަސައްކަތްތަކުގައި އުޅެން ފަށައިގެން އެންމެފަހުން ބެލުންތެރިންނަށް އަބަދު ފެންނަ މޫނަކަށް އޭނާ ބަދަލުވީ އެވެ. މިއަދު އަޒޫ އަކީ ދިވެހި ސިނަމާގެ އެންމެ އުއްމީދީ އެއް ބަތަލާކަން ޔަގީނެވެ.

ތިރީގައި މި އޮތީ އަވަސް ވީކެންޑް އިންޓަވިއު އަށް އަޒޫ ދިން ހާއްސަ އިންޓަވިއުއެވެ. އޭނާ މީޑިއާ އަށް ފިލައިގެން އުޅޭތާ މިހާރު ގާތްގަނޑަކަށް ދެ އަހަރުވީ އެވެ. އެހެންވީމަ އެ ސުވާލުން ފަށައިގަންނަމާ ހިނގާށެވެ.

"ގާތްގަނޑަކަށް މިހާރު ދެ އަހަރުވަރު ވެދާނެ އިންޓަވިއުއެއް ނުދޭތާ މިގޮތަށް. މީޑިއާއާ އަސްލު ދުރަށް ޖެހިލީ ޓީޗިން (ކޯސް) ހަދަންވެގެން. ދެންވީގޮތަކީ ކޯސް ނިންމާލާފަ ވެސް ފިލްމީ ދާއިރާއާ ދުރަށް ދާން އަސްލު. ފިލްމީ ދާއިރާ މަތިން ފޫހިވެފައި އޭރު ހުރީ ވެސް. އެގޮތުން މީޑިއާއާ ދުރަށް ވެސް ޖެހިލީ"

"އެއްގޮތަކުން މާ ބޮލަށް ފަސޭހަ މީޑިއާއާ ދުރުގައި އުޅުނީމަ. އެއީ ފާޑުފާޑުގެ ސުވާލެއް ނާންނާނެތާ ދުރުގައި އުޅުނީމަ."

"ގައުމީ އެވޯޑްސް އަށް ނޮމިނޭޓްވުން އެއީ ވަރަށް ބޮޑު ބޮޑު ހެޕިނެސްއެއް. ކޮންމެ މީހަކު ވެސް އުފާވާނެ އެހާ ބައިވަރު ފިލްމުތަކާއި އެކްޓްރެސްގެ ތެރެއިން ނޮމިނޭޓްވީމަ. ނޮމިނޭޓްވުން އެއީ މި ދާއިރާގައި ކުރިއަށް އެރުނުކަމުގެ އެއް ހެއްކެއް. އެ އަހަރުކުރެވުނު މަސައްކަތުގެ ނަތީޖާ ފެނުނީމަ ލިބޭ ހިތްހަމަޖެހުން އެންމެ ބޮޑީ."

"ދެން އެވޯޑް ލިބުން މިއީ ވަރަށް ބޮޑު ސަޕްރައިޒެއް. އެކަމަކު ވެސް އެންމެން ވެސް ބުނި އަޒޫ އަށް މި އެވޯޑް ލިބޭނެއޭ. ރިޝްމީ ވެސް ނިއުމާ ވެސް ބުނި. ފިލްމުގެ ޑައިރެކްޓަރު މޫމިން ވެސް ފުރަތަމަ ދުވަހުން ފެށިގެން ވެސް ބުނީ މިއީ އަޒޫގެ އެވޯޑެކޭ. މި އެވޯޑަކީ އަޒޫ އަށް ހައްގު އެވޯޑެއް ކަަމަށް އެހެންވެ ގަބޫލުކުރެވޭ. ރިޝްމީ ވެސް ބުނި މިއީ އަޅުގަނޑަށް ޑިޒާވް އެވޯޑެކޭ."

