މިދިޔަ ހޮނިހިރު ދުވަހު ޔަހޫދީ އަސްކަރީ ޖެޓުތަކުން ޣައްޒާއަށް ހަމަލާދޭން ފެށިފަހުން މިހާތަނަށް 6،000 ބޮން އަޅާފައިވާނެ ކަމަށް ޔަހޫދީ އަސްކަރީ ބާރުން ބުނެފި އެވެ.
މިއީ އެމެރިކާ ސިފައިން އެއް އަހަރު ތެރޭގައި އަފްޣާނިސްތާނަށް ބޮންއެޅި އަދަދާ ވަރަށް ގާތްކުރާ އަދަދެކެވެ.
އދގެ ހިސާބުތަކުން ދައްކާ ގޮތުން އެމެރިކާއިން އަފްޣާނިސްތާނަށް އަހަރަކު 7،423 ބޮން ވަނީ އަޅާފަ އެވެ.
ނޭޓޯ ސިފައިން ލީބިއާގައި ސުލްހަަށް ކުރި ހަނގުރާމައިގައި 7،600 ބޮން، ލީބިޔާއަށް އެޅި ކަމަށްވެސް އދގެ ހިސާބުތަކުން ދައްކަ އެވެ.
ސީރިއާއާ އީރާގަށް ގަދަކޮށްގެން ތިބި އައިސިސް ހަނގުރާމަވެރިންނާ ދެކޮޅަށް، އެމެރިކާއާ ބައިވެރިން އެ ދުވަސްވަރު ދިން ހަމަލާތަކުގައި އެވްރެޖްކޮށް ކޮންމެ މަހަކު 2،500 ބޮން އަޅާފައިވާ ކަމަށްވެސް މެދުއިރުމަތީގެ ސިޔާސަތު ދިރާސާކުރާ މީހުން ބުނެ އެވެ.
ތަޖުރިބާކާރުން ބުނާ ގޮތުން ޔަހޫދީ ދައުލަތް މިއޮތީ ހައްދުފަހަނައަޅާފަ އެވެ.
އަފްޣާނިސްތާނާ އެއްވެސް ގޮތަކުން އަޅާކިޔެން ނެތް ކުޑަ ބިމަކަށް އަދީ އާބާދީ ތޮއްޖެހިފައި އޮތް ޣައްޒާއަށް މިވަރަށް ބޮންއެޅުމުގައި ނަސްލު ނައްތާލެއް ނައްތާލުން ނޫން ގަސްދެއް އޮތް ކަމަށް ގަބޫލުނުކުރެވޭ ކަމަށް ތަރުޖިބާކާރުން ދެކެ އެވެ.
މިހާ ބާރުގަދަ ބޮންތަކެއް މީހުންނާއިގެން ފުނިޖެހިފައި އޮތް ބިމަކަށް އެޅުމުން، މީހުން މަރުވާ އަދަދު ކަރުދާސްކުރަން ވެސް ދަތިވާނެ ކަމަށް އެ މީހުން ބުނެ އެވެ.
ޣައްޒާގެ ހެލްތު މިނިސްޓްރީން ބުނާ ގޮތުން ޔަހޫދީން ދިން ހަމަލާތަކުގައި ޣައްޒާއިން 1،537 މީހަކު ވަނީ މަރުވެފަ އެވެ. މީގެތެރޭގައި 500 ކުޑަކުދިންނާއި 276 އަންހެނުން ހިމެނެ އެވެ. އަދި ޒަހަމްތަކަށް ފަރުވާދޭން ޖެހިފައިވާ 6،612 މީހަކު ވެސް ހިމެނެ އެވެ.
ޔަހޫދީ ބޮޑުވަޒީރު ބެންޖަމިން ނަތަންޔާހޫ ވިދާޅުވާ ގޮތުން މިފަހަރު ހުއްޓާލުމެއް ނެތެވެ. އޭނާ އަދި ވިދާޅުވީ ހަމާސްގެ އެކަކުވެސް ޣައްޒާގައި ހުރި ނަމަ އެ މީހަކު އަތުޖެހެންދެން ހަނގުރާމަ ކުރިއަށް ދާނެ އެވެ.
ހަމާސްއިން ބޭނުންވަނީ ހަނގުރާމަކުރަން ކަމަށް ނަތަންޔާހޫ ވިދާޅުވި އެވެ. ޔަހޫދީ އަސްކަރިއްޔާ އޮތީ ފިސާރި ހަނގުރާމަކުރާ ހިތުން ކަމަށްވެސް ވިދާޅުވި އެވެ. އޭނާ އަދި ވިދާޅުވީ ދަނޑުގޮވާންކުރަން ދަނޑުވެރިން ބިމުގައި ފަސްގަނޑުޖަހާ ގޮތަށް ޔަހޫދީންގެ ބުލްޑޯޒަރުތަކުން މުޅި ޣައްޒާގައި ފަސްގަނޑުޖަހާފައި ނޫނީ މިފަހަރު ދޫކޮށްނުލައްވާނެ ކަމަށެވެ.