"ލޫދިފާ އަށް ފަހު ދެން އަޒޫ ކުޅުނު ފިލްމަކީ ސަޒާ. އެއީ ވެސް އަޒޫގެ ބެސްޓް ދައްކައިދެވުނު ފިލްމެއް. އެކަމަކު އަސްލުވާގޮތަކީ ފިލްމުތަކުން ފުރުސަތު ލިބުމަށް ފަހު އެހެން މީހުން އިންފްލުއެންސް އެބަ ފޯރުވާ. މިސާލަކަށް އެހެން މީހުން ވެސް ބުނޭ ހާދަ ޖެލަސީ މީހުން އެބަ އުޅެޔޭ މި ދާއިރާގައި. މި ދެ އަހަރު ތެރޭގައި ވެސް އެކަން ފާހަގަކުރެވުނު. ލިބޭ ގިނަ ފުރުސަތުތައް އެބަހުރި ކޮންމެވެސް އެހެން މީހެއްގެ ނުފޫޒާ ހެދި ގެއްލިގެން ގޮސްފައި"

"ފުރުސަތު ދީފައި އެގްރީމަންޓްކުރުމަށް ފަހު ވެސް އެބަހުރި ކަޓުވާލާފައި. މިސާލަކަށް އެ ފިލްމެއްގައި އުޅޭ އެހެން މީހުންގެ ފިއްތުންތަކާ ގުޅިގެން ވެސް އެބަހުރި ފިލްމުތަކުން ފުރުސަތު ގެއްލިފައި."

"މި ދާއިރާ ނޫން އެހެން ދާއިރާއެއްގެ މަސައްކަތެއްގެ ގޮތުގައި ޗޫޒްކުރި މަސައްކަތެއް ޓީޗިން އެއީ. ކުރަން ނިންމާފައި އިން ކަމެއް ވީމަ އެކަން ވެސް ފުރިހަމަކުރަން ބޭނުންވީ. އަދި ބޮޑަށް ފިލްމީ ދާއިރާއާ ދުރަށް ދާން ވިސްނާފައި ހުރިވަރުން ޓީޗިން އަށް އޭރު ދެވުނީ ވެސް. ކޯސް ހަދައި ފުރިހަމަ ވެސް ކުރިން. އަދި ނިންމާފަ ސްކޫލަކަށް ޖޮއިންކުރުމުން ވީގޮތަކީ އެއީ ވެސް ވަރަށް ބުރަ ދާއިރާއެއް. އަނެއްކޮޅުން މަސައްކަތާ އެއްވަރުގެ އާމްދަނީއެއް ވެސް ނުލިބޭ. އެހެންވީމަ އެ ފީލްޑް ދޫކޮށްލީ."

"ދުރަށް ދާން ނިންމުމުން ބައެއް މީހުން އެބަބުނޭ ކީއްވެހޭ ދުރަށް ދާންވީ. ކުރިއަށް ދެވޭނެއެއް ނޫން ހެއްޔޭ. މީހުން ހަސަދަވެރިވިޔަސް ކުޑަ ހިތްވަރެއްކޮށްލައިގެން ކުރިއަށް ދެވިދާނެއޭ. ދެން ކޮމްޕެޓިޝަން އޮންނާނެކަން ގަބޫލުކުރަން އަޒޫ ވެސް. އެކަމަކު އިންފްލުއެންސް ފޯރުކޮށް ފިލްމުތަކުން ގެއްލުވައިލުން މިއީ ވަރަށް ދެރަ ކަމެއް. މިސާލަކަށް އަޒޫއާ އެކު ދެން ފިލްމު ކުޅެން ނަގާ މީހާ އަށް ވުރެން އަޒޫ ތަންކޮޅެއް ދިގީ. އެގޮތުން ވެސް ފުރުސަތު ނުލިބިފައި އެބަހުރި."

"އެއީ އަސްލު ޕްރޮފެޝަނަލް ނުވުން ކަމަށް އަޒޫ ބަލަނީ. މީހާގެ ގައިގައި ހުންނަ ޓެލެންޓެއް މި ދައްކަން މި ޖެހެނީ. ދިގުމިން ކުރުމިން ދޮން މިން ކަޅު މިނެއް ނޫން. އެހެންވީމަ މިކަހަލަ މައްސަލަތަކެއް އެބަހުރި އެކަމަކު ވެސް އަޒޫ އަށް އެނގޭ ރަނގަޅު ރޯލެއް ލިބިއްޖެ ނަމަ ކުޅެވޭނެކަން."

"މިހާރަށް ބަލާ ނަމަ ފިލްމީ ދާއިރާގައި އެއް ބަޔަކު އެބައުޅޭ ކުރިއަރަން. އެކަމަކު އަނެއް ބަޔަކު އެބައުޅޭ އަމިއްލަ ފައިދާ އަށް ވެސް. އެކަމަކު ވެސް ކަންތައްތަކެއް އެބަ ރަނގަޅުވޭ."

"ރަނގަޅު އާމްދަނީއެއް ލިބޭ. ވޯކްކޮށްފިއްޔާމު ނުވަތަ ފުރުސަތުތަކެއް ލިބިއްޖެ ނަމަ. އާމްދަނީއެއް ނުލިބެއެކޭ ނުބުނާނަން. އެކަމަކު ހަމައެކަނި މިކަމަށް ހުސްވެގެންކުރާ ކަހަލަ މަސައްކަތެއް ބުނާހިތެއް ނުވޭ. އެގޮތަށް ހުސްވެގެންކުރާ ނަމަ ރަނގަޅު އާމްދަނީއެއް ވެސް ނުލިބޭނެ."

"ކަންތައްތަކެއް ހުރޭ. މިސާލަކަށް ތަނަކަށް ގޮސް ހީލެވޭ ގޮތަކުން ވެސް މީހުން ފާހަގަކޮށްފާނެ. އެހެންވީމަ ތަނަކަށް ދިޔަޔަސް ވަރަށް މަޑުން ހުންނަނީ. މިހާރު ވަރަށް އުނދަގޫވޭ އާންމުންގެ ތެރެއަށް ނުކުތުމުން މީހުން އެހާ ވަރަށް ބަލާތީ. ވަރަށް އުނދަގޫވާ ކަމެއް އެއީ. މީހުން ބުނާނެ ދެން އެކުގައި ފޮޓޯނަގައި ސެލްފީ ނަގަން ވެސް. އުފާވެސް ވޭ އެހެންވާތީ. އެކަމަކު ފެމިލީއާ އެކު އެ ލިބޭ ޓައިމް ނުލިބޭތީ ވަރަށް މިސްވޭ."

"މީހުންނާ ޖެހޭ މައްސަލަތަކަށް ނުވަދެ އުޅުމަށް، އެނގޭ ކަންތައްތައް ވެސް ނޭނގޭ ކަންތަކަށް ހަދާލައިގެން އުޅެނީ. އޭރަށް ހަމަ ގައިމު ވެސް އެއްވެސް މީހަކާ ޖެހޭ މައްސަލައެއް ނޯންނާނެ. ގޮސިޕްގެ ތެރެއަށް ނުވަދެ އުޅެނީ އަޒޫ. ފިލްމީ ދާއިރާގެ މީހުންނާ އެކު އެހާ ގިނައިން ތަންތަނަށް ގޮސް ވެސް ނަހަދަން. އާންމުކޮށް ގޮސްފި ނަމަ ކޮންމެވެސް މައްސަލައެއް ޖެހޭ. އެހެންވީމަ ބީރު ކަންފަތެއް ދީގެން ހުރީމަ މައްސަލައެއް ނުޖެހޭނެ."

"ފިލްމީ ދާއިރާގައި އަޒޫ ފާހަގަކުރެވޭނީ ޑިސިޕްލިންޑް މީހެއްގެ ގޮތުގައި. ޑިސިޕްލިން ވާނެ ގައިމުވެސް. ދެން އެހެން ތަރިން ވެސް ޑިސިޕްލިން. އެކަމަކު ކޮށްލެވޭ ކުދިކުދި ކަންކަމުންނާއި ދެން ވާގޮތަކީ އެކަކު އަނެކަކާ ޖައްސާލާފައި ތިބޭވަރު ބޮޑުކަމުންވާގޮތަކީ ފިލްމީ ދާއިރާގެ ތެރެއިން ވެސް ބޭނުންވޭ ހަމަ ބައެއް މީހުންގެ އަގު ވައްޓާލަން. އެގޮތަށް ވެސް އެބަހުރި ބައެއް ތަރިންގެ އަގުވެއްޓިފައި."

"ފިލްމީ ދާއިރާގެ މީހުންނަކީ ޖުމްލަކޮށް ޑިސިޕްލިންޑް ބައެއް. އެކަމަކު އަޒޫ އަކީ ޑިސިޕްލިން ދަށް މީހެކޭ ބުނެވޭނެ ގޮތެއް ނީންނާނެ. ދެން ދޮގެއް ހަދައިގެން ކިޔަންޏާމު ކިޔަންވީ."

"ބޮޑީ މެއިންޓެއިންކުރަން އަސްލު އަޒޫއަކަށް އެއްވެސް ކަމެއް ނުކުރެވޭ. އަޒޫ އަކީ ދުވަންދާ މީހެއް ނޫން. އެކަހަލަ އެކްސަސައިޒިންގެ އެއްވެސް ކަމެއް ނުހުންނާނެ ބޭނުންކޮށްފަ. އާންމުކޮށް ދެވޭނީ އަހަރަކު އެއްފަހަރު ފިލްމު އެސޯސިއޭޝަނުން ބާއްވާ ފުޓްބޯޅަ ކުޅޭއިރު. އަހަރު ތެރޭގައި ވެސް އެއީކަން ނޭނގެ ދުވެލަން ދެވޭތަނަކީ. އެކަމަކު މިހާރު ފަލަވީމަ ކުޑަކޮށް ކެއުން ކޮންޓްރޯލްކޮށްލައިގެން މި އުޅެނީ."

"ފަލައޭ ދެން މީހުން ބުނަނީ. ކުރިން އަޒޫ އަކީ ވަރަށް ހިކިކޮށް ހުރި މީހެއް. ބަނޑު ވެސް ނީނދޭ އޭރަކުއެއް. މިހާރު ދެން ފަލަ. އެކަމަކު ބައެއް މީހުންނަށް ލޯބިވެގެން އުޅެނީ. މީހުން ބުނޭ ތިވަރު ސަޅިއޭ. އެކަމަކު އަޒޫ އަށް ފެންނަގޮތުގައި ވެސް މިހާރު ތަންކޮޅެއް ފަލަވެއްޖެ."

"ހެޕީ ލައިފެއްގަ އުޅެންޏާ ފަލަވާނެއޭ ބުނާ ވާހަކަ އެއީ ހަމަ ތެދެއް. ފަލަވާނެ އެ ދުވަސްކޮޅު. އެއީ ހެޕީވީމަ ދެން ކެވޭނީ. ކައިކައިގެން ފަލަވާނީ. އަސްލު ތެދެެއް އެއީ ހަމަ. ފަލަވޭ."

"އަޒޫގެ ފުރަތަމަ ކައިވެނި މިއީ. ދެން އިރާދަކުރެއްވިއްޔާމު ވަރަށް ޕާފެކްޓްކޮށް މި ދަނީ. ވަރަށް ހެޕީކޮށް މި ދަނީ. ސައީދު އަކީ ވަރަށް ކެއަރިން ވަރަށް ރަނގަޅު، ވަރަށް ސަޕޯޓިވް ފިރިއެއްގެ ގޮތުގައި. ހުރިހާ ކަމެއްގައި ވެސް ސައީދު ހުންނަނީ. އެއްވެސް މީހަކު ނުހުންނާނެ އަނެއްހެނެއް. ސައީދުއަކީ އަޒޫގެ ހުރިހާ ކަމެއްގައި އެންމެ ބޮޑަށް އެހީވާ އެކަކު. އެކަކެއް ނޫން، ގައިމު ވެސް އޭނަ އެކަނި ހުންނަނީ އެހީވާން"

"މީހުންނަށް ފެންނައިރު ސައީދުއަކީ ވަރަށް ސީރިއަސް މީހެއް. އެކަމަކު އޭނަ އަކީ އަސްލަށް ވަރަށް މަޖާ، ވަރަށް ކެއަރިން، ލޯބި މީހެއް. ހަޔާތުގައި އައި އެންމެ ލޯބި މީހާއޭ ބުނެވޭނީ. އެހެންވެ ދޯ މެރީކުރާނީ ވެސް. ލޯބިނުވެ މެރީއެއް ނުކުރާނެ. އަޒޫ ސައީދުއާ މެރީކުރީ ވަރަށް ލޯބިން. އެކަމަކު ފަހުން ވާނެ ގޮތެއް އަދި ނޭނގޭ."

"ސައީދުގެ އެބަތިބި ދެ ކުދިން. ކުއްޖަކު ހޯދަން ވިސްނިން ކުރީގަ. އެކަމަކު މިހާރު ދެން މަޑުކޮށްލައިގެން މި އުޅެނީ އަދި. އަދި ތަންކޮޅެއް ފަހުން (ކުއްޖަކު ބޭނުންވަނީ).

"ކިޑްސް ހޯދަން އަސްލު ވަކި އޭޖެއް ނޯވޭ. ކުރިން ހޯދައިފިއްޔާމު އެއްގޮތަކުން އަސްލު ފައިދާ. ބޮޑެތިވެފައި ދޯ ތިބޭނީ ކުދިން. މިހާރު ހޯދައިފި ނަމަ އަދި 40 ވާއިރު ވެސް ކުދިންތައް ބޮޑެތި ނުވާނެކަން ނޭނގެ. އޭގައި ވަކި އޭޖެއް ނެތް. ކުދިން ރަނގަޅަށް ބެލިއްޖެއްޔާމު ނިމުނީތާ."

"ފިލްމީ ދާއިރާ އަށް ގެއްލިވެސްދާނެ. ނުގެއްލިވެސްދާނެ. އެކަމަކު ކުރިއަށް އޮތް އަހަރު ހުންނާނެހެން ހީވަނީ މިގޮތުގައި. އެއްވެސް މީހަކު ނުބުނާނެ މިކަން ހުއްޓާލާށެކޭ. އަޒޫ ދާންވީމަ ދާންވީ. ފިލްމީ ދާއިރާއާ ކުޑަކޮށް ދުރަށްޖެހިލިޔަސް ބައެއް މީހުން ބުނާނެ ފިރިމީހާ މިވެނިކަމެއް ވެގެންނޭ. އެކަމަކު އޭނަ އަކީ އެންމެ ބޮޑަށް މިކަމަށް ސަޕޯޓްދޭ މީހާ."

"ސައީދުގެ ކުރީގެ ކައިވެނި ރޫޅުނީކީ ގައިމު ވެސް އަޒޫއާ ހެދިއެކޭ ނުބުނެވޭނެ. ދެން އޭތި ޖަޖުކުރާނީ އެހެން މީހުން. ދެން ބުނެވިދާނެ، ފިލްމީ ދާއިރާގެ މީހުންނާ ބެހޭ ގޮތުން ފާޑުފާޑުގެ ވާހަކަ ވެސް ދައްކާނެ. އެކަމަކު ވެސް އަޒޫއާ ހެދިއެއް ނޫން ސައީދުގެ ކުރީގެ ލައިފް ދިޔައީ."

"ސެެލެބްރިޓީންގެ ކައިވެނި ކުރުވާނެއޭ މީހުން ބުނާ ވާހަކައަކީ މުޅިން ތެދެއް ނޫން. އެބަހުރި ކާމިޔާބުވެފައި ހުރި ކައިވެނިތައް ވެސް. މި ދާއިރާގައި ވެސް އެބައުޅޭ. އެހެންވީމަ އެއީކީ މުޅިން ތެދު ވާހަކައެއް ނޫން. ކޮންމެ ދާއިރާއެއްގައި ވެސް އޮންނާނެ ގޮތް މިއީ. ކާމިޔާބުވުމާއި ނުވުން އޮންނާނީ. އަޒޫ ބުނާނީ އެ އެއްޗެއް ގަބޫލެއް ނުކުރަމޭ އަޒޫއެއް. ދެ މީހުންގެ ދެމެދުގައި އަންޑަސްޓޭންޑިންއެއް އިނދެފި ނަމަ އުޅެވޭއޭ."

"ބޭަވަފާތެރިވީމަ ދެން ބޭވަފާތެރިވީ އެހިސާބުން. ސައީދު ބޭވަފާތެރިވެއްޖެ ނަމަ ބަލާނީ ކިހިނެތްވީ ކަމެއްތޯ އެއީ އެންމެ ފުރަތަމަ. ބަލާފަ ވާހަކަ ދައްކާފަ ދެން ނޫޅެވިއްޖެއްޔާމު. އެކަމަކު ސެޕަރޭޓްވާން އަޒޫ ބޭނުމެއް ނުވޭ. ވާހަކަ ދައްކައިގެން ހައްލުކުރެވޭނެ. އެހިސާބުން ސައީދު އެކަމަކާއިގެން ކުރިއަށް ދާން ބޭނުން ނަމަ ސައީދު އަޒޫ ދޫކޮށްލާނީ. ނޫނީ އަޒޫ ދާނީ. ޒުވާބުކޮށް ތަޅާފޮޅާ ހަޑިގޮތަކަށް ނިމޭކަށް ބޭނުމެއް ނުވޭ